Read zande Matayo 14 Bible Online

Matayo 14 - zande bible

Matayo 14

¹Ni gu rago re Erode nangia bazogo ringara Gariraya agi pa Yesu,

²ko ki ya fu gako amoyambu, Gi ko re nga Yoane Babapatiza; ko zingi be kpio; mbiko gure gi gako apai re du na tandu nakura ti ni.

³Bambiko Erode azi Yoane, ki vo ko, ki moi ko ku bambukisa yo tipa Erodia, dia wirinako nga Firipo.

⁴Bambiko Yoane agumba ha fu Erode ya, “Ru nga ha foro mo di ri ni diaro te.”

⁵Ho si adu ni wa ko akpi nyemu ka imo Yoane, ko ki gunde be rimbasa, bambiko i aberẽ he ya nebi nga ko.

⁶Ono ho rago tingida pa vunga Erode ada ni, wiri Erodia ado gbere dagba yo, si ki ngba ti Erode.

⁷Were ko ki zunga he ya ko afu gu he fu ri ri akpi nyemu ka sana ko tipa ha.

⁸Mbiko sangba nari, ri ki ya, “Mo fú ri Yoane Babapatiza ku rogo kurungbu yo fere.”

⁹Rungo ki zi bakindo; ono bambiko gako zungahe, na agu yo nari riahe na ko, ko ki rugu yo i fu he afu;

¹⁰ko ki kedi aboro i ndu ka kata ri Yoane bambukisa yo.

¹¹I ki ye na riko kurungbu yo, i ki fu he fu degude; ri ki ndu na ni fu nari.

¹²Gako abawiriki ki ye, ki di kangbako ki kpisidi ko; i ki nindu ka gumba paha fu Yesu.

¹³Ho Yesu agi he ni, ko ki kpara ni sa ko ka ndu kurungba yo, ku ngbakungba yo. Ho rimbasa agi he ni, i ki ye rogo abaakporo ki ndu fuo ko tigayo pia yo ni nduyo.

¹⁴Ko ki ta kura nibi bakere rimbasa, nunga yo ki mangi ko, ko ki husi gayo akaza.

¹⁵Ho nyemu ada ni, gako abawiriki ki ye fuo ko, ki ya, “Ngbakungba nga gere, uru ima ti; mo kédi rimbasa aboro, i ndu ku rogo akporo kirikiri, ka ngbeka riahe ni tiyo.”

¹⁶Ono Yesu ki ya fu yo, “Pai ho ka i guari ti ni te; oni fú he fu yo i ri he.”

¹⁷I ki ya fu ko, “Udiudi kpokuta kina bisue be rani, na atĩo ue.”

¹⁸Ko ki ya, “Oni yé na ni fere.”

¹⁹Ko ki rugu rimbasa aboro i susungu auru nvuo; ko ki di gu kpokuta nadu bisue, na agu atĩo nadu ue, ko ki ngere ku ngbangbaturũ yo ki fu tambuahe, ki kuadi kpokuta nifu he fu abawiriki, abawiriki ki fu he fu rimbasa aboro.

²⁰I ki riki he dunduko, ki mbiki. I ki dungura gu mbusuruhe nanye, baga ki hiki bawe na ue.

²¹Agu akumba nari he i adu wa ka i du 5,000 gbia kuti ade na agude.

²²Yesu ki tona ruga gako abawiriki ni ba sa i zorõ ku kurungba yo, ka si mbata fu ko ku mbiti yo, ko ki asia rimbasa aboro.

²³Fuo asia ko rimbasa aboro, ko ki kpara ni sa ko ka ndu ku ri bagangara yo ka kpara yo. Ho rago abiri ni ko ki du yo ni sa ko.

²⁴Ono kurungba ki du bebere baime, si ki du ngba pai yo mbiko sungbura baime naamanga ha; bambiko yuge ayada ha bakere.

²⁵Pamanangba wiso ko ki ye fuo yo, ki nindu ri baime.

²⁶Ho abawiriki abi ko ni ko nindu ri baime, ngbaduyo ki nikua akua, i ki ya, “Toro du!” I ki nipoi ku ari ni gunde.

²⁷Ono Yesu ki ta gumba ha fu yo ni ba sa, niya, “Oni wása; mi du; ka oni gúnde nga ya.”

²⁸Petero ki ta karaga ha fu ko niya, “Gbia, si ngia mo du, mo yá fere mi ye fuo ro ku ri ime.”

²⁹Yesu ki ya, “Mo yé.” Petero ki kuru kurungba yo, ki nindu ri ime, ka ndu fuo Yesu.

³⁰Ono ho ko abi yuge ni, ko ki nigunde agunde; ko ki tona rinda, ko ki kpari ki ya, “Gbia, mo batasi re.”

³¹Yesu ki tãi beko ni ba sa, ki zi ko, ki ya fu ko, “Ako mo na toni idapase, tipagine mo asaka kpotoro yo ti ni?”

³²Ho i ayari ni ku kurungba yo, yuge ki kiti.

³³Agu yo nadu kurungba yo ki ta irisa ko, niya, “Wiri Mbori nga mo ni rengo.”

³⁴Ho i asi ni i ki da ku rogo gu ringara nga Genesareta.

³⁵Ho aboro gu ringara re abi ko ni, i ki kedi asunge ku rogo gu ringara re kirikiri dunduko, i ki ye na agu yo nakaza fuo ko dunduko.

³⁶I ki zúngadi ko i zadi kina pangba gako remu; agu yo dunduko nazadi he ki huku ahuka dunduko.