Read zande Matayo 15 Bible Online

Matayo 15 - zande bible

Matayo 15

¹Abakeapai na aFarusi ki ye Yeru sarema yo fuo Yesu, ki ya,

²“Tipagine gamo abawiriki abasa ga autarani sino ti ni? bambiko i nazunda nga beyo i nikari riahe te.”

³Ono ko ki karaga ha ki ya fu yo, “Tipagine oni ati ga Mbori ndika n ni mbiko sinoroni?

⁴Bambiko Mbori aya, ‘Mo írisi bamo na namo,’ na, ‘Gu ni ka gberẽ ngbani vo fu bani na nani, ni kpi akpi.’

⁵Ono oni ki ya, ‘Gu ni ka ya fu bani na nani, Gu he ka mo akumuko na ni be re, si i nifu he fu Mbori;

⁶ka ni airisa nga bani ya.’ Oni sa ga Mbori rugute ni kungba he mbiko sinoroni.

⁷Oni nga airabiriki! Yesaya ayugu pa roni ni ruru he, niya,

⁸‘Agi aboro re i nairisa re kina auru ngbayo; ono kpotoyo yo ti re tuturũ;

⁹ono i airisa re airisa vurũ niyugu gayo apai nga kina ga aboro ndika.’ ”

¹⁰Yesu ki yambu rimbasa fuo ko, ki ya fu yo, “Oni gi he ki rugu tironi na ni:

¹¹gu he rimi ku ngba yo ka si birikosi nga boro te; kina gu kuru ngba yo si birikosi boro.”

¹²Were gako abawiriki ki ye, ki ya fu ko, “Mo ini si agberẽ ti aFarusi ho i nigi gu pai ni re?”

¹³Ono ko ki karaga ha ki ya, “Gu rũrũ he dunduko Buba du ngbangbaturũ yo aru nga ya, i amófa ha amofa.

¹⁴Oni he yo ahe; i nga angbembatayo fu aboro ni airavurari. Ka iravurari ngbe mbata yo fu kura iravurari, i tiwi atiwa ku due yo ue.”

¹⁵Petero ki karaga ha ki ya fu ko, “Mo yúgu gi sanza re fu rani.”

¹⁶Ko ki ya, “Oni nazanga rugatise na apai tigaoni a kindi?

¹⁷Oni aina nga ha ya gu he dunduko narima ngba yo si nandu ku vuse yo, i ki ba ha aba ku nvuo yo te?

¹⁸Ono agu ahe nakura ngba yo, si naenga kpoto yo; ki nibirikosi boro.

¹⁹Bambiko kpoto yo gbegberẽ aberã niye ni, nga pa imoboro, na pa bari, na meteka, na dĩ, na gumba zire, na sengahe.

²⁰Agi ahe re na birikosi boro; ono he zunda be ka ri riahe si abirikosi nga boro te.”

²¹Yesu ki guari yo ki ndu ku rogo ringara Tura na Sidona.

²²Oni ngére, de nga boro Kanana ki kuru ngbanda agu arago re ki ta kpara niya, “Mo íni pai fere Gbia, mo nga Wiri Dawidi; daimona namanga wire nga de gbegberẽ.”

²³Ono ko akaraga nga pai fu ri wa sa te. Gako abawiriki ki ye ki ta zúngadi ko, niya, “Mo dó ri; bambiko ri nakpara fuo rani.”

²⁴Ono ko ki ta karaga ha niya, “I akedi re tipa kina gu ingiingi akandoro nga ngbatunga aYisaraere.”

²⁵Ono ri ata ye ni irisi ko, niya, “Gbia, mo únda re.”

²⁶Ko ki ta karaga ha niya, “Ngba nga dia ga agude kpokuta ka ba ha fu aango te.”

²⁷Ono ri ki ya, “Ii, Gbia; bambiko aango nari mbusuru kpokuta nga gu nati ku tii ga bairara mbisa yo.”

²⁸Yesu ki karaga ha fu ri, “Ako, na kii ga idapase gbe; I mángi he foro wa mo akpi nyemu he.” Ti kina gu saa re wiriri ki hu.

²⁹Yesu ki guari yo, ki mbedi na gu baime nga Gariraya. Ko ki dakpa ku ri bagangara yo, ki sungu yo.

³⁰Bakere rimbasa aboro ki ye koyo du ko ni, airaterenga ki du na yo, na airavurari, na kisikisi ngba aboro, na gbarĩgbarĩ aboro, na akura yo ni dungu yo, i ki zozogo yo pati nduko; ko ki husi yo.

³¹Were si ki iriwo airiwo ti rimbasa, ho i abi kisikisi ngba aboro ni i nifura, na gbarĩgbarĩ yo i ki du na ba yo, na airaterenga i nita, na airavurari i ningere. I ki nitaasi rimo ga Yisaraere Mbori.

³²Yesu ki ta yamba gako abawiriki fuo ko, niya, “Nunga rimbasa namanga re, bambiko i sungu na mi uru biata awere a nga he be yo ka i ri he te. Mi akpi nga nyemu ka asia yo na gomoro te, he ka maka yo gene.”

³³Abawiriki ki ya fu ko, “Wari ani Ka bi dungu udiudi kpokuta ni ngbakungba nore, rengbe na mbisa bakere rimbasa wa gere?”

³⁴Yesu ki ya fu yo, “Udiudi kpokuta be roni wãi?” I ki ya, “Si saba, na rukutu atĩo ni umba ra.”

³⁵Ko ki rugu rimbasa i susungusande.

³⁶Ko ki rogo gu udiudi kpokuta nadu saba na atĩo; ko ki fu tambuahe ki kuadi he, ki fu he fu gako abawiriki; abawiriki ki fuku he afuka fu rimbasa aboro.

³⁷I ki ri he dunduko, ki mbiki. I ki dungura yangara kuadikuadi he nanye, buma ki hiki saba.

³⁸Agu yo nari he i adu wa 4,000 nga akumba, gbia kuti ade na agude.

³⁹Ko ki asia rimbasa aboro, ki rimi ku kurungba yo, ki da ti ngbanda Magadana.