Read zande Matayo 17 Bible Online

Matayo 17 - zande bible

Matayo 17

¹Fuo rame sita Yesu ki rogo aPetero, na Yakoba, na wirinako nga Yoane, ki dakpa na yo ku ri bagangara yo ni sa yo.

²Kpotoko ki sa tihe ku bangiriyo; kpakpuko ki du adu kurẽkurẽ wa kina uru, gako remu ki vuru avura wa imarago.

³Oni ngére, aMose na Eriya ki ye fuo yo ki nifura na Yesu.

⁴Petero ki ya fu Yesu, “Gbia, du ani erẽ a ngba ti rani; ka mo kpi nyemu he mi adúa basura biata; gamo sa, ga Mose sa, ga Eriya a sa.”

⁵Ko ki ta du na kina fura were, mai ki vuru avura ba riyo; fugo ki poi ki ya, “Wire du re, nyemuko namanga re, ngba ko ti re gbe; oni gí pa ko.”

⁶Ho abawiriki agi gu pai ni re, i ki vagadi kpakpuyo, ki nigunde gbe.

⁷Yesu ki ye ki zadi yo, ki ya, “Oni gúari, ka oni gúnde nga ya.”

⁸I ki ya ngere ku ari, ka i abi nga boro ya, kina Yesu sa.

⁹Wa i aguari ri bagangara yo, Yesu ki rugu yo, ya, “Ka oni pé nga pa yuguyugu pai ya, da kina ho Wiri boro ka zinga ni berewe dagba akangba.”

¹⁰Were gako abawiriki ki ta sana ko, niya, “Wa du he were, tipagine abakeapai aya ti ni Eriya aye mbata?”

¹¹Ko ki karaga ha, ki ya, “Eriya ayé aye ni rengo, ko ki mbakadi ahe dunduko.

¹²Ono ya mi fu roni wẽ, Eriya aima ye, i aina nga ko te, ono i amangi ko wa i akpi nyemu he. Kina wo Wiri boro ahi dungu apai be yo.”

¹³Were abawiriki ki rugu tiyo na ni ya ko agumba pa Yoane Babapatiza fu yo.

¹⁴Ho i aye ni ku pati rimbasa, kumba ki ye fuo ko ki ta kuka barangba ko, niya,

¹⁵“Gbia, mo ini pai fu wire, bambiko ko na imawirianya ti ko, ko naima be he gbegberẽ; bambiko ko natiwa ku we yo dedede, ki nitiwi ku ime yo a dedede.

¹⁶Mi ki ndu na ko fuo gamo abawiriki, ka si adu nga wa ka i husi ko ya.”

¹⁷Yesu ki karaga ha ki ya, “Ako gi keretukeretu rika aboro re nazanga idapase, ani aráka na oni wãi? mi ahi gaoni pai da wari? Oni yé na ko kono du mi ni.”

¹⁸Yesu ki za ru; daimona ki kuru kpoto gude yo. Gude ki hu ti kina gu saa re.

¹⁹Were abawiriki ki ye ni sa yo fuo Yesu, ki ya, “Tipagine ani arengba nga ka danda ru ti ni ya?”

²⁰Ko ki ya fu yo, “Bambiko gaoni idapase toni. Bambiko ya mi fu roni ni rengo, ka gaoni idapase du wa tunga musutada, oni ayá fu gi bagangara re, ‘Mo gúari erẽ koyo re;’ si ki guari; a nga pai sa ka gasi roni te.”

²¹[“Ono ngbatunga gi ru re ago nga be he te kina kpe na gina riahe.”]

²²Wa i asungu Gariraya yo, Yesu ki ya fu yo, “I afú Wiri boro ku be aboro;

²³i aímo ko, biata uru ko ki zingi berewe.” I ki nirungo arungo bakere gbe.

²⁴Ho i ada ni ku Kaparanauma yo, agu yo nadungura marã ngbeti tipa vekaru ki ye fuo Petero, ki ya, “Ga bayugupai nafu marã ngbeti tigako?”

²⁵Ko ki ya “Ii.” Ho ko arimi ni ku bambu yo, Yesu ki gumba ha fu ko mbata, ki ya, “Gini pai mo aberã Simona? Agbia zegino nadia gayo marã be da? watadu be awiriyo na be kungba aboro?”

²⁶Ho ko agumba ha ni ya, “Be kungba aboro,” Yesu ki ya fu ko, “Awiriyo nara ni riyo.

²⁷Ono mo ndú ku baime yo, ki ba kombe, mo ki zi gu tĩo mo ka ba ru mbata; ho mo ka sara ngbaru ni, mo abi marã; mo di ru, ki fu ru fu yo tipa rani na mo, i ka kota mbiko rani.”