Read zande Matayo 18 Bible Online

Matayo 18 - zande bible

Matayo 18

¹Ti kina gu rago re abawiriki ki ye fuo Yesu ki sana ko, “Da nga bakere ni susi tie rogo gu ngbi nga ga ngbangbaturũ?”

²Ko ki yambu toni gude koyo du ko ni, ki moi ko dagba yo,

³ki ya, “Mi nagumba ha fu roni ni rengo, ka oni asá nga kpotoroni yo wa kina toni agude ya, oni rimi nga ku rogo gu ngbi nga ga ngbangba turu te.

⁴Were gu ni ka umbasi tini wa gi toni gude re, kina ni nikasusa rogo gu ngbi nga ga ngbangbaturũ.

⁵Gu ni ka di toni gude sa ku gume wa gi ni re ni rimore, ni di re ku gume.

⁶“Ono gu ni ka mangi gu toni gude sa idi pa re ni koto, si ka ngba tipa ni ka i vo kikii mbia kuti goni, ki ba ni ku bebere baime yo.

⁷Na gberẽ he fu zegino tipa agu apai namanga aboro i koto! bambiko agu apai ahe nga ye te re; ono rungo du fu gu ni gu pai naye be ni re!

⁸Were si ngia bero na nduro ka mangi ro mo koto, mo ki yere he ayera, ki ba ha. Rima mo ku unga yo ni gbundagbunda ro ni terengeterenge ro, si ka ngba tipa ro ti ba ro na bero ue na nduro ue ku rogo gu we ka abisa nga ya.

⁹Si ngia bangiro ka mangi ro mo koto, mo ki mo ho amo. Rima mo ku unga yo na bangiro sa, si ka ngba ti ro ti ba yo ro ku Geyena yo na bangiro ue.

¹⁰“Oni bi he ka oni páyasi nga gu ni sa dagba gu toni agude re ya; bambiko ya mi fu roni ngbangbaturũ yo gayo amaraika nabi kpakpu Buba ngbangbaturũ yo dedede.

¹¹Bambiko Wiri boro aye ka batasa ingiingi aboro.

¹²Oni naberã ha wãi? ka boro du na akandoro be ni 100, si ngia gu ru sa ki ingi, ni ki nihe agu ra du 99, ki nindu ku dagba abaagangara yo, ka gbata gu ru naingi te?

¹³Si ngia ni abi ru, ya mi fu roni ni rengo, ni angi angi tipa ru susi agu ra du 99 nainga nga ya.

¹⁴A wo Baroni du ngbangbaturũ yo, sangbako nga ka gu ni kpi nga sa dagba gi rukutu yo re ya.

¹⁵“Ka wirinamo ingi pai kuti ro, mo ndú, mo yúgu gani ingapai kuti ro dagba roni na ni ni sa roni. Ka ni gi paro, si wa mo gbe wirinamo fuo ro.

¹⁶Ono ka ni agia nga paro ya, mo ki di kura boro sa watadu ue, si ngia sangba adezire ue na biata anyakasa pai dunduko.

¹⁷Ka ni ka pa gia sangbayo, mo ki gumba ha fu kanisa. Ka ni ka pa gia sangba kanisa a, ni du foro wa Gendiria na barogo marã ngbeti.

¹⁸“Ya mi fu roni ni rengo, agu ahe dunduko oni ka voda ha sende no i avóda ha ngbangbaturũ yo. Agu ahe dunduko oni ka zaka ha sende no i azáka ha ngbangbaturũ yo.

¹⁹Ya mi fu roni berewe, ka aboro du ue dagba roni yo zadi pai kpotoyo yo tipa gu he i akpi nyemu ka sana he tipa ha, Buba du ngbangbaturũ yo amánga ha amanga fu yo.

²⁰Bambiko ka aboro dungura tiyo ue na biata ni rimore, mi du kina yo dagba yo.”

²¹Petero ki ye ki ya fu ko, “Gbia, ka wirinami ingi pai kuti re bara wãi mi ki he he fu ni? watadu bara saba?”

²²Yesu ki ya fu ko, “Mi aya nga foro bara saba te; ono, Bara saba bawe bara saba.

²³“Si du i naringbisa gu ngbi nga ga ngbangbaturũ ti ni kuti gu bakindo nageda bape fu gako amoyambu.

²⁴Ho ko nitona geda ha ni, i ki ye na boro sa fuo ko, gani bape na ko wa ataranda 10,000.

²⁵Ono bambiko he adu nga be ni wa ka ni tumo na ni te, ko ki rugu yo ya i bagi ni, na diani, na awirini, na gani ahe dunduko nadu be ni, i tumo ni na ni.

²⁶Gu moyambu ki ti sande ki irisi ko, ki ya, ‘Gbia mo zéresi nga ngbaduro ti bete rago mbata, mi atúmo foro dunduko.’

²⁷Nungani ki mangi baira gu moyambu re, ko ki kusi ni ki he bape fu ni.

²⁸Ono gu moyambu re ki kuru, ki bi gu kurani nadu na gani bape be ni wa rukutu marã feda 100. Ni ki ti ngba goni yo, ki ya, ‘Mo túmo gi bape fere.’

²⁹Were gu moyambu ki ti sande re ki zungadi ni, ki ya, ‘Mo zéresi nga ngbaduro ti bete rago mbata, mi atúmo foro.’

³⁰Ka ni aida nga ha fu ni ya. Ono ni ki ndu ki ba ni ku bambukisa yo, da ho ni ka tumo gu bape ni re.

³¹Were ho akurani abi gi pai ni re, i ki nirungo arungo gbe, i ki ye ki gumba gu pai namangi dunduko re fu gayo gbia.

³²Were gbia ki yambu ni koyo du ko ni, ki ya fu ni, ‘Gbe gberẽ moyambu nga mo! Mi ahe gi bape foro dunduko, mbiko wa mo azúngadi re;

³³ka mo ini nga pai fu kuaro wa mi aini pai foro te?’

³⁴Bairani ki zingi fu ni, ki fu ni ku be abarungosi aboro, ki da ho ni ka tumo gani bape ni dunduko.

³⁵Buba du ngbangbaturũ yo ko amanga kina wo fu roni a, ka oni ahe nga pai kpotoroni yo fu awirina roni ya.”