Read zande Matayo 19 Bible Online

Matayo 19 - zande bible

Matayo 19

¹Si ki ta du wa gere, ho Yesu ambu gumba agi apai ni re, ko ki guari Gariraya yo, ki da rogo gu ringara nga ga aYudo mbiti Yaradene yo;

²dungu rimbasa aboro ki nipeke ko; ko ki husi yo yo.

³AFarusi ki ye koyo du ko ni, ki ta asada ko, niya, “Ru he aru fu boro ni mbu diani tipa apai dunduko?”

⁴Ko ki karaga ha ki ya, “Oni ageda nga ha te? ya gu ko namangi yo ho rago aenge ni ko amangi yo ni kumba na de,

⁵ki ya, ‘Bambiko si du boro nihe bani ti ni na nani, ki ka kuti diani; i ue i ki du wa boro sa’?

⁶Si du i nadu nga ti ni ue berewe ya, i ki du adu sa. Were gu Mbori akpamia re ka boro kpara nga ha ya.”

⁷I ki ya fu ko, “Tipagine tie Mose arú ndita ke waraga kpara boro na diani ti ni?”

⁸Ko ki ya fu yo, “Mbiko nyaka ngbaduroni si du Mose aidi he fu roni oni he adiaroni ti ni; ono ho rago aenge ni si adu nga wo te.

⁹Ya mi fu roni wẽ, gu ni ka he diani tipa kura pai angia nga pa bari ya, ki di kura ri, ni namanga bari. Gu ni ka di gu de i nihe ri, ni namanga pa bari.”

¹⁰Abawiriki ki ya fu ko, “Ka pai dũ were tipa boro na diani, ngba nga i rogo tiyo na de te.”

¹¹Ono Yesu ki ya fu yo, “A nga aboro dunduko rengbe na dia gi pai te re, ono kina agu yo fu yo pa dia ha fu yo.

¹²Bambiko airazangada kina ho nga agu yo i abatika yo kina wo rukumbu nayo yo. Airazangada kina ho a, nga agu yo i asa yo ni airazangada. Airazangada kina ho a, nga agu yo nasa tiyo ni airazangada tipa gu ngbi nga ga ngbangbaturũ. Gu ni rengbe ka dia ha ni di he.”

¹³Were i ki ye na rukutu agude koyo du ko ni, ko moi beko ri yo ki kpari; abawiriki ki za yo.

¹⁴Ono Yesu ki ya, “Oni hé rukutu agude i ye fuo re, ka oni káraga nga yo ya; bambiko i wa kina agu yo du rogo gu ngbi nga ga ngbangbaturũ.”

¹⁵Ko ki moi beko ri yo, ki guari yo.

¹⁶Oni ngére, boro ki ye fuo Yesu, ki ya, “Wene Bayugupai, gini wene pai mi ka manga, nyenye unga du be re?”

¹⁷Yesu ki ya fu ko, “Tipagine yambu mo re ti ni, ki ya, wene? A nga boro sa du ni wene ni te kina Mbori sa. Ono ka mo kpi nyemu rima ku rogo unga, mo ká kuti arugute.”

¹⁸Ko ki ya fu ko, “Gini gu?” Yesu ki ya, “Ka mo ími nga boro ya, Ka mo mángi nga bari ya, Ka mo dĩ nga he ya, Ka mo gúmba nga zire kuti kuaro ya,

¹⁹Mo írisi bamo na namo; Mo kpí nyemu kuaro wa mo akpi nyamu tiro.”

²⁰Paranga ki ya fu ko, “Agi apai re mi amangi he dunduko; gini pai atadi mi he?”

²¹Yesu ki ya fu ko, “Ka mo kpi nyemu ka du ziazia, mo ndú, ki bagi agu ahe du be ro, ki gagamu he fu rungorungo aboro, mo akúmuko ngbangbaturũ yo; mo ki ye ka apeka re.”

²²Ono ho paranga agi gi pai ni re, ko ki guari nirungo arungo; bambiko ko adu ni boro kumuko gbe.

²³Yesu ki ya fu gako abawiriki, “Ya mi fu roni ni rengo, kpakarakpakara pai nga ha fu gu ni kumuko akumuko ka rima ku rogo gu ngbi nga ga ngbangbaturũ.

²⁴Ya mi fu roni berewe, si ipi fu kameri ka kura rogo yaro mbereke yo, ti rima kumukokumuko boro ku rogo ga Mbori ngbi.”

²⁵Ho abawiriki agi gi pai ni re, si ki niiriwo airiwo ti yo gbe, i ki ya, “Ka si du were, da ka bati?”

²⁶Yesu ki ta bi yo niya fu yo, “Ka boro mangi nga gi te re; ono ka Mbori mangi apai amanga dunduko.”

²⁷Petero ki karaga ha ki ya fu ko, “Mo ngére nga, wa ani ambu ahe dunduko, ki nipeke ro; ani adia gine?”

²⁸Yesu ki ya fu yo, “Mi nagumba ha fu roni ni rengo, agu roni napeka re, ni gu rago Wiri boro ka sunga auru mbatabakindo na taarimoko, ho i ka sa ahe ni dunduko ni vovo ho, oni asunga auru mbataabakindo bawe na ue, ka sapa ngbanga ngbatunga aYisaraere bawe na ue.

²⁹Gu ni mbu abambu na awirinani, na adawirini, na bani, na nani, na awirini, na aati, tipa rimore, ni aróga ahe susi gu naadu mbata bara 100, ni ki di kumbo nyenye unga.

³⁰Ono agu yo ni dungu yo du mbata yo i nikadu ku sa yo; agu yo du sa yo i ki du mbata yo.