Read zande Matayo 2 Bible Online

Matayo 2 - zande bible

Matayo 2

¹Were ho i abatika Yesu ni Betereme yo du Yuda yo rago gu bakindo nga Erode, oni ngére, airatatamana ki ye uroyo ku Yerusarema yo,

²ki ya, “Wari du gu ko ni i abatika ko ni Bakindo aYudo re? bambiko ani abi gako kerekuru uroyo ki ye ka irisa ko.”

³Were ho Erode agi he ni nga bakindo si ki imi ti ko, na aboro Yerusarema dũ.

⁴Ko ki dungura abaira aboromotumo na ga aboro abakeapai, ko ki sasana yo wari i ka batika Kristo ni.

⁵I ki ya fu ko, “Betereme yo du Yuda yo; bambiko si ni keke he be nebi wa gere,

⁶‘Na mo nga Betereme, du ringara Yuda yo, mo adu nga sa yo dagba agbia Yuda te; bambiko bazogo aye yo du mo ni, ni adu ni babanda gimi aboro nga aYisaraere,’ ”

⁷Erode ki yambu agu airatatamana re tie, ni gbuko ki sasana yo sirisiri ti gu rago ho i abi kerekuru ni.

⁸Ko ki kedi yo ku Betereme yo, ki ya, “Oni ndú ka gbata gu toni gude re sirisiri; ho oni ka bi ko ni, oni ki ye ka gumba ha fere, mi ndu ka irisa ko.”

⁹Were ho i agi ga bakindo pai ni, i ki ndu gayo nduge; were gu kerekuru i abi ru uroyo u ki ningbe fu yo ku mbata yo, daho u ada ni ki ru ri gu ba ho gu toni gude adu ni re.

¹⁰Were hoi abi kerekuru ni, i ki sambua tiyo ni bakere ngbarago.

¹¹I ki rimi ku dimo yo ki bi toni gude be Maria nga nako; i ki ti sande ki irisi ko; i ki zogo gayo kumuko ki fu gamahe fu ko, nga dahabu na fuõngua na mure.

¹²Mbori ki yugu he fu yo rogo musumo yo ya ka i karaga nga tiyo koyo du Erode ni ya, si du i aga ti ni ku kpuyo yo ngba kura gene.

¹³Were ho i aguari ni, oni ngére, ga Gbia maraika ki ta yugo tiko fu Yosefa rogo musumo yo, niya, “Mo gúari ki di toni gude na nako, ki oro ku Ezipeta yo, mo ki sungu yo daho mi ka gumba pai ni foro; bambiko Erode nikagbata toni gude ka imo ko.”

¹⁴Ko ki guari ki di toni gude na nako yuru, ki ga ku Ezipeta yo;

¹⁵ki sungu yo daho Erode akpi ni. Gu pai Gbia agumba ku ngba nebi si du ni digisidigisi he, ya, “Mi ayambu wire Ezipeta yo.”

¹⁶Were Erode, ho ko abi he ni ya airatatamana asawia ko, ko ki zingi gbe, ki Kedi aboro ki iimi akumbagude dunduko naadu Betereme yo, na pati he kirikiri, agu yo garãyo adu ue na agu yo garãyo ata du nga ue ya, a wa gu rago ko awiriki pa ha sirisiri be airatatamana.

¹⁷Gu pai ki du ni digisidigisi he Yeremaya agumba ha nga nebi, ya,

¹⁸“I agi fugo Rama yo, kpe na bakere nunga, Raere nikpari tipa awiriri; ka ri awasa nga ya, bambiko i ho te.”

¹⁹Ho Erode akpi ni, ga Gbia maraika ki yugu tiko fu Yosefa rogo musumo Ezipeta yo,

²⁰niya, “Mo gúari ki di toni gude na nako, ki ga ku rogo ringara aYisaraere; mbiko agu yo naasadi ka imo toni gude i kpi.”

²¹Ko ki guari ki di toni gude na nako, ki ye ku rogo ringara aYisaraere.

²²Ono ho ko agi he ni ya Arukerao azogo aboro Yuda yo ku ba bako nga Erode, ko ki gunde ti ndu koyo; ko ki kuru ku ringara Gariraya yo, Mbori nayugu pa ha fu ko rogo musumo.

²³Yosefa ki ye ki raki rogo bakporo nga Nazareta; gu pai dũ ni digisidigisi he anebi agumba ha, ya “I ya ti ko boro Nazareta.”