Read zande Matayo 20 Bible Online

Matayo 20 - zande bible

Matayo 20

¹“Bambiko gu ngbi nga ga ngbangbaturũ si wa kina baira kporo, nakuru ngba wiso ka gbata aboro sunge tipa gako ati bakakue.

²Ho ko aidi ni ka fu rukutu marã feda sa fu aboro sunge, rogo uru sa, ko ki kedi yo ku rogo gako ati bakakue.

³Ko ki kuru ti saa ribua, ki bi akura yo i rundu bangbeahe yo gbua.

⁴Ko ki ya fu yo, ‘Oni ndú a tigaoni ku ati bakakue yo, mi afú mosoro fu roni wa rengbe he.’ I ki ndu.

⁵Ko ki kuru berewe ti bebere uru na ti saa biata nyemu, ki mangi a wo.

⁶Si ki ta du wa ka saa du bisue nga ga nyemu ko ki kuru ki bi akura yo i rundu, ko ki ya fu yo, ‘Oni naru erẽ ti gi uru dunduko re gbua tipagine?’

⁷I ki ya fu ko, ‘Bambiko boro afu nga sunge fu rani te.’ Ko ki ya fu yo, ‘Oni ndú tigaoni a ku ati bakakue yo.’

⁸Ho nyemu ada ni, baira ati bakakue ki ya fu gako buruku, ‘Mo yámbu aboro sunge, ki fu mosoro fu yo, ki tona ha ti gu ni naye sa yo, ki da ti bambata ni’.

⁹Ho agu yo aye ni i afu sunge fu yo ti saa bisue, i ki rogo gayo rukutu marã feda sa ni ba sa sa dunduko.

¹⁰Ho gu bambata yo aye ni, i ki berẽ he tigayo ya i aróga ra susi; ono i arogo rukutu marã feda sa ni ba sa sa a.

¹¹Ho i arogo ra ni were, i ki nigumba rimo baira kporo,

¹²ki ya, ‘Agi yo re niima wa kina saa sa gbua, mo ringbisi gayo wa kina gaani, nimbu rogo gbaigbai uru areme dunduko.’

¹³Ono ko ki karaga ha ki ya fu gu ni sa dagba yo, ‘Badia, mi amanga nga ro te Mo naida nga pa rukutu marã feda sa fere wiso te?

¹⁴Mo dí gamo ru, ki ga. Mi nakpi nyemu ka fu ru fu gu ni niye sa yo re, wa kina gamo ru.

¹⁵Ru nga manga mi na gimi ahe wa mi akpi nyemu he te? Gberẽ he agberã bangiro wa du mi ni wene boro?’

¹⁶Gu ni du sa yo ni ka du mbata yo, na gu ni du mbata yo ni nikadu sa yo.”

¹⁷Wa Yesu andu ku Yerusarema yo, ko ki rogo agu abawiriki nanidu bawe na ue ni sa yo, ki ya fu yo gene,

¹⁸“Oni ngére, ani nandu ku Yerusarema yo, i afú Wiri boro ku be abairamotumo na abakeapai. I asara ngbanga ko ko kpi,

¹⁹i afú ko ku vurube aGendiria i sawia ko, ki nitaki ko, ki wagi ko. Biata uru ko azinga berewe.”

²⁰Dia Zebedayo ki ye na awiriri koyo du ko ni, ki ta irisa ko, nizungadi ko tipa pai.

²¹Ko ki ya fu ri, “Gine mo akpi nyemu he?” Ri ki ya fu ko, “Mo ásia ha ya agi awire du ue re, i sungu gu ni sa ku kumbabero, na gu ni sa Ku garebero, rogo ga ngbi.”

²²Ono Yesu ki karaga ha ki ya, “Oni aina nga gu he oni azúngadi he tipa ha te. Ka oni mbiri he ti ngba gu inga mi nambira he ti ni?” I ki ya fu ko, “Ani rengbe na ni.”

²³Ko ki ya fu yo, “Oni ambira he ambira ti ngba gi inga ni rengo. Ono sunga ku kumbabere, na ku garebere, gi gamahe nga ha te, ono si tipa agu yo Buba ambakadi he tipa yo.”

²⁴Ho agu yo agi he ni nadu bawe, i ki zingi kuti agu awirina ue re.

²⁵Ono Yesu ki yambu yo koyo du ko ni, ki ya, “Oni ini he ya agu yo nazoga aGendiria i namanga yo a wa i nakpi nyemu he; gayo abanyaki ki nyakasi yo.

²⁶Ka si dú nga wo dagba roni yo ya. Ono gu ni nakpi nyemu ka du ni bahe dagba roni, ni adú ni gaoni moyambu.

²⁷Gu ni nakpi nyemu ka du mbata yo fu roni, ni adú ni gaoni kanga;

²⁸a wa Wiri boro aye nga i nimangi pa ko te, ko naye ka manga pa aboro, ka tumo dungu yo ni ungako.”

²⁹Wa i aguari Yereo yo, bakere rimbasa ki nipeke Yesu.

³⁰Oni ngére, aboro vurari ki sungu pangba gene ue, ho i agi he ni ya Yesu nasusa, i ki ta paa ku ari, niya, “Gbia mo ini pai fu rani, mo wiri Dawidi.”

³¹Rimbasa ki za yo, i ongo; ono i ki poi ku ari susi gu naadu mbata, ki ya, “Gbia, mo ini pai fu rani, mo wiri Dawidi.”

³²Yesu ki ru zaa, ki ta yamba yo, niya, “Gine oni akpi nyemu mi mangi he fu roni?”

³³I ki ya fu ko, “Gbia, ani nakpi nyemu bangirani ha.”

³⁴Nungayo ki mangi Yesu amanga, ko ki zadi Dangiriyo; i ki ngere ni ba sa, ki nipeke ko.