Read zande Matayo 21 Bible Online

Matayo 21 - zande bible

Matayo 21

¹Ho i ambeda ni ku Yerusarema yo i ki da ku Betefage yo, ku pati bagangara Aeraya, Yesu ki kedi abawiriki ue,

²niya fu yo, “Oni ndú ku rogo gu kporo du pati roni, oni abí dongi ni ba sa ni vovo ru, na paranga dongi a na u. Oni záki ra ki ye na ami kono du mi ni.

³Ka boro sana roni, oni ki ya, ‘Gbia nakpi nyemu ra’, ni ki kedi ra ni ba sa.”

⁴Were gi pai re da gu pai dũ ni digisidigisi he nebi agumba ha, naaya,

⁵“Oni yá fu aboro Siona, Oni ngére, gaoni bakindo naye kono du oni ni, ni umbasiti nisungu auru dongi, auru paranga wiri dongi a.”

⁶Abawiriki ki ndu ki mangi a wa Yesu arugu yo na ni,

⁷i ki ye na dongi na paranga dongi, ki ba gayo aremu auru ra; ko ki sungu ri he.

⁸Aboro rimbasa ki gbaragi gayo aremu ni dungu yo gene; agu yo ki dewe bengua ki gbaragi he gene.

⁹Gu dungu aboro naandu mbata yo fu ko, na agu yo naapeka ko, i ki ta paa ku ari, niya, “Tambuahe fú wiri Dawidi! Mbori fu maku fu gu ko naye ni rimo Gbia! Tambuahe dú ari yo gbe!”

¹⁰Ho ko aye ni ku Yerusarema yo bakporo ki wo awo dunduko, i ki ya, “Da nga gi boro re?”

¹¹Rimbasa aboro ki ya, “Nebi nga gi ko re nga Yesu, ye Nazareta yo, du Gariraya yo.”

¹²Yesu ki rimi ku rogo ga Mbori yekaru, ki bafu agu yo ku zegi yo dunduko nanababaga ahe na agu yo nanangbeka ahe yekaru yo, ki vavagadi ga abaundaamarã ambisa, na agu ambata nga ga agu yo nanababaga ambipo.

¹³Ko ki ya fu yo, “Si ni keke he ya, ‘I ayá ti gi bambu, bambu kparakpe’; ono oni sa ha ni yaro abatuka.”

¹⁴Airavurari na airaterenga ki niye ku yekaru yo; ko ki husi yo.

¹⁵Ono ho abairamotumo abi gu iiriwo apai ni ko amangi he na abakeapai, na wa agude apaa yekaru yo, ki ya, “Tambuahe fu wiri Dawidi!” ngbaduyo ki niimi aima bakere;

¹⁶i ki ya fu ko, “Mo gi gu pai agi yo agumba ha re?” Yesu ki ya fu yo, “Ii: oni ageda nga ha, ya, ‘Mo rugu pa tambuahe zaa ku ngba rukutu agude na ahaamai’, te?”

¹⁷Ko ki guari pati yo, ki kuru rogo gu bakporo re ka ndu ku Betania yo, ki ra yo.

¹⁸Were wiso wa ko akaraga tiko ku bakporo yo, gomoro amangi ko.

¹⁹Ko ki bi vurumo pangba gene, ki da pati he, ka ko abi nga zuzuhe ti ni ya, ono Kina kpehe; ko ki ya fu he, “Ka mo zú nga berewe fuo gere wa sa ya.” Were vurumo ki nyokora anyokora kindi.

²⁰Ho abawiriki abi he ni, si ki niiriwo airiwo ti yo, i ki ya, “Gu vurumo re si niwiri pa nyokora ni ipo wãi?”

²¹Yesu ki karaga ha ki ya fu yo, “Ya mi fu roni ni rengo, ka idapase du ti roni, ka oni asaka nga ha kpotoroni yo ya, oni amánga nga kina gu i nimangi he fu vurumo te re, ono ka oni vura gumba ha fu gi bagangara re, si guari ki ti ati ku baime yo, si amánga amanga wo.

²²Ahe dunduko, gu he ka oni sana he tipa ha rogo kpe yo, ni idapase, oni adia ha adia.”

²³Ho ko aye ni ku yekaru yo, abairamotumo na ga aboro abaakumba ki ye koyo du ko ni wa ko ayugo pai, ki ya, “Gini tandu mo amanga agi apai na ni re? da asia agi apai foro mo amanga re?”

²⁴Yesu ki karaga ha ki ya fu yo, “Mi asana roni a tipa pai sa, gu ka oni karaga pai fere, mi nikagumba pa gu tandu fu roni mi amanga agi apai na ni re.

²⁵Gu bapatiza nga ga Yoane, si aye wari? watadu ngbangbaturũ yo na be aboro?” I ki saki pai dagba yo, niya, “Ka ani ya, ‘Si aye ngbangbaturũ yo,’ ko aya fu rani, ‘Tipagine tie oni aida nga pa ko ti ni ya?’

²⁶Ono ka ani ya, ‘Si aye be aboro,’ ani gunde agunde be aboro; bambiko i naya Yoane nga nebi.”

²⁷I ki karaga ha fu Yesu, ki ya, “Ani aina nga ha te.” Ko ki ya fu yo a, “Mi agumba nga pa gu tandu fu roni mi amanga agi apai na ni re a te.

²⁸“Ono si bangironi wãi? Kumba nadu na awiriko ue; ko ki ye fuo bambata ni, ki ya, ‘Gude, mo ndú ka manga sunge rogo ati bakakue areme.’

²⁹Ko ki karaga ha ki ya, ‘Mi andú nga te’; ono fuo ho ko ki sa gako berã, ki ndu.

³⁰Ko ki ye fuo ue ni, ki gumba ha kina wo. Ko ki karaga ha ki ya. ‘Ba mi nandu,’ ka ko andu nga ya.

³¹Gini ni du dagba agi yo ue re namangi sangba bani?” I ki ya, “Gu bambata ni.” Yesu ki ya fu yo, “Mi nagumba ha fu roni ni rengo ya abarogo marã ngbeti na adebari narima ku rogo ga Mbori ngbi yo mbata fu roni.

³²Bambiko Yoane aye koyo du oni ni ngba gene rurupai, oni aida nga pa ko te; ono abarogo marã ngbeti na adebari aidi pa ko: oni, ho oni abi he ni oni asa nga gaoni berã fuo gure ka ida pa ko a te.

³³“Oni gí kura sanza. Kumba nadu irakporo naru bakakue ati yo, ki gbegba pati he kirikiri, ki ge due ka pirã ha yo, ki dua gbaraga, ki he he fu ababandaati, ko ki ndu ku rogo kura ringara.

³⁴Ho regbo zuzuhe ambeda ni, ko ki kedi gako akanga koyo du ababandaati ni, i zuzuhe.

³⁵Ababandaati ki zi gako akanga, ki ta gu ni, ki imi gu ni, ki zumudi gu ni na, ambia.

³⁶Ko ki kedi kura akanga berewe susi gu naadu mbata; i ki mangi agi yore kina wo a.

³⁷Ono fuo ho, ko ki kedi wiriko nga kumba fu yo, ki ya, ‘I airisa wire.’

³⁸Ono ho ababandaati abi wiriko ni, i ki ya dagba yo, ‘Dikumbo du re; oni yé, ani imi ko, ũkumbo du ni gaani,’

³⁹I ki zi ko, ki kusi ko ku sa yo ti ati bakakue, ki imi ko.

⁴⁰Ho iraati ka ye ni ko amanga wãi fu agu ababandaati re?”

⁴¹I ki ya fu ko, “Ko agbárasa gu gbegberẽ aboro re gbegberẽ, ki he ati fu kura ababandaati nikafu zuzuhe na regboho.”

⁴²Yesu ki ya fu yo, “Oni ageda nga, rogo Ziazia Kekeapai yo te? ya, ‘Gu mbia abaduabambu agindiga, ha, si i asa ha ni gu nidu ti tukpu he ri he, gi pai re Gbia amangi he, si ki niiriwo bangirani.’

⁴³Ya mi fu roni wẽ, gu ngbi nga ga tyw i adia ha adia be roni, i ki fu he fu gu aboro nikazu kina gaha zuzuhe.

⁴⁴Gu ni ka ti ku ri gi mbia re ni akita akita ono gu ni si ka ti ku auru ni, si agbándaka ni agbandaka wa kina nvutu.”

⁴⁵Ho abairamotumo agi gako asanza ni na aFarusi, i aini he ya ko agumba pa yo.

⁴⁶Ho i aasadi zia ko ni, i ki gunde agunde be rimbasa aboro, bambiko i aya ti ko nebi.