Read zande Matayo 23 Bible Online

Matayo 23 - zande bible

Matayo 23

¹Yesu ki gumba pai fu rimbasa aboro na gako abawiriki,

²ki ya, “Abakeapai nasunga auru ga Mose mbata na aFarusi,

³agu apai dunduko tie i ka gumba pa ha fu roni, oni mángi kina ha ki ka kuti ni; ono ka oni péke nga sinoyo ka manga wa yo ya; bambiko i nagumba pai, ono i amanga nga ha te.

⁴Ii, i navoda rõrõi tindiro ki tutumba ha ku pagorõ aboro; ono i akpi nga nyemu ka zada ha tigayo ni wirinzagayo te.

⁵Ono gayo apai dunduko i namanga ha fu aboro i bi yo ti ni: bambiko i nasa gayo úradatise ni bakere he, ki mangi pangba gayo aroko ni kikii he,

⁶ki nikpi nyemu bairisa kporo pumbo, na ambata irisa bambutiria yo,

⁷na paa aboro kuti yo bangbeahe yo, na aboro ya ti yo, bayugupai.

⁸Ono ka i ya nga ti roni bayugupai ya; bambiko gu sa nga gaoni bayugupai, oni ki du ni awirina dunduko.

⁹Ka oni ya nga ti gu boro du zegino wẽ baroni ya; bambiko Baroni sa du ngbangbaturũ yo.

¹⁰Ka i ya nga ti roni baira ya; bambiko kina Kristo sa nga bairaroni.

¹¹Ono gu ni ka du dagba roni yo ni bakumba susi, ni ka du ni gaoni moyambu.

¹²Gu ni ka kiisa tini, i aúmbasi ni aumbasi; na gu ni nikaumbasi tini i akíisa ni.

¹³“Ono na gberẽ he fu roni abakeapai na aFarusi, nga airabiriki! bambiko oni nakisa gu ngbi nga ga ngbangbaturũ be aboro; bambiko oni arima nga tigaoni te, oni aida nga fu agu yo nakpi nyemu he i rimi ko yo a te.

¹⁴Na gberẽ he fu roni abakeapai na aFarusi, nga airabiriki! bambiko oni narita ga adekurugbo ahe, ki nikpari ni gbanga ha ni biriki; si du i ka gbarasa ngbanga fu roni ti ni susi.

¹⁵Na gberẽ he fu roni, abakeapai na aFarusi nga airabiriki! bambiko oni nake pati baime na pia yo ka sa boro sa ni gaoni bawiriki; ho oni ka sa ni ni, oni ki sa ni ni wiri Geyena susi roni wa bara ue.

¹⁶“Na gberẽ he fu roni, nga iravurari angbembatayo fu aboro, naya, ‘Gu ni ka zunga yekaru, si gbua; ono gu ni ka zunga dahabu nga ga yekaru ni nga boro bape.’

¹⁷Oni nga mumungo aboro ni airavurari! Dahabu na gu yekaru nasa dahabu ni ziazia ha, gini gu susi?

¹⁸Oni ki ya, ‘Gu ni ka zunga bamotumo yo, si gbua; ono gu ni ka zunga gu gamahe du auru he, ni nga boro bape.’

¹⁹Airavurari nga oni! Bambiko watadu gamahe, na gu bamotumo nasa gamahe ni ziazia ha, gini gu susi?

²⁰Gu ni nazunga bamotumo tie ni nazunga ha, na agu ahe dunduko du auru he.

²¹Gu ni nazunga yekaru, ni nazunga ha, na gu ko sungu vuru he yo.

²²Gu ni nazunga ngbangbaturũ, ni nazunga ga Mbori mbatabakindo, na gu ko sungu ri he.

²³“Na gberẽ he fu roni, abakeapai na aFarusi, nga airabiriki! bambiko oni nafu sa dagba bawe nga ga danda na anisi na kumina, oni ki he manga gu pai kii dagba arugute, nga sapangbanga, na inapai, na idapase; ono ka oni amangi agi apai re ka oni ahe nga manga gu kura ha a ya.

²⁴Oni nga iravurari angbembatayo fu aboro, naba wiri gbiro ku sa yo, ki mbiri kameri!

²⁵“Na gberẽ he fu roni, abakeapai na aFarusi, nga airabiriki! bambiko oni nazunda gii inga yo na gii kurungbu yo, ono vuru he yo hi ahi be gbu ahe na ruguzuruguzu apai.

²⁶Mo iravurari Farusi, mo zúndu vuru inga yo na vuru kurungbu yo mbata, gii he yo ki giri.

²⁷“Na gberẽ he fu roni, abakeapai na aFarusi, nga airabiriki! bambiko oni du wa vurusivurusi ambia murã du ni wene he ti kpotoho bangirise, ono vuru he yo hi be meme kangba aboro, na zirĩ ahe dunduko.

²⁸Oni kina wo a ki wiri ruru roni bangiri aboro, ono kpotoroni yo hi be biriki na ingapai.

²⁹“Na gberẽ he fu roni, abakeapai na aFarusi, nga airabiriki! bambiko oni nadua mbia murã anebi, ki mbakadi ga ruru aboro murã,

³⁰ki ya, ‘Ka ani adu na atitarani, ka ani angbe nga na yo sa kusa kure anebi ya.’

³¹Were, oni nga adezire roni, ya oni nga awiri agu yo naimi anebi.

³²Oni hisi gu maduka tie nga ga abaroni.

³³Oni nga awo, oni nga awiri awo, oni awira pa bata be gu mbusa nga ga Geyena wãi?

³⁴Were, oni ngére, mi nakeda anebi fu roni, na airatatamana, na abakeapai, agu yo oni aímo yo ki wagi yo; agu yo oni atáka yo rogo gaoni bambutiria yo ki nirungosi yo rogo akporo,

³⁵ya gu ruru kure dunduko i auka ku sande, si ye ku ri roni, tona ti kure Ebere nangia ruru boro dati kure Zakaraya wiri Barakiya, ko, oni aimi ko dagba kparakpara ba na bamotumo.

³⁶Ya mi fu roni ni rengo, agi ahe dunduko re si aye ku ri gi rika aboro re.

³⁷“Ako aboro Yerusarema, aboro Yerusarema, ninaimo anebi, ki nizumudi agu yo i akedi yo fuo roni! mi akpi nyemu dungura awironi a wa kondo nadungura awiru ku tii puporu bara wãi, ka oni aida nga ha ya!

³⁸Oni ngére, i he gaoni kporo fu roni ni bate.

³⁹Bambiko ya mi fu roni, oni abi nga re berewe te, daho oni ka ya ni, ‘Mbori fu maku fu gu ko naye ni rimo Gbia.’”