Read zande Matayo 24 Bible Online

Matayo 24 - zande bible

Matayo 24

¹Yesu ki kuru yekaru yo, ki ya ndu gako nduge; gako abawiriki ki ye koyo du ko ni ka yugo abambu yekaru fu ko.

²Ono ko akaraga ha ki ya fu yo, “Oni bi agi ahe dunduko te re? Ya mi fu roni ni rengo, mbia adú nga erẽ sa auru kura ha, i ka he bafa ha te.”

³Wa ko asungu auru bagangara Aeraya, abawiriki ki ye koyo du ko ni ni rondo, ki ya, “Mo gúmba nga ha fu rani, ni gini rago agi apai ka manga re? gine i ka ina pa ga ye ti ni, na pa digida rago?”

⁴Yesu ki karaga ha ki ya fu yo, “Oni bánda tironi ka boro ingisi nga roni wa sa ya.

⁵Bambiko dungu aboro nikaye ni rimore, ki ya, ‘Kristo nga mi’, i ki ingisi dungu aboro.

⁶Oni agia pa avura na serekpo avura; oni bi he ka si fudi nga roni ya; bambiko ka agi apai amánga re; ono digidaha ata da nga te.

⁷Bambiko rika aboro azínga kuti gu rika aboro, ngbi ki zingi kuti gu ngbi; angbongi nikadu na abazigizo rogo agu arago.

⁸Ono tonatona rungo nga agi apai dunduko re.

⁹“I ki fuku roni sa gberãngbi; ki iimi roni. Rika aboro asóga roni asoga dunduko tipa rimore.

¹⁰Dungu aboro akóta akota ni gu rago re, i ki fuku akurayo ku be aboro, i ki sogo akurayo asoga.

¹¹Dungu zire anebi nikakura, i ki ingisi dungu aboro.

¹²Gu nyemuse du ti agu yo ni dungu yo si azéra azera, bambiko ingapai amaa pai amaa.

¹³Ono gu ni nikaru ki da ho ragoho ka diga ni, ni abata abata.

¹⁴Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro du; ragoho ki digi adiga.

¹⁵“Si du no oni ka bi gu gbegberẽ kere gbarasa rago ni, nga gu Daniere nga nebi agumba pa ha, si ru rogo ziazia ba yo (gu ni nageda gi pai re ni rugu tini na ni),

¹⁶agu yo ka du Yuda yo i ki oro aora ku bagangara yo.

¹⁷Gu ni ka du ri bambu yo ka ni azórã nga ka roga agu ahe ka du tii gani bambu yo ya.

¹⁸Gu ni ka du ati yo ka ni akáraga nga tini ka dia gani baukadi ya.

¹⁹Ono si agbérã agberã ti agu yo ka adúka na vuse na agu yo ka ahága agude ni gu rago re!

²⁰Oni kpári ya ka gaoni oto du nga rago zere ya, na rago sabiti a ya.

²¹Bambiko ni gu rago re bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.

²²Ka Mbori agurusa nga gu rago re ya, ka boro abati nga wa sa te; ono i agúrusa gu rago re tipa siasia aboro.

²³Ka boro ya fu roni ni gu rago re, ‘Oni bí, Kristo du re!’ na, ‘Ko du re!’ ka oni aida nga ha ya.

²⁴Bambiko zire akristo akura, na zire anebi, i ki yuyugu bakere apai i aina pai ti ni, na iiriwo apai; si ya du wa ka i ingisi siasia aboro i ingisi yo.

²⁵Oni ngére, mi gumba ha fu roni mbata si nikamanga.

²⁶Si du tie ka i ya fu roni, ‘Oni ngére, ko du ngbakungba yo’, ka oni akúra nga ya; ka i ya, ‘Oni ngére, ko du vuru dimo yo,’ ka oni aida nga ha ya.

²⁷Bambiko wa ikpira gumba nakura uroyo i ki bi he ku dioyo, wo ye Wiri boro nikadu.

²⁸Ho kangba ka du ni, yo anguku ka dungura tira ku ho ni.

²⁹“Ono ni ba sa, fuo gu gberãngbi nga ga gu rago re, i adáda uru adada, diwi ahása nga rago te, akerekuru ki nitiwi atiwa ngbangbaturũ yo, agu atandu du ngbangbaturũ yo, i azígizo ho azigizo.

³⁰Fuo gure i ki bi gu pai i aina pai ti ni nga ga Wiri boro ngbangbaturũ yo. Ngbatunga aboro auru kpotosende dunduko i ki nirungo arungo, i ki bi Wiri boro ko niye rogo mai ngbangbaturũ na tandu na bakere taarimo.

³¹Ko ki kedi gako amaraika na bakere woro ngbunga, i ki dungura gako siasia aboro rogo arago du, ti digida ngbangbaturũ dunduko.

³²“Were oni wíriki sanza ti vurumo: ni gu rago behe narungbura ki moi kpehe amaa, oni ki ini ya kita nambeda;

³³a wo oni a, ni gu rago oni ka bi agi apai re, oni ki ini ya ko mbedi, ko ngbadimo.

³⁴Ya mi fu roni ni rengo, gi rika aboro re i ago nga daho agi apai ka diga ni dunduko te re.

³⁵Ngbangbaturũ ago ago na kpotosende, ono gimi apai ago nga te.

³⁶“Ono boro aina nga gu uru na gu saa wa sa te re, amaraika ngbangbaturũ a te, Wiri a te, ono kina Ba sa.

³⁷Wa si adu rago Noa, wo pa ye Wiri boro nikadu.

³⁸Bambiko, wa si adu ni gu rago naadu mbata fu ngirimo akangbi re, i aniri he nimbiri he, nirogo ade nifuku ade sa roga yo, ki da ti gu uru Noa arimi ni ku kurungba yo,

³⁹ka i aina nga ha ya daho ngirimo akangbi aye ni ki nirogo yo dunduko ku sa yo; wo ye Wiri boro nikadu.

⁴⁰Ni gu rago re akumba adú ati yo ue; i ki di gu ni, ki he gu ni.

⁴¹Ade adú pati mbia ue nisa ahe; i ki di gu ni, ki he gu ni.

⁴²Oni ngére tie, bambiko oni aina nga ni gu uru gaoni Gbia ka ye te.

⁴³Ono oni ini gere ya ka irakporo aini gu rago iradĩ ka ye ti ni, ka ni angere, ka ni aida nga i kuadi gani bambu ya.

⁴⁴Si du oni mbákadi tironi a tie; bambiko Wiri boro naye ti gu saa oni aberã nga pa ha ya.

⁴⁵“Da nga gu kangara moyambu tie du na tatamana, gani gbia amoi ni ri gako aboro kporo ni fu gayo riahe fu yo ti ragoho?

⁴⁶Boro maku nga gu moyambu gani gbia ka bi ni ni nimangi wo ho ko ka ye ni.

⁴⁷Ya mi fu roni ni rengo, ko aásia pa gako ahe dunduko fu ni.

⁴⁸Ono ka gu gbegberẽ moyambu ayá re ku kpotoni yo, ‘Gi gbia naima,’

⁴⁹ni ki tona taka gu kura amoyambu du na ko, ki ta ri ahe nimbiri he na akpibuda;

⁵⁰gbia gu moyambu re ayé ni gu uru ni aso nga gima ko ya, ti gu saa ni aina nga ha ya,

⁵¹ki taki ni ni pai, ki ringbisi gani ba na airabiriki; yo kpe ka du ni na ri ngba rinde.