Read zande Matayo 25 Bible Online

Matayo 25 - zande bible

Matayo 25

¹“Ni gu rago re, i aríngbisa gu ngbi nga ga ngbangbaturũ kuti ngasu ade bawe, narogo gayo atara, ki ndu ka gbia gu kumba nadi de.

²Agu yo bisue adu ni airamungo, agu yo bisue adu ni airatatamana.

³Bambiko airamungo ho i arogo gayo atara ni, ka i aroga nga nzeme tipa ha ya.

⁴Ono airatatamana andu na nzeme vuru gayo andukura yo na atara a.

⁵Were wa gu kumba aima nadi de, i ayukura ki nira ara dunduko.

⁶Ono bebere yuru, tatangba ki niwo, niya, ‘Oni ngére, gu kumba nadi de! Oni kúru ka ndu ka gbia ko.’

⁷Were gu ngasu ade re dunduko ki zingi, ki mbakadi gayo atara.

⁸Airamungo ki niya fu airatatamana, ‘Oni fú bete gaoni nzeme fu rani; bambiko gaani atara nabisa.’

⁹Ono airatatamana ki karaga ha ki ya, ‘Si ngia si aréngba nga tipa rani na oni te. Si ngba oni ndú fu ababagiahe, ki ngbeke he tigaoni.’

¹⁰Wa i andu ka ngbeka ha, gu kumba nadi de ki da; agu yo ki rimi na ko naasunguda ko ku pati pumbo diade; i ki kisi ngbadimo.

¹¹Fuo ho gu kura ngasu ade ki ye, ki ya, ‘Gbia, Gbia, mo úru ngbadimo fu rani.’

¹²Ono ko ki karaga ha ki ya, ‘Ya mi fu roni ni rengo, mi aina nga roni te.’

¹³Oni ngére tie, bambiko oni aina nga uru he na gu saa a te.

¹⁴“Bambiko si wa ka kumba andu ku rogo kura ringara, ki yambu gako aboro sunge, ki fuku gako ahe ku be yo.

¹⁵Ko ki fu ataranda bisue fu gu ni, ki fu ra ue fu gu ni, ki fu ru sa fu gu ni; ko afuku ra fu yo wa rengbe na omeyo; ko ki tona ka ndu gako nunguro.

¹⁶Ni ba sa gu ni narogo ataranda bisue ni andu ki bagi ra, ki gbata kura ataranda bisue ku ri gu naadu mbata.

¹⁷Gu ni narogo ra ue ni ki moi kura ra ue ku auru ra kina wo.

¹⁸Ono gu ni nadi ru sa ni ki ndu ki ge due ku sende yo, ki igi ga bairani marã koyo.

¹⁹Were fuo rago ni gbanga ha baira agu aboro sunge ki ye re, ki wisigi yo.

²⁰Gu ni narogo ataranda bisue ki niye na kura ataranda bisue, ki ya, ‘Gbia, mo afu ataranda fere bisue; mo ngére mi kiisi ra na kura ataranda bisue.’

²¹Bairani ki ya fu ni, ‘Mo amangi he wenengaĩ, wene kangara boro sunge nga mo; mo amangi agu apai du ni umba ha wenengaĩ, mi aásia pa bakere apai foro. Mo rimi ku rogo ga bairaro ngbarago.’

²²Gu ni narogo ataranda ue ni ki ye ki ya, ‘Gbia, mo afu ataranda fere ue; mo ngére, mi kiisi ra na kura ataranda ue.’

²³Bairani ki ya fu ni, ‘Mo amangi he wenengaĩ, wene kangara boro sunge nga mo; mo amangi agu apai du ni umba ha wenengaĩ, mi aásia pa bakere apai foro; mo rimi ku rogo ga bairaro ngbarago.’

²⁴Gu ni nadi taranda sa ni ki ye ki ya, ‘Gbia mi aini he ya nyanyaki boro nga mo, mo nake gu mo arú nga ya, ki dungura gu mo ami nga ha ya.

²⁵Mi ki gunde, ki ndu ki oko ga taranda ku sende yo. Mo ngére, gamo kina be ro.’

²⁶Ono bairani ki karaga ha ki ya fu ni, ‘Mo nga gbegberẽ iranyomoro boro sunge, mo aini he ya, mi nake bara ho mi aru nga ni ya, ki dungura ha ho mi ami nga ha ni a ya.

²⁷Ka mo afu gi marã ku be ababandara, rago yega mi ka mi adi gimi ra na kura ra ku ri ra.

²⁸Were oni dí gu taranda be ko, ki fu ru fu gu ko du na ataranda bawe.

²⁹Bambiko gu ni du na he be ni i afú kura ha fu ni, si ki du be ni ni dungu he. Ono gu ni adu nga na he be ni ya, i adia kina gu du be ni.

³⁰Oni bá gu iranyomoro boro sunge re ku rogo gu bitimo du zegi yo; yo kpe ka du ni na ri ngba rinde.’

³¹“Ono ho Wiri boro ka ye ni rogo gako taarimo, na amaraika dunduko fuo ko, ko asúnga ri mbatabakindo nga ga taarimo.

³²I adúngura arikaaboro ku bara bangiriko dunduko. Ko ki kparaka yo, wa babanda akandoro nakparaka akandoro ti ameme.

³³Ko amaa akandoro ku kumbabeko yo, ono ameme ku gare yo.

³⁴Gbia ki ya fu agu yo du ku kumbabeko yo, ‘Ga Buba aboro maku oni yé, oni dí kumbo gu ngbi du ni mbakadimbakadi he tipa roni ho rago aenge ni da awere.

³⁵Bambiko gomoro amangi re, oni ki nifu riahe fere; gomoro ime amangi re, oni ki nifu he fere. Mi adu wa uro, oni ki nidi re ku gume.

³⁶Mi adu ni kundiri re, oni ki ukadi re na roko. Mi adu na kaza, oni ki niye ka bi re; mi adu bambukisa yo, oni ki niye koyo du mi ni.’

³⁷Ruru yo ki ta karaga ha fu ko ki ya, ‘Gbia, ani abi ro na gomoro ni gini rago, ki nifu riahe foro? na gomoro ime a, ki nifu he foro?

³⁸Ani abi ro wa uro ni gini rago, ki nidi ro ku gume? ni kundiri ro a, ki niukadi ro na roko?

³⁹Ani abi ro na kaza ni gini rago, na bambukisa yo a, ki niye koyo du mo ni?’

⁴⁰Bakindo ki karaga ha ki ya fu yo, ‘Ya mi fu roni ni rengo, wa oni anamanga ha fu agi awirinami re ka ni vura du sa dagba gi payapaya yo re vurũ, oni amangi he fere.’

⁴¹Ko ki ya fu agu yo du ku garebe yo a, ‘Oni gúari pati re, aboro motiwa, ku rogo gu nyenye we du ni mbakadimbakadi he tipa bakitingbanga na gako amaraika.

⁴²Bambiko gomoro amangi re, oni afu nga riahe fere te. Gomoro ime amangi re oni afu nga ha fere te.

⁴³Mi adu wa uro, oni adía nga re ku gume te; ni kundiri re a oni aukadi nga re na roko te; ki nikaza a, ki nidu ku bambukisa yo a, oni aye nga koyo du mi ni te.’

⁴⁴I ki karaga ha a, ki ya, ‘Gbia ani abi ro na gomoro ni gini rago? na gomoro ime, na wa uro, na ni kundiri ro, na kaza, na bambukisa yo, ka ani amanga nga pa ro ya?’

⁴⁵Ko ki karaga ha fu yo, ki ya, ‘Ya mi fu roni ni rengo, wa oni amanga nga ha fu gi payapaya ni sa re ya, oni amanga nga ha fere te.’

⁴⁶Agi yo ki guari re ku rogo nyenye mbusa; ono ruru yo ku rogo nyenye unga.”