Read zande Matayo 26 Bible Online

Matayo 26 - zande bible

Matayo 26

¹Si ki ta du wa gere, ho Yesu anyasi agi apai ni dunduko re, ko ki ya fu gako abawiriki,

²“Oni ini ya fuo rame ue pumbo susiri nikada, i ki fu Wiri boro i wagi ko.”

³Ni gu rago re abairamotumo ki dungura tiyo dunduko na ga aYudo abaakumba, ku rogo ga gu gbiamotumo ngbanga, i aya ti ko Kayafa.

⁴I ki ta bura dagba yo i zi Yesu ni biriki, ka imo ko.

⁵Ono i ki ya, “Rago pumbo te, aboro ka manga gbarakagbaraka dagba yo.”

⁶Were ho Yesu adu ni Betania yo, rogo ga Simona bambu nangia boro ngbataka,

⁷de ki ye sa fuo ko nadu na ndukura nzeme kii genoho akia, ri ki uka ha ku riko yo, wa ko asungu ka ri riahe.

⁸Ono ho abawiriki abi he ni, si ki gberẽ agberã ti yo, i ki ya, “Ndu misika gi he re nga gine?

⁹Bambiko ka i abagi he tipa bakere marã, ki fuku he fu rungorungo aboro.”

¹⁰Ono Yesu ho ko agi he ni, ko ki ya fu yo, “Tipagine oni afuda de ti ni? bambiko ri mangi wene pai fere.

¹¹Bambiko rungorungo aboro du na oni waragoagira; ono mi adu nga na oni waragoagira te.

¹²Bambiko wa ri nimbedi kpotore ni nzeme, ri nimangi he kuti rago kpisida re.

¹³Ya mi fu roni, ni rengo, rogo agu arago i ka tungusa gi wene pangbanga ni re zegino dũ, gi pai mangi gi de a re, i agúmba ha agumba ka atingida pari ti ni.”

¹⁴Gu ko sa dagba agu yo nanidu bawe na ue, i aya ti ko Yuda Keriota, ko ki ndu koyo du abairamotumo ni,

¹⁵ki ya, “Gine oni ka fu fere mi ki fu Yesu ku be roni?” I ki ringbisi marã feda fu ko wa 30.

¹⁶Ti gu rago re ko ki nigbata rago ka fu ko ku be yo.

¹⁷Were ti gu bambata uru nga ga pumbo susiri abawiriki ki niye fuo Yesu, ki ya, “Wari mo akpi nyemu ani mbakadi pumbo susiri ni foro mo ri he?”

¹⁸Ko ki ya, “Oni ndú ku bakporo yo fu gu kumba re, ki ya fu ko, ‘Ya Bayugupai wẽ, Ragore mbedi; mi nakpi nyemu ka ri pumbo susiri kpuro yo na gimi abawiriki.’”

¹⁹Abawiriki ki mangi a wa Yesu aringbisi he fu yo; i ki mbakadi pumbo susiri.

²⁰Were ho nyemu ada ni, ko asungu ki niri riahe na agu abawiriki nanidu bawe na ue.

²¹Wa i ari he, ko ki ya, “Ya mi fu roni ni rengo, gu ni sa dagba roni nikakusa re.”

²²I ki nirungo arungo bakere, ki tona sana ko ni ba sa sa, “Mi du, Gbia?”

²³Ko ki karaga ha ki ya; “Gu ni ani anogoda he na ni kurungba yo, kina ni nikakusa re.

²⁴Wiri boro nandu, a wa i ake pa ko; ono si agbérã agberã ti gu kumba nakusa Wiri boro re! ka i avunga nga ko ya si ka ngba tipa ko.”

²⁵Yuda nga gu ko nakusi ko, ki ya, “Mi du, Bayugupai?” Yesu ki ya fu ko, “A si mo agumba ha re.”

²⁶Wa i ari riahe, Yesu ki di kpokuta ki fu tambuahe, ki kuadi he; ko ki nifu he fu abawiriki, ki ya, “Oni dí he ki ri he, gere nga borore.”

²⁷Ko ki di inga, ki fu tambuahe, ki fu he fu yo, ki ya, “Oni mbiri he ambira ti ngba gere dunduko;

²⁸bambiko gere nga kurere nga ga vovo ndika, i niuka ha tipa roni na dungu aboro sa dia gbegberẽapai ti yo.

²⁹Ono ya mi fu roni, mi ambira nga gi rindi bakakue berewe te re dati gu mi ka mbira ni vovo ho na oni rogo ga Buba ngbi yo.”

³⁰Fuo bi yo bia tambuahe, i ki ndu ku bagangara Aeraya yo.

³¹Yesu ki ya fu yo, “I amánga roni oni koto akota dunduko tipa re ni gi yuru re. Bambiko i ake he ya, ‘Mi atá babanda akandoro ata, rimbasa akandoro ki gbandaka yasika.’

³²Ono ho Mbori ka zingisa re ni, mi andú mbata fu roni ku Gariraya yo.”

³³Ono Petero ki ta karaga ha niya fu ko, “Ka i mangi agu yo i koto akota dunduko tipa ro, ka mi akóta nga ya.”

³⁴Yesu ki ya fu ko, “Ya mi foro ni rengo, ni gi yuru re, mo aóra rimore aora bara biata mbata bakondo nikakua.”

³⁵Petero ki ya fu ko, “Ka ani vura kpi akpi na mo mi óro nga rimoro te.” Agu yo ki mongo poi kina wo dũ.

³⁶Yesu ki ye na yo ku rogo gu ba i aniya ti ni Getesemane yo, ko ki ya fu gako abawiriki, “Oni súngu erẽ, wa mi andu ku yore ka kpara.”

³⁷Ko ki rogo aPetero fuo ko na awiri Zebedayo ue, ko ki tona ka rungo, pai ki fudi ko bakere.

³⁸Ko ki ya fu yo, “Mbisimore nazinga gbe kina yo du kpio ni. Oni nyé erẽ, ani ngére na oni.”

³⁹Ko ki ndu ku mbata yo ngbutuko, ki ti sande ni kpakpuko, ki ta kpara, niya, “Ako Buba, ka si du wo, gi inga guari pati re re. Ono, ka si du nga wa mi akpi nyemu he ya, wa kina mo akpi nyemu he.”

⁴⁰Ko ki ye fuo abawiriki, ki bi yo i nira ara, ko ki ya fu Petero; “Wãi, ka oni rengbe nga na ngera na mi saa du sa a te?

⁴¹Oni ngére ki nikpari, oni ka rima ku rogo asada. Mbisimoroni nakpi nyemu he ni rengo, bororoni anyaka nga ya.”

⁴²Ko ki ndu berewe ni ue he, ki nikpari niya, “Ako Buba, ka gi inga anyasa nga re ya, kina gu ka mi mbiri he, mo mángi wa mo akpi nyemu he.”

⁴³Ko ki ye berewe ki bi yo i nira ara, bambiko bangiriyo arõi arõa.

⁴⁴Ko ki guari pati yo berewe, ki ndu ki kpari ni biata ha, nigumba kina agu apai berewe ko agumba mbata.

⁴⁵Ko ki ye fuo abawiriki, ki ya fu yo, “Oni nara wa du rago re kindi ki ongodi; oni ngére, ragoho da, i fu Wiri boro ku vurube aboro ingapai.

⁴⁶Oni gúari, ani ndú. Oni ngére, gu ni nikakusa re ni mbedi.”

⁴⁷Si kina ku ngbako, Yuda ki ye aye nga gu ko nadu dagba agu yo nanidu bawe na ue, na bakere rimbasa fuo ko na abasape a angbondo, yo du abairamotumo ni na ga aYudo abaakumba.

⁴⁸Were gu ko nakusi ko, ko aima ringbisa ha fu yo, ki ya, “Gu boro mi ka dungo ni kina ko du. Oni zí ko.”

⁴⁹Ko ki ye fuo Yesu ni ba sa, ki ya, “Ako Bayugupai!” Ko ki dungo ko gbe.

⁵⁰Yesu ki ya fu ko, “Badiangba, mo mángi gu ye mo ti ni.” I ki ye ki moi beyo ti Yesu ki zi ko.

⁵¹Oni ngére, gu ni sa dagba agu yo nadu na Yesu ki tãi beni, ki mo gani basape, ki ta ga gbiamotumo moyambu ki yere tuko.

⁵²Yesu ki ya fu ni, “Mo mói ga basape ku sirikpa ha yo. Bambiko agu yo dunduko naroga basape i akpi kina be basape.

⁵³Ya mo tigamo mi arengba nga na zúngadi Buba ko kedi amaraika wa rika vura bawe na ue te?

⁵⁴Ziazia Kekeapai awira pa diga wãi wo? wa si agumba ha ya si amánga amanga wo.”

⁵⁵Ni gu rago re Yesu ki ya fu rimbasa aboro, “Sa oni re ni batuka ye oni ti ni na abasape na angbondo ka zia re? Wa mi anasunga yekaru yo na uru niyugu pai, oni nazia nga re te.

⁵⁶Ono mangi agi apai re du, gu Ziazia Kekeapai da ti rengo nga ga anebi.” Abawiriki ki mongo guari aguari pati ko, ki oro.

⁵⁷Agu yo nazi Yesu i ki ndu na ko koyo du gbiamotumo ni nga Kayafa, ho abakeapai adungura tiyo ku ho ni na ga aYudo abaakumba.

⁵⁸Ono Petero ape ko tuturu, kuti mburu gu bambu nga ga gbiamotumo, ki rimi ku dimo yo, ki sungu na amoyambu, ka bi gu pai nikamanga.

⁵⁹Abairamotumo ki nigbata pai agbata na ga aYudo aboro rondo dunduko kuti Yesu ka imo ko;

⁶⁰ka i abi nga pai kuti ko ya, dungu adezire avura ye vurũ. Ono fuo ho agu yo ki ye ue,

⁶¹naya, “Gi kumba re aya wẽ, ‘Mi rengbe na gbarasa ga Mbori yekaru, ki dua ha berewe rame ki du biata.’ ”

⁶²Gbiamotumo ki ru ku ari, ki ya fu ko, “Mo akaraga nga pai fere te? Gini pai agi aboro agumba kuti ro re?”

⁶³Ono Yesu aongo aonga. Gbiamotumo ki ya fu ko, “Mi nazungadi ro ni rimo Mbori du ni ungako, mo yúgu he fu rani si ngia Kristo nga mo, nga Wiri Mbori?”

⁶⁴Yesu ki ya fu ko, “A si mo agumba ha re. Ono ya mi foro, fuo gi rago re oni abi Wiri boro ko sungu pati kobe tandu, niye rogo mai ngbangbaturũ yo.”

⁶⁵Gbiamotumo ki ta sira gako aroko, niya, “Ko nagberã ngbako yo. Gini pai ani akpi nyemu aboro gumba ha kuti ko berewe? Oni gi gberã ngbako yo awere.

⁶⁶Oni ya wãi tigaoni?” I ki ta karaga ha niya, “Kpi ko ngba.”

⁶⁷I ki nisukudi kpakpuko nituturã ko. Akura yo ki nita ko ni kpabeyo,

⁶⁸ki ya, “Kristo nga mo, mo gumba nga ha fu rani! Da du nata ro?”

⁶⁹Were Petero nasungu ti mburu bambu. De pangbadimo ki ta ye fuo ko, niya, “Oni nidu a na gu boro Gariraya nga Yesu.”

⁷⁰Ono ko ki ti kangu he ati barangba yo dũ, ki ya, “Mi aina nga gu pai mo agumba ha te.”

⁷¹Ho ko akuru ni ku ngbadimo, kura de pangbadimo ki bi ko ki niya fu agu yo nadu ho, “Gi kumba re nidu a na gu boro Nazareta nga Yesu.”

⁷²Ko ki ti kangu he ati berewe, ki zunga he, ki ya, “Mi aina nga gu kumba te re.”

⁷³Fuo ho ngbutuko agu yo naarundu ho ki ta ye fuo Petero niya, “Mo nidu dagba yo a ni rengo; bambiko furaro kusi he.”

⁷⁴Ko ki tona sarawa tiko nyanyaki ki nizunga he, niya, “Mi aina nga gu kumba te re.” Bakondo ki kua akua ni ba sa.

⁷⁵Petero ki tingidi gu pai Yesu agumba, wa ko aya, “Mo aóra rimore aora mbata bakondo nikakua bara biata.” Ko ki kuru, ki nikpari akpara gbe ni nunga.