Read zande Matayo 27 Bible Online

Matayo 27 - zande bible

Matayo 27

¹Were ho wiso ada ni, abairamotumo na ga aYudo abaakumba ki nigumba rondo ka imo Yesu.

²I ki vo ko ki ndu na ko ki fu ko ku be Pirato nga bazogo.

³Were Yuda, gu ko nakusi Yesu, ho ko abi he ni ya i gbarasi ngbanga fu ko, ko ki birĩ tiko, ki gasi gu marã feda 30 fu abairamotumo na ga aYudo abaakumba,

⁴ki ya, “Mi ingi pai wa kusi mi kure ruru boro.” Ono i ki ya, “Sa gaani na gu? ga pai dũ ti ni.”

⁵Ko ki ba gu marã feda ku yekaru yo, ki guari yo; ki ndu ki asi tiko.

⁶Abairamotumo ki di gu marã feda re, ki ya, “Ru nga maa ra ku rogo bafumarã te, bambiko marã geno kure nga ami.”

⁷I ki saki he ki ngbe gu ati nga ga bameakoro tipa kpisida kangba agu aboro rogo adu nga ni aYudo ya.

⁸Si du i aniya ti ni ti gu ati re, Ati kure, dati gi rago re.

⁹Gu pai ki du ni digisidigisi he Yeremaya agumba nga nebi, naaya, “I arogo gu marã feda 30 nga genoko wa i aringbisi he, nga gu ko agu yo aringbisi genoko dagba awiri aYisaraere;

¹⁰ki fu ra tipa gu ati nga ga bameakoro, wa Gbia agumba ha fere.”

¹¹Were Yesu ki ru barangba bazogo; bazogo ki sana ko, ki ya, “Bakindo aYudo nga mo?” Yesu ki ya fu ko, “A si mo agumba ha re.”

¹²Ho abairamotumo akiti ngbanga ko ni na ga aYudo abaakumba, ko akaraga nga pai te.

¹³Pirato ki ya fu ko. “Mo agia nga gu dungu pai i adarã ro Ii ni te re?”

¹⁴Ka ko akaraga nga pai fu ko wa sa a ya: wa si adu were si airiwo airiwo ti bazogo gbe.

¹⁵Were rago pumbo sino bazogo naningia kusa kisikisi boro sa fu rimbasa, gu ni i anakpi nyemu ni.

¹⁶Ni gu rago re i adu na baworimo kisikisi boro, rimoko nangia Baraba.

¹⁷Ho i adungura tiyo ni tie, Pirato ki ya fu yo, “Da oni akpi nyemu mi kusi ni fu roni? Watadu Baraba, na Yesu du rimoko nga Kristo?”

¹⁸Ko aini he ya i afu Yesu koyo du ko ni mbiko kpi yo ko.

¹⁹Wa ko asungu auru mbata sapangbanga, diako ki kedi pai fu ko, ki ya, “Mo zogo bero ti gu ruru kumba re: bambiko dungu apai mangi re areme musumo yo mbiko ko.”

²⁰Were abaira motumo na ga aYudo abaakumba i ki zungadi rimbasa aboro i sana ko tipa Baraba, ki imi Yesu.

²¹Ono bazogo ki karaga ha ki ya fu yo, “Dagba yo ue gini ni oni akpi nyemu mi kusi ni fu roni?” I ki ya, “Baraba.”

²²Pirato ki ya fu yo, “Gine mi ka manga fu Yesu du rimoko nga Kristo” I ki mongo ya, “I wági ko awaga.”

²³Ko ki ya, “Tipagine, gini gbegberẽpai mangi ko?” Ono i ki ta paa ku ari bakere, niya, “I wági ko awaga.”

²⁴Were ho Pirato abi he ni, ya ko adia nga be yo te, ono si wa gbarakagbaraka pai nikadu, ko ki di ime, ki zundu beko ku bangiri rimbasa, niya, “Kure gi ruru boro adu nga ri re te re; oni bi he.”

²⁵Aboro ki karaga ha dunduko ki ya, “Kureko du ku ri rani na ku ri awirani.”

²⁶Ko ki kusi Baraba fu yo, ono ko ki ta Yesu ki fu ko i wagi ko.

²⁷Ga bazogo abanzengere ki di Yesu ku rogo gu kikii vuru bambu nga ga abazogo, ki dungura rikayo dunduko ku pati ko.

²⁸I ki uru gako remu, ki ukadi ko ni ngungungu remu.

²⁹I ki kãi kpakpari kiwe ki moi he ku riko yo, ki moi nganzi ku kumbabeko yo; i ki kuku barangba ko, ki sawia ko, niya, “Ako Bakindo aYudo!”

³⁰I ki nisukudi ko, ki di nganzi ki nita ko ti riko.

³¹Ho i asawia ko ni, i ki uru gu remu ti ko re, ki ukadi ko ni gako remu, ki ndu na ko ka waga ko.

³²Ho i akuru ni, i ki bi boro Kurene, rimoko angia Simona: i ki sosodi ko i ndu na ko, ko tindi gako wagiwagi ngua.

³³Ho i ada ni ku rogo gu ba nga Gorogota, (si wa ka i ya, Bamemeri,)

³⁴i ki fu imekakue fu ko ni kodikodi he na kakai he. Ho ko aia ha ni, ka ko ambira nga ha ya.

³⁵Ho i awagi ko ni, i ki ta kparaka gako remu dagba yo, niba ake ti ni.

³⁶I ki nisungu ka ngana ko.

³⁷I ki moi gu pai ba riko i akiti ngbanga ko kuti ni, ni keke he, nga, “Gi ko re nga Yesu bakindo aYudo.”

³⁸I ki wagi abatuka pati ko ue, gu ni ki du ku kumbabeko yo, gu ni ki du ku gareko yo.

³⁹Agu yo nasusa i ki ta sawia ko nipikipo riyo,

⁴⁰ki niya, “Mo nagbarasa yekaru ki dua ha ramehe ki du biata, mo bátasi tiro! Ka ngia Wiri Mbori nga mo mo zórõ ti wagiwagi ngua!”

⁴¹Abairamotumo ki nisawia ko na abakeapai na ga aYudo abaakumba kina wo, ki ya,

⁴²“Ko abatasi kura aboro; ka ko batasi nga tiko te! Ko nga Bakindo aYisaraere; ko zórõ ti wagiwagi ngua awere, ani ki idi pa ko!

⁴³Ko fu tiko ku be Mbori; ka Mbori kpi nyemu ko ko bátasi ko awere; bambiko ko aya, ‘Mi nga Wiri Mbori.’ ”

⁴⁴Agu abatuka a i awagi ko na yo i ki mongo nisenge ko kina wo.

⁴⁵Were ti bebere uru, bitimo ki ti ati auru kpotosende dunduko kina kuti saa biata.

⁴⁶Ho si adu ni wa ka saa biata du Yesu ki poi ku ari ni bakere fugo, niya, “Eroi, Eroi, rama sabakusani?” si wa ka i ya, “Gi Mbori, gi Mbori, guari mo ti re sa gine?”

⁴⁷Agu yo narundu ho, ho i agi he ni, i ki ya, “Gi kumba re ko nayamba Eriya.”

⁴⁸Ni ba sa gu ni sa dagba yo ki nioro ki ta dia fakayofakayo he ki nimogo ho ku rogo kakai imekakue, ki moi he ku ngba nganzi yo, ki fu he fu ko ko mbiri he.

⁴⁹Akura yo ki ya, “Oni rú nga, ani bi nga si ngia Eriya ayé ka batasa ko.”

⁵⁰Yesu ki poi berewe ku ari ni bakere fugo, ki fu toroko.

⁵¹Oni ngére, gu remu nadu yekaru yo si ki siri rogo ue, si ki tona ari yo ka sira ku sande. Bazigizo ki wo ti sende; ambia ki nikua;

⁵²amurã ki za. I ki zingisi kangba ga Mbori aboro ni dungu yo nga agu yo naaima ti ni rame;

⁵³wa i akuru rogo amurã yo fuo zinga ko be kpio i ki nirimi ku rogo ziazia bakporo dungu aboro ki bi yo.

⁵⁴Were barukuri aboro 100, na agu yo nadu na ko nisungudi Yesu, ho i abi gu bazigizo ni re, na agu apai namangi, i ki nigunde agunde gbe, ki ya, “Wiri Mbori nga ko ni rengo.”

⁵⁵Dungu ade nadu ho nga agu yo naapeka Yesu Gariraya yo, nimangi pa ko; i ki ru tuturu ki ningere.

⁵⁶Maria Magadara na Maria nga na aYakoba na Yose, na na awiri Zebedayo i ki du dagba yo.

⁵⁷Ho nyemu ada ni, Kumukokumuko kumba ki niye Arimataya yo, rimoko nangia Yosefa, ko nadu ni ga Yesu bawiriki.

⁵⁸Gi kumba re ko andu koyo du Pirato ni, ki sana ko tipa kangba Yesu, Pirato ki ya i fu he fu ko.

⁵⁹Yosefa ki di kangba, ki kãi he na gigiri remu,

⁶⁰ki pigi he ku rogo gako vovo murã nga gege mbia nga gu ko age he. Ko ki wirigi bakere mbia kuti ngbadimo murã, ki niguari.

⁶¹Maria Magadara nadu ho, na gu kura Maria, i nasungu pati murã mbembedi.

⁶²Were ho rago agiri ni, nga gu uru naadu fuo rago Mbakadaahe, abairamotumo ki dungura tiyo na aFarusi koyo du Pirato ni,

⁶³ki ya, “Gbia, ani tingidi he wa gu boro biriki aya re, ho ko adu ni ni ungako, ‘Fuo uru biata mi ki zingi berewe’

⁶⁴Were mo gúmba ha tie abanzengere banda murã ni kisikisi he nyanyaki dati biata uru, abawiriki ka ye ka dia kangbako, ki ya fu aboro, ‘Ko zingi be kpio.’ Gu zire nikadu kusa si ka susa gu naadu mbata.”

⁶⁵Pirato ki ya fu yo, “Abamoirago du be roni, oni ndú, oni kísi he nyanyaki wa rengbe omeroni na ni.”

⁶⁶Si du i andu ti ni, ki kisi murã nyanyaki, i ki dika he ti mbia si du ni dezirehe, abamoirago ki du na yo.