Read zande Matayo 28 Bible Online

Matayo 28 - zande bible

Matayo 28

¹Were ho rago sabiti ambedi ka nyasa ni, ho rago aye ka gira ni ti gu bambata uru nga ga poso, aMaria Magadara ki ye na gu kura Maria ka bi murã.

²Oni ngére, bakere bazigizo ki du, bambiko ga Gbia maraika azorõ ngbangbaturũ yo, ki ye ki wirigi mbia ti ngbadimo, ki sungu auru he.

³Ngbanyako ki du wa we gumba, gako remu ki du adu vuvuru wa morogumba.

⁴Abamoirago ki nikio akio be gunde ko, i ki du wa kangba aboro.

⁵Maraika ki karaga ha ki ya fu ade, “Ka oni gúnde nga ya; bambiko mi ini ya oni nagbata Yesu gu ko i awagi ko.

⁶Ko etere; bambiko ko zingi, wa ko agumba ha. Oni yé, ki bi ho Gbia api ni.

⁷Oni ki ndu ni ipo ka gumba ha fu gako abawiriki ya, ko zingi be kpio. Oni ngére ko nandu mbata fu roni ku Gariraya yo; yo oni ka bi ko ni, oni ngere, mi gumba ha fu roni.”

⁸I ki guari ni ipo pati murã na gunde na bakere ngbarago ka gumba gu pai re fu abawiriki.

⁹Oni ngére, Yesu ki gbia yo, ki ya, “Oni kina ho?” I ki ye, ki zi nduko, ki irisi ko.

¹⁰Yesu ki ya fu yo, “Ka oni gúnde nga ya; oni ndú ki gumba ha fu awirinami i ndu ku Gariraya yo, i abí re yo.”

¹¹Were wa i andu, oni ngére, bete abamoirago ki ye ku bakporo yo, ki gumba agu apai namangi dunduko fu abairamotumo.

¹²Ho i adungura tiyo ni na ga aYudo abaakumba, ki nisaki he, i ki ta fu bakere marã fu abanzengere,

¹³niya, “Oni gúmba ha ya, ‘Gako abawiriki aye yuru, ki dĩ ko adĩ ku sa yo, wa ani adu na rame.’

¹⁴Ka gi pai da ku tu bazogo yo re, ani azúngadi ko ki di he ri roni.”

¹⁵Si du i arogo marã ti ni, ki mangi wa i ayugu he fu yo. Gi pai re ki gbandaka agbandaka dagba aYudo daku awere.

¹⁶Ono agu abawiriki nadu bawe na sa i ki ndu ku Gariraya yo, ku pati gu bagangara Yesu agumba pa ha fu yo.

¹⁷Ho i abi ko ni, i ki niirisi ko, ono bete yo ki nisaki pa ko.

¹⁸Yesu ki ye koyo du yo ni ki gumba pai fu yo, ki ya, “I asia pa ahe fere dunduko ku ngbangbaturũ yo na ku sende no.

¹⁹Oni ndú tie, ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na Wiri na Ziazia Toro;

²⁰ki nirugu yo a i nika kuti agu apai dunduko mi arugu roni kuti ni. Oni ngere, mi na oni ti arago du, ki da ti digida zegino.”