Read zande Matayo 3 Bible Online

Matayo 3 - zande bible

Matayo 3

¹Ni gu rago re Yoane Babapatiza ata ye nitungusi pai ngbakungba yo Yuda yo,

²ki ya, Oni sá gaoni berã: bambiko gu ngbi nga ga ngbangbaturũ si nambeda.

³Bambiko ko du re nga gu ko Yesaya agumba pa ko nga nebi niya, “Fugo boro napaa ngbakungba yo, ya Oni mbákadi ga Gbia gene, Oni rúrugu gako agene.”

⁴Were Yoane aukadi mange kameri, na giri dimose nga kpoto. Gako riahe nangia ayere na anyege nvuo.

⁵Aboro ki kuru Yerusarema yo koyo du ko ni, na Yuda yo dunduko, na rogo gu ringara dunduko du kirikiri pati Yaradene;

⁶ko ki bapatizi yo rogo gu di nga Yaradene, i nikusi gayo ingaapai.

⁷Ono ho ko abi dungu aFarusi ni, i niye sa gako bapatiza na aSadoke, ko ki ya fu yo, “Oni nga awiri awo, da niyugu gu pai fu roni nga oni oro be gu zinga nikaye?

⁸Oni zúku rinde rengbe na saberã,

⁹ka oni bérẽ nga ha ku kpotoroni yo, ki ya ‘Ani du na barani nga Abarayama’ ya; bambiko ya mi fu roni wẽ, ka Mbori sa agi ambia asa re ni awiri Abarayama.

¹⁰Awere i moi mangua ti tarã angua: were i ade agu angua ade dunduko azu nga wene zuzuhe ya, ki bafu he ku we yo.

¹¹“Mi nabapatizi roni ni ime tipa saberã, ono gu ko nikaye fuo re ko nga bahe ti re, ka mi tindi nga gako rakata te. Ko abapatizi roni ni Ziazia Toro na we.

¹²Gako úigita ahe du beko, ko agírisa gako bataka ahe; ko ki ndukudi gako zendeahe ku rogo gako gbamu, ono umuhe ko ka zo ho ni gu we ka abisa nga ya.”

¹³Yesu ki ye Gariraya yo ku Yaradene yo koyo du Yoane ni, ko bapatizi ko.

¹⁴Ono Yoane akpi nyemu ka ka na ni be ko, ki ya, “Mo niye fuo re mi bapatizi ro, wa du mo ka bapatizi re?”

¹⁵Ono Yesu ki ta karaga ha niya fu ko, “Mo ídi he aida awere; bambiko si ngba ka digisa ruruapai dunduko.” Ko ki idi he aida fu ko.

¹⁶Yesu, ho i abapatizi ko ni, ko ki guari ime yo ni ba sa. Ngbangbaturũ ki za fu ko, ko ki bi ga Mbori Ziazia Toro nazorã wa mbipo ki ye ku ri ko;

¹⁷oni ngére, fugo ki ta paa ngbangbaturũ yo, niya, “Wire du re, nyemuko namanga re, ngba ko ti re gbe.”