Read zande Matayo 4 Bible Online

Matayo 4 - zande bible

Matayo 4

¹Ziazia Toro ki ngbe ku mbata yo fu Yesu ku ngbakungba yo bakitingbanga asadi ko.

²Ho ko agina riahe ni tipa uru 40 na yuru 40 a, gomoro ki nimangi ko.

³Iraasada ki ye ki ya fu ko, “Si ngia Wiri Mbori nga mo, mo gúmba ha fu agi ambia re si sa tihe ni kpokuta.”

⁴Ono Yesu ki karaga ha ki ya, “Si ni keke he ya, ‘Boro anye nga ni ungani mbiko kina riahe te, ono mbiko agu apai dunduko naye ngba Mbori yo.’ ”

⁵Bakitingbanga ki ndu na ko ku rogo ziazia bakporo yo; ko ki moi ko ri ngbahõ yekaru,

⁶ki ya fu ko, “Si ngia Wiri Mbori nga mo, mo gíta ku sande; bambiko si ni keke he ya, ‘Ko arúga gako amaraika tipa ro,’ ‘I asóngoda ro ni beyo, mo ka fo nduro ti mbia.’ ”

⁷Yesu ki ya fu ko, “Si ni keke he berewe ya, ‘Ka mo ásadi nga Gbia nga gamo Mbori ya’ ”

⁸Bakitingbanga ki ndu na ko berewe ku ri bakere bagangara yo ki yugu angbi fu ko zegino dunduko, na gaha taarimo.

⁹Ko ki ya fu Yesu, “Ka mo ti sande ki irisi re, agi ahe dunduko re mi afú he foro.”

¹⁰Yesu ki ya fu ko, “Satana, mo gúari erẽ! bambiko si ni keke he ya, ‘Mo írisi Gbia nga gamo Mbori mo rá fu kina ko.’ ”

¹¹Bakitingbanga ki guari pati ko; oni ngére, amaraika ki ye ki mangi pa ko.

¹²Were ho Yesu agi he ni ya i zi Yoane, ko ki ndu ku Gariraya yo.

¹³Ko ki guari Nazareta yo, ki kuru ku Kaparanauma yo nadu pati baime, nambedi na Zeburuna na Nafatari: ki sungu yo:

¹⁴gu pai dũ ni digisidigisi he Yesaya agumba ha nga nebi, niya,

¹⁵“Gu ringara nga ga Zeburuna na gu ringara nga ga Nafatari, ku pati baime, mbiti Yaradene yo, Gariraya nga ga aGendiria

¹⁶agu aboro naasungu rogo bitimo i bi bakere imarago, na fu agu yo sungu rogo ringara na kirimo kpio, imarago ki ha fu yo.”

¹⁷Ti gu rago re Yesu atona tungusa pai, ki ya, “Oni sá gaoni berã; bambiko gu ngbi nga ga ngbangbaturũ si nambeda.”

¹⁸Wa ko ata pati baime nga Gariraya, ko abi awirina ue, Simona i aya ti ko Petero, na Andarea nga wirinako, i nizumudi pio ku baime yo; bambiko abaziatĩo nangia yo.

¹⁹Ko ki ya fu yo, “Oni yé fuo re, mi ki sa roni ni abaziaboro.”

²⁰I ki guari pati gayo apio ni ngarã ki nipeke ko.

²¹Ko ata guari yo ki bi kura awirina ue. Yakoba nga wiri Zebedayo na Yoane nga wirinako, i adu kurungba yo na bayo nga Zebedayo, ki nimbakadi gayo apio; ko ki yambu yo.

²²I ki guari ni ngarã pati bayo kurungba yo, ki nipeke ko.

²³Yesu ki ta ata rogo Gariraya yo kirikiri dunduko niyugu pai rogo gayo abambutiria, nitungusi pa gu wene pangbanga nga ga ngbi, nihusi ngbatunga akaza na awokote dunduko namanga aboro.

²⁴Pandeko ki gbandaka ku rogo Suria dunduko. Aboro ki ye na agu yo dunduko nadu na kaza fu ko, agu yo dunduko ngbatunga akaza azi yo na rungosi, agu yo adaimona aduaga kpotoyo yo, na agu yo nadu na imawirianya, na ngbaramoni; ko ki husi yo.

²⁵Bakere rimbasa ki peke ko Gariraya yo na Dekapori yo na Yerusarema yo na Yuda yo na mbiti Yaradene yo.