Read zande Matayo 6 Bible Online

Matayo 6 - zande bible

Matayo 6

¹“Oni bánda tironi ka oni mángi nga gaoni ruruapai ku bangiri aboro, i bi roni na ni ya; ka si du wo mosoro du nga fu roni be Baroni du ngbangbaturũ yo te.

²“Were ho mo ka fu ga gamaahe ni; ka mo vúdi nga ngbunga, wa airabinki namanga rogo abambutiria yo na rogo agene kporo, aboro tambua yo mbiko ho ya. Ya mi fu roni ni rengo, i aima dia gayo mosoro.

³Ono ho mo ka fu ga gamaahe ni, ka garebero aina nga gu pai kumbabero amanga ha ya:

⁴ga gamaahe du ni gbuko; Bamo nabi apai ni gbuko, ko nikafu mosoro foro.

⁵“Ho oni ka kpara ni, ka oni dú nga wa airabiriki ya; bambiko i nakpi nyemu ka ru ka kpara rogo abambutiria yo na ngboso agene, aboro bi yo. Ya mi fu roni ni rengo, i ima dia gayo mosoro.

⁶Ono mo, ho mo ka kpara ni, mo rími ku dimo yo, fuo kisa mo ngbadimo, mo ki kpari fu gu Bamo du rogo gbuko yo, gu Bamo nabi pai rogo gbuko ko nikafu mosoro foro.

⁷“Wa oni akpara ka oni kpári nga ni dogodi gu kpe ni ba sa sa wa aGendiria namanga ya; bambiko i naberã ha tigayo ya i agia fugoyo mbiko gumba ha ni badungu he.

⁸Were, ka oni dú nga wa yo ya; bambiko Baroni ini agu apai zingo ho amanga roni, mbata oni nikasana ko ti ni.

⁹Oni kpári wa gere tie: Barani du ngbangbaturũ yo, Ani írisi rimoro airisa.

¹⁰Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.

¹¹Mo fú gaani riahe fu rani areme;

¹²Mo vú rani ti gaani bape, Wa ani navu gaani aboro bape a;

¹³Ka mo ngbé nga fu rani ku mbata yo sa asada ya, Ono mo túka rani ti gbegberẽpai.

¹⁴Ka oni vu aboro ti gayo ingaapai, Baroni du ngbangbaturũ yo ko avú roni ti gaoni ingaapai.

¹⁵Ono ka oni avu nga aboro ti gayo ingaapai ya, Baroni avú nga roni ti gaoni ingaapai a te.

¹⁶“Were ho oni ka gina riahe ni a, ka oni dú nga wa airabiriki nayugo pa rungo ti kpakpuyo ya; bambiko i nagbarasa kpakpuyo, aboro bi yo ki ini ya i nagina riahe. Ya mi fu roni ni rengo, i aima dia gayo mosoro.

¹⁷Ono mo, ho mo ka gina riahe ni, mo mbédi riro, ki zundu kpakpuro;

¹⁸ka aboro bi nga ro ki ini ya mo nagina riahe ya, kina Bamo du rogo gbuko; Bamo nabi pai rogo gbuko yo, ko nikafu mosoro foro.

¹⁹“Ka oni dúngura nga ũkumuko ni gaoni zegino ya, no ayawe agbarasa ahe ni na gbegbe, no airadĩ akua bambu ni nidi ahe;

²⁰ono oni dúngura ũkumuko ni gaoni ku ngbangbaturũ yo; yo ayawe agbarasa nga ahe ni na gbegbe ya, yo airadĩ akua nga bambu ni nidĩ ahe ya.

²¹Bambiko bara ho du ga ũkumuko ni, ngbaduro du kina ku ho a.

²²“Ima boro nga kina bangirise. Were ka bangiro du ni ruru he, kpotoro yo ki hi be imarago dunduko.

²³Ono ka bangiro du ni iraira ha, kpotoro yo ki hi be bitimo. Were si ngia gu imarago du kpotoro yo si ni bitimo, na kii gu bitimo re!

²⁴“A nga boro sa ka ra fu abaira ue te; bambiko ni asóga gu ni sa, ki kpi nyemu gu ni; watadu ni aká kuti gu ni sa, ki payasi pa gu ni. Ka oni ata ra nga fu Mbori nira fu ũzegino a te.

²⁵“Were ya mi fu roni wẽ, ka oni wísigi nga pai tipa ungaroni ya, gine oni ka ri he, na gine oni ka mbira ha ya; na tipa kpotoroni ya, gine oni ka ukadi he ya. Unga asusa nga riahe te? kpotoboro asusa nga remu te?

²⁶Oni bi azire ari yo, ami aru nga ahe te, ami ake nga ahe a te, ka ami aiga nga ahe ku rogo agbamu yo ya; Baroni du ngbangbaturũ yo nariga ra. Genoroni asusa nga genora te?

²⁷Da dagba roni ka moi bagiza be sa ku ri gani sona ti wisiga pa ha?

²⁸Tipagine oni a wisiga pa roko ti ni? Oni bérẽ pa ranga ati yo, wa si asona; si amanga nga sunge te, si apaa nga aremu te;

²⁹ono ya mi fu roni wẽ, kina Soromo tigako na gako taarimo dú, i aukadi nga ko wa gu sa dagba gi te re.

³⁰Ono ka Mbori ukadi nvuo ati yo wa gere nga gu du ho areme, gba i ka ba ha ku we yo, ko aúkadi nga roni susi gi te re? Ako oni du na toni idapase.

³¹Ka oni wísigi nga pai ki ya, ‘Gine ani ka ri he?’ na, ‘Gine ani ka mbira ha?’ na, ‘Gini roko ani ka ukadi tirani na ni?’ ya.

³²Bambiko aGendiria nagbata agi ahe re dunduko; bambiko Baroni du ngbangbaturũ yo ini he ya oni nara mbiko agi ahe re dũ.

³³Ono oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni.

³⁴“Ka oni wísigi nga pai tie tipa gu pai nikadu gba ya; bambiko kinagba nikawisiga pai tipa ha ni sa ha. Gu gbegberẽpai nga ga gu rago kina ha rengbe tipa ha.