Read zande Matayo 7 Bible Online

Matayo 7 - zande bible

Matayo 7

¹“Ka oni sápu nga ngbanga boro ya, i ka sapa ngbanga roni a.

²Bambiko gu sapangbanga oni ka sapa ngbanga na ni, kina ha i ka sapa ngbanga roni na ni a; na gu moduka oni ka nduka he na ni, i andúka he na kina ha fu roni.

³Tipagine mo nabi gu toni he du rogo bangiri wirinamo ti ni, ono mo ata ruga nga tiro na gu bakere he du kina rogo bangiro te?

⁴Mo awira pa ya fu wirinamo wãi, ‘Mi dí gu toni he du bangiro yo;’ wa du gu bakere he re kina bangiro yo?

⁵Irabiriki nga mo, mo dí kina gu du bangiro yo mbata; bangiro ki ha mo nikadia gu he du bangiri wirinamo yo.

⁶“Ka oni fú nga gu he du ni ziazia ha fu aango ya, ka oni bá nga ambia fongo fu amukuru a ya, ami ka si he na ndura, ki sa tira ka yepa roni.

⁷“Oni sána he tipa he, i ki fu he fu roni; oni gbáta ha, oni ki bi he abi; oni ngóka ngbadimo, i ki uru he fu roni.

⁸Bambiko gu ni nasana he tipa he ni adia ha adia; gu ni nagbata he ni abi he abi; gu ni nangoka ngbadimo i aúra ha fu ni.

⁹Gini boro du dagba roni, ka wirini sana ni tipa riahe, ni ki fu mbia fu ni;

¹⁰ka ni sana ni berewe tipa tio ni ki fu wo fu ni?

¹¹Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama wene ahe fu agu yo nakpara fu ko te re?

¹²Were agu apai dunduko oni akpi nyemu aboro nimangi he fu roni, oni nimángi kina ha fu yo a; bambiko gi nga rugute re na sangba anebi.

¹³“Oni rimi rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo.

¹⁴Bambiko gu ngbadimo na gu gene nangbe koyo du unga ni, si du ni pangipangi he, nifitikiri he, aboro nabi he ni kina umba yo.

¹⁵“Oni bánda tironi be airazire anebi, naye fuo roni na kpoto akandoro, ono kpotoyo yo du wa awaru nari ngbara.

¹⁶Oni aína yo ti zuzuyo. Ka boro kati kakue ti kiwe na vurumo ti ngbangbari?

¹⁷Kina wo wene ngua nazu wene rinde; ono gbegberẽ ngua nazu gbegberẽ rinde.

¹⁸Ka wene ngua zu nga gbegberẽ rinde te, ka gbegberẽ ngua zu nga wene rinde te.

¹⁹Agu angua dunduko azu nga wene rinde ya, i nidewe he adewa ki bafu he ku we yo.

²⁰Were, oni aína yo ti zuzuyo.

²¹“Agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo.

²²Dungu aboro nikaya fere ni gu rago re wẽ, ‘Gbia, Gbia, ani afuga nga pai ni rimoro, te? Ani ado nga adaimona ni rimoro, te? Ani amanga nga agu apai du na tandu ni rimoro te?’

²³Ono mi akúsa ha fu yo ki ya, ‘Mi aína nga roni wa sa te; oni gúari pati re, amangi irairapai.’

²⁴“Were gu ni nagia gi gimi apai re, ki mangi he, ni wiri gu boro tatamana nadua gani bambu auru mbia;

²⁵mai ki na yasika, ime ki fu, wege ki ya ki zigizo gu bambu re; ono ka si ati nga ya, bambiko ni adua ha ri mbia.

²⁶Ono gu ni nagia gi gimi apai re, ka ni amanga nga ha ya, ni wiri mumungo boro nadua gani bambu auru ngume;

²⁷mai ki na yasika, ime ki fu, wege ki ya ki zigizo gu bambu re; si ki ti; tigoho ki du ni bakere he gbe.”

²⁸Si ki ta du wa gere, ho Yesu anyasi agi apai ni re, gako yugopai airiwo ti arimbasa;

²⁹bambiko ko ayugu pai fu yo wa gu boro du na tandu, wa abakeapai te.