Read zande Matayo 8 Bible Online

Matayo 8 - zande bible

Matayo 8

¹Ho Yesu azorõ ni ri bagangara yo, dungu rimbasa ki nipeke ko.

²Oni ngere, boro ngbataka ki ta ye fuo ko niirisi ko, niya, “Gbia, ka mo kpi nyemu he, mo rengbe arengba ka husa re,”

³ko ki ta tãa beko nizadi ko, ki ya, “Mi nakpi nyemu he; mo hú.” Ni ba sa gako ngbataka ki go ti ko.

⁴Yesu ki ya fu ko, “Mo bi, ka mo gumba nga ha fu boro wa sa ya; mo ndú ga nduge, ki yugu tiro fu boromotumo, ki gamu gu rúhe Mose agumba paha, si yugu pai fu yo.”

⁵Ho ko ada ni Kaparanauma yo, gu barukuri aboro 100 ki ye koyo du ko ni, ki zúngadi ko;

⁶ki ya, “Gbia, gi moyambu pi auru ba na kaza be ngbaramoni, si narungosi ko nyanyaki gbe.”

⁷Ko ki ya fu ko, “Mi ayé ka husa ko.”

⁸Barukuri aboro 100 ki karaga ha ki ya, “Gbia, mi are nga na ye mo ku tii gi bambu yo te; ono mo gúmba kina furaro gi moyambu ki bati.

⁹Bambiko zogozogo boro nga mi a, mi ki du fu abanzengere ku mbata yo. Ka mi ya fu gu ko sa, ‘Mo ndú,’ ko ki ndu andu; mi ki ya fu kura ko, ‘Mo yé,’ ko ki ye; mi ki ya fu gi moyambu, ‘Mo mángi gere,’ ko ki mangi he.”

¹⁰Ho Yesu agi he ni, si ki iriwo airiwo ti ko, ko ki ya fu agu yo napeka ko, “Mi nagumba ha fu roni ni rengo, mi abi nga idapase wa gere mbata te, oó, dagba aYisaraere yo a te.

¹¹Ya mi fu roni, dungu aboro nikaguari uroyo na dioyo ki sungu na Abarayama, na Yisaka, na Yakoba; rogo gu ngbi nga ga ngbangbaturũ;

¹²ono awiri ngbi i abáfa yo abafa ku rogo gu bitimo du zegi yo; yo kpe ka du ni na ri ngba rinde.”

¹³Yesu ki ya fu barukuri aboro 100, “Mo ndú ga nduge; bambiko wa idi mo pa ha kina wo du he foro.” Were moyambu ki bati ti kina gu saa re.

¹⁴Ho Yesu arimi ni ku rogo ga Petero bambu, ko ki bi nagbioko wa ri api auru ba be kaza, kpotori afaa be he.

¹⁵Ko ki zadi beri, faa kpotori ki go ti ri; ri ki guari ki mangi pako.

¹⁶Ho nyemu ada ni, i ki ye na dungu aboro adaimona azi yo; ko ki dandi atoro ni furako, ko ki husi agu yo dunduko na kaza.

¹⁷Were gu pai ki da nebi agumba ha nga Yesaya ki ya, “Kina ko nadi gaani aima, ki tindi gaani akaza.”

¹⁸Were ho Yesu abi dungu rimbasa ni pati ko kirikiri, ko ki rugu yo i si ku mbiti yo.

¹⁹Were bakeapai ki ta ye niya fu ko, “Bayugupai, mi apéka ro rogo arago dunduko yo mo ka ta ni.”

²⁰Yesu ki ya fu ko, “Ayaro be anya, agu azire du ari yo bambu be ra; ono Wiri boro adu nga ba be ko ka maa riko ku auru he te.”

²¹Gu kura boro dagba gako abawiriki ki ya fu ko, “Gbia, mo ídi he fere mi ndu ka kpisida buba mbata.”

²²Ono Yesu ki ya fu ko, “Mo péke re; mo he kangba aboro i kpisidi gayo kangba aboro.”

²³Were ho ko arimi ni ku kurungba yo, gako abawiriki ki nipeke ko.

²⁴Oni ngére, bakere bayuge ki niya bangiri baime, sungburasungbura baime ki niukaga aukaga ku kurungba yo; ono ko adu na rame.

²⁵Gako abawiriki ki ta ye fuo ko, nizingisi ko, niya, “Gbia, mo bátasi rani; ani nakpi.”

²⁶Ko ki ya fu yo, “Tipagine oni agunde ti ni? Ako oni du na toni idapase.” Ko ki guari ki za yuge na baime; si ki ru za dunduko.

²⁷Si ki niiriwo airiwo ti agu aboro re, i ki ya, “Ngbatunga gini boro nga gi ni re, yuge agia sangbani na baime?”

²⁸Ho ko asi ni ku mbiti yo ku rogo gu ringara nga ga aGadara, aboro ki gbia ko ue nadu na adaimona ti yo, ki kuru dagba amurã yo, ni ẽreẽre yo gbe, ka si adu nga wa ka boro susi ngba gu gene re wa sa ya.

²⁹Oni ngére, i ki kpari, ki ya, “Sa gaani na mo, mo nga Wiri Mbori? Ye mo kono ka rungosi rani mbata ragoho nikada?”

³⁰Were rimbasa amukuru adu yo tuturu ti yo ki niriki.

³¹Adaimona ki zungadi ko, ki ya, “Ka mo do rani, mo kédi rani ku vuru rimbasa amukuru yo.”

³²Ko ki ya fu ra, “Oni ndú.” Were ami ki kuru ki rimi ku vuru amukuru yo; oni ngére, rimbasara ki gbidi dunduko ka ora ku baime yo, ki kpiki ime yo.

³³Ababandara ki oro ki rimi ku bakporo yo, ki gumba pa ha dunduko, na agu apai namangi fu agu yo adaimona azi yo.

³⁴Oni ngére, aboro gu bakporo re dunduko i ki kuru ka gbia Yesu; ho i abi ko ni, i ki zungadi ko ko guari rogo gayo ringara.