Read zande Matayo 9 Bible Online

Matayo 9 - zande bible

Matayo 9

¹Yesu ki rimi ku kurungba yo, ki si ku mbiti yo, ki da rogo gako bakporo.

²Oni ngére, i ki ye na kumba nakaza be ngbaramoni, ko ki pi auru ba. Yesu ata bi gayo idapase niya fu gu ko nadu na ngbaramoni, “Gude, mo wása; i vu ro ti ga ingaapai.”

³Oni ngere, agu yo dagba abakeapai ki berẽ he ku kpotoyo yo ya, “Gi kumba re nagberã ngbako yo.”

⁴Yesu ki ta ina gayo berã niya fu yo, “Tipagine oni aberã gbegberẽpai ti ni ku kpotoroni yo?

⁵Gini pai ipi watadu ya, ‘I vu ro ti ga ingaapai’, na ya, ‘Mo gúari, ki nita’?

⁶Ono ka oni ini he ya Wiri boro rengbe omeko na vu boro ti ingaapai” ko ki ya fu gu ko nadu na ngbaramoni, “Mo gúari, ki di ga ira, ki ga ku kpuro yo.”

⁷Ko ki guari, ki ga ku kpuko yo.

⁸Ono ho rimbasa abi he ni, i ki gunde agunde, ki irisi Mbori, nga gu ko nafu ome fu aboro wa gere.

⁹Wa Yesu aguari yo ka susa, ko ki bi boro sa nga Matayo, ko sungu rogo gu ba i naafu marã ku ho ni; ko ki ya fu ko, “Mo nipeke re.” Ko ki guari ki nipeke ko.

¹⁰Si ki ta du wa gere, wa ko asungu ka ri riahe dimo yo, oni ngére, dungu abarogo marã ngbeti na aboro ingaapai ki ye ki sungu pati Yesu na gako abawiriki.

¹¹Ho aFarusi abi he ni, i ki ya fu ga Yesu abawiriki, “Tipagine gaoni Bayugupai ari riahe ti ni na abarogo marã ngbeti na aboro ingaapai?”

¹²Ho Yesu agi gi pai ni re, ko ki ya fu yo, “Agu aboro nyaki anyaka i aida nga na munganga te, ono kina agu yo du na kaza.

¹³Ono oni ndú ka wirika gi pai re, ‘Mi nakpi nyemu weneringise, motumo te.’ Bambiko mi aye nga ka yamba ruru aboro te, ono ingiingi yo.”

¹⁴Ga Yoane abawiriki ki ye fuo Yesu, ki ya fu ko, “Tipagine ani nagina riahe ti ni na aFarusi ti dungu rago, ono gamo abawiriki agina nga riahe te?”

¹⁵Yesu ki ya fu yo, “Aboro kporo diade ka i kpari wa du yo sa na gu ni di de? gu rago nikada ho i ka dia kumba ku de ni pati yo, i ki nigina riahe.

¹⁶A nga boro sa ka rungu vovo remu ti bangiri kuru remu te; bambiko gu i nirungu he na ni, si ki dura gu roko re bangirihe susi gu nadu mbata.

¹⁷Ka i uka nga vovo imekakue ku rogo kuru mangu imekakue a te; vuru mangu ka su, imekakue ki uka auka, mangu ki siri asira; ono i niuka vovo imekakue kina ku rogo vovo mangu, si ki mongo bati ue.”

¹⁸Wa Yesu agumba agi apai ni re fu yo, oni ngére gu bazogo ki ta ye, niirisi ko, niya, “Ka wire ima kpi awere nga de; ono mo yé ka maa bero auru ri, ri ki bati.”

¹⁹Yesu ki guari ki nipe ko, gako abawiriki ki mangi kina wo.

²⁰Oni ngére, de, kureri anaga garãha ki du bawe na ue, ri ki ye gii ko yo ki zadi ngba gako remu:

²¹bambiko ri aya ku kpotori yo, “Ka mi zadi kina gako remu, mi bati abata.”

²²Yesu ki birĩ tiko, ki ta bi ri niya, “Vungu, mo wása; ga idapase batasi ro.” Were de ki bati ni kina gu saa re.

²³Ho Yesu ada ni dimo ku gu bazogo yo re, abavudinganzi i nimangi gbarakagbaraka na rimbasa,

²⁴ko ki ya, “Oni rú nga; bambiko degude akpi nga te, ono ri nara ara.” I ki nimomu ko amoma nipayasi rimoko.

²⁵Ono ho i akusi rimbasa ni, ko ki rimi, ki zi ri ti beri; degude ki guari ku ari.

²⁶Pangbangaha ki gbandaka agbandaka ku rogo gu ringara dunduko re.

²⁷Wa Yesu asusi yo, airavurari ki nipeke ko ue, ki nikpari niya, “Mo ini pai fu rani, mo nga wiri Dawidi.”

²⁸Wa ko arimi ku dimo yo, agu airavurari ki ye fuo ko re; Yesu ki ya fu yo, “Oni idi pa ha ya mi rengbe na manga gere?” I ki ya fu ko, “Ii, Gbia.”

²⁹Ko ki ta zada bangiriyo, niya, “I mángi he fu roni wa du gaoni idapase.”

³⁰Bangiriyo ki ha. Yesu ki rugu yo nyanyaki ki ya, “Ka boro gi nga pa gi pai re wa sa ya.”

³¹Ono i ata kura nitona gbandaka gako pangbanga ku rogo gu rago dunduko re.

³²Ho i akuru ni, oni ngére, i ki ye na kumba koyo du Yesu ni, nadu na kisikisi ngbako, daimona ki du kpotoko yo.

³³Ho Yesu adandi daimona ni, gu kumba ki fura naadu na kisikisi ngbako; rimbasa aboro ki kigi akiga, ki ya, “I abi nga pai wa gere dagba aYisaraere mbata te.”

³⁴Ono aFarusi ki ya, “Ko nadanda adaimona vurube gbia adaimona.”

³⁵Yesu ki ta ata dagba abaakporo na akporo dunduko, ki niyugu pai rogo gayo abambutiria, ki nitungusi gu wene pangbanga nga ga ga Mbori ngbi, nihusi ngbatunga akaza na ngbatunga awokote dunduko.

³⁶Ono ho ko abi arimbasa ni, nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.

³⁷Ko ki ya fu gako abawiriki wẽ, “Zuzuhe ni bakere he ni rengo, ono abamangisunge ni kina umba yo.

³⁸Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.”