Read zande Marako 1 Bible Online

Marako 1 - zande bible

Marako 1

¹Gu bambata Wene Pangbanga nga ga Yesu Kristo, Wiri Mbori.

²Wa du he ni keke he ti gu kitabu nga ga Yesaya nga nebi ya, “Mo ngére, mi nakeda gi sunge mbata yo foro; ko ambakáda ga gene;

³fugo boro napaa ngbakungba yo ya: Oni mbákadi ga Gbia gene, oni rúrugu gako agene―”

⁴Yoane aye, gu ko naabapatizi aboro ngbakungba yo, ki nitungusi pa gu bapatiza nga ga rungo be ingaapai, Mbori gbandaka ha.

⁵Aboro ki kuru rogo ringara nga Yuda dunduko, na agu yo naadu Yerusarema yo, ka ndu koyo du ko ni; ko ki ta bapatizi yo rogo di nga Yaradene, i nikusi gayo ingaapai.

⁶Yoane aukadi mange kameri, na giri dimoko nga kpoto nya, ko ki niri ayere na anyege nvuo.

⁷Ko ki nitungusi pai ki va, “Gu ko nikaye fuo re ko nga bahe ti re, ka mi nugadi nga ka zaka giri gako rakata te.

⁸Mi abapatizi roni ni ime; ono ko abapatizi roni ni Ziazia Toro.”

⁹Si ada ni gu rago re ya Yesu aye Nazareta yo, Gariraya yo, Yoane ki bapatizi ko rogo di nga Yaradene.

¹⁰Ko ki ya guari ime yo, ki bi ngbangbaturũ abi ni ba sa, si naza, Ziazia Toro nizorõ wa mbipo ku ri ko.

¹¹Fugo ki poi ngbangbaturũ yo ya, “Mo nga Wire, nyemuro namanga re, ngba mo ti re gbe.”

¹²Ziazia Toro ki ndu na Yesu ku ngbakungba yo ni ba sa.

¹³Ko ki raki ku ngbakungba yo rame ki du 40, Satana niasadi ko, ko adu na anya, amaraika ki nimangi pa ko.

¹⁴Were fuo maa yo Yoane ku bambukisa yo, Yesu ki ta ye ku Gariraya yo nitungusi gu wene pangbanga nga ga Mbori.

¹⁵Ko ki ya, “Ragoho da, ga Mbori ngbi nikaye; oni sá gaoni berã, ki idi pa wene pangbanga.”

¹⁶Ko ki ta merã pati gu baime nga Gariraya, ko ki bi Simona na wirinako nga Andarea, i nizumudi pio atĩo ku ime yo; bambiko i adu ni abaziatĩo.

¹⁷Yesu ki ya fu yo, “Oni yé fuo re, mi asá roni ni abaziaboro.”

¹⁸I ki mbu gayo pio atĩo ni ba sa, i ki nipeke ko.

¹⁹Ho ko amerã ni toni, ko ki bi Yakoba wiri Zebedayo na Yoane nga wirinako, i adu kurungba yo a nitapa gayo pio atĩo.

²⁰Ko ki yambu yo ayamba ni ba sa, i ki guari pati bayo nga Zebedayo kurungba yo na avuruko, ki merẽ fuo ko.

²¹I ki ndu ku Kaparanauma yo, rago sabiti ko ki rimi arima ku bambutiria yo ni ba sa, ki yugu pai.

²²Gako yugopai ki niiriwo airiwo ti yo; bambiko ko ayugu he fu yo wa gu kumba du na tandu, wa abakeapai te.

²³Kumba adu bambutiria yo naadu na gbigbita toro ti ko; ko ki poi ku ari,

²⁴ki ya, “Gine ani amánga na mo Mo nga Yesu nga boro Nazareta? Mo ye ka gbarasa rani? Mi ini ro, mo nga gu Ziazia Ko nga ga Mbori Ko.”

²⁵Yesu ki za ru, ki ya, “Mo ongo, ki guari ti ko.”

²⁶Gbigbita toro ki ta guari ti ko nifu imawirianya fu ko nita wawa.

²⁷Si ki iriwo airiwo ti yo dũ; si ki ta du wa gere i ki nisana tiyo, ki ya, “Gine nga gere? Vovo pai dũ! Ko nagumba pai ni ome fu gbigbita atoro ami ki gi sangbako.”

²⁸Gako pangbanga ki gbandaka agbandaka ni ba sa ku rogo ringara Gariraya dunduko kirikiri.

²⁹Were, ho i akuru ni bambutiria yo i ki rimi ku rogo gu bambu nga ga Simona na ga Andarea; aYakoba na Yoane i agumba nindu na yo.

³⁰Were nagbio Simona napi auru ba be kaza kpotori afaa be he; i ki gumba pa ri agumba fu Yesu ni ba sa.

³¹Ko ki ye, ki zi ri ti beri, ki tumba ri ku ari; kaza ki he ri, ri ki mangi pa yo.

³²Nyemu ho uru ati ni, i ki niye na aboro kaza fuo ko dunduko, na agu yo adaimona azi yo.

³³Agu aboro nadu bakporo yo i ki tiria ku ngbadimo dũ.

³⁴Ko ki husi aboro naadu na ngbatunga akaza dũ, ki dandi dungu adaimona; ko ki za adaimona ti fugo, bambiko ami aini ko.

³⁵Pamanangba wiso ko ki guari, ki kuru ki ndu ku ngbakungba yo, ki kpari yo.

³⁶Simona na agu yo naadu na ko i ki ndu fuo Yesu.

³⁷I ki bi ko ki ya fu ko, “Aboro nagbata ro dunduko.”

³⁸Yesu ki ya fu yo, “Ani ndú ku rogo kura akporo, mi tungusi pai yo a; bambiko si du mi nikuru ti ni.”

³⁹Ko ki ta rima ku rogo gayo abambutiria Gariraya yo dú, nitungusi pai yo, nidandi adaimona.

⁴⁰Boro ngbataka ki ye koyo du ko ni, ki ta kpara fu ko, nikuku barangba ko, niya fu ko, “Ka mo kpi nyemu he, mo húsi re ahusa.”

⁴¹Rungoko ki nimangi Yesu amanga ko ki tãi beko ki zadi ko, ki ya fu ko, “Mi nakpi nyemu he; mo hú.”

⁴²Ngbataka ki go ago ti ko ni ba sa, ko ki hu.

⁴³Ko ki rugu ko nyanyaki, ki kedi ko akeda ku zegi yo ni ba sa;

⁴⁴ki ya fu ko, “Ka mo gúmba nga pai fu boro wa sa ya; ono mo gá, mo yúgu tiro fu boromotumo ki tumo wa mo nihu ni agu ahe Mose agumba paha, mbiko yugopai fu yo.”

⁴⁵Ono ko akuru ki ru pai ka gumba ha gbe ki nitaasi he, si ki ta du wa gere, ka si adu nga wa ka Yesu ndu ku kporo yo gbayaga ya. Ko adu kina nvuo yo; aboro ki ye koyo du ko ni rogo arago dunduko.