Read zande Marako 10 Bible Online

Marako 10 - zande bible

Marako 10

¹Yesu ki guari yo, ki ye ku ngbanda Yuda yo mbiti Yaradene yo: rimbasa aboro ki tiria koyo du ko ni berewe; ko ki yugu pai fu yo berewe, wa ko anayugo ho.

²AFarusi ki ye koyo du ko ni, ki sana ko, ki ya, “Ka boro he diani si ru aru?” I agumba ha ni asada ko.

³Ko ki karaga ha fu yo ki ya; “Gini pai Mose agumba fu roni?”

⁴I ki ya, “Mose aidi pa ke waraga kpara boro na diani, ki mbu ni.”

⁵Yesu ki ya fu yo, “Ko ake gi pai re fu roni mbiko nyaka ngbaduroni.

⁶‘Mbori amangi akumba na de,’ ho manga ahe aenge ni.

⁷‘Si du boro niguari ti ni pati bani na nani ki ka kuti diani;

⁸I ue ki du wa boro sa.’ Si du i nadu nga ti ni ue berewe ya, i ki du adu sa.

⁹Were gu Mbori akpamia re ka boro kpara nga ha ya.”

¹⁰Abawiriki ki sana ko berewe dimo yo ti gi pai re.

¹¹Ko ki ya fu yo, “Gu ni ka mbu diani, ki di kura de, ni mangi bari ki ingi pai kuti diani.

¹²Ka de mbu kumbari ni tiri ki di kura ni, ri mangi bari.”

¹³I ki ye na rukutu agude koyo du ko ni ya ko zazadi yo; abawiriki ki zingi fu yo.

¹⁴Ho Yesu aim he ni, si ki nigbere agberã ti ko, ko ki ya fu yo, “Oni hé rukutu agude i ye fuo re; ka oni káraga nga yo ya; bambiko i wa avuru ga Mbori ngbi.

¹⁵Ya mi fu roni ni rengo, ka boro adia nga ga Mbori ngbi wa toni gude ya, ni rimi nga koyo wa sa te.”

¹⁶Ko ki aka yo beko, ki moi beko auru yo, ki fu maku fu yo.

¹⁷Yesu ki ya ndu Ku gene yo, kumba ki yara koyo du ko ni, ki kuku barangba ko, ki sana ko, ki ya, “Wene Bayugupai, mi amanga wãi ka dia nyenye unga?”

¹⁸Yesu ki ya fu ko, “Tipagine ya mo ti re ti ni, Wene? A nga boro sa du ni wene ni te, kina Mbori sa.

¹⁹Mo ini pa rugute, ‘Ka mo ími nga boro ya, Ka mo rá nga na dia boro ya, Ka mo dĩ nga he ya, Ka mo gúmba nga zire ya, Ka mo mángi nga gbegberẽ fu boro ya, Mo írisi bamo na namo.’”

²⁰Ko ki ya fu ko, “Bayugupai, agi apai re dũ mi atona ha mi du ni gude.”

²¹Yesu ki ta bi ko, nikpi nyemu ko, ki ya fu ko, “Pai ho sa mo ata manga nga ha ya, mo ndú, mo bági agu ahe dunduko du be ro, ki gagamu he fu rungorungo aboro, mo akúmuko ngbangbaturũ vo; mo ki ye ki nipeke re.”

²²Ko ki nindukudi kpakpuko andukuda ti gu pai re, ki guari nirungo arungo bambiko ahe adu be ko gbe.

²³Yesu ki ngere kirikiri, ki ya fu gako abawiriki, “Kpakara rima ku rogo ga Mbori ngbi yo akpakara fu agu yo kumuko akumuko gbe!”

²⁴Gako pai ki niiriwo airiwo ti abawiriki gbe. Yesu ki karaga ha fu yo berewe, ki ya, “Agude na kpakara rima ku rogo ga Mbori ngbi yo fu agu yo nafu tiyo ku be ũkumuko!

²⁵Ka kameri kuru rogo yaro mbereke yo si ka ipi ti rima kumukokumuko boro ku rogo ga Mbori ngbi yo.”

²⁶Si ki ta iriwo airiwo ti yo bakere gbe, i ki niya fu ko, “Da ka bati tie?”

²⁷Yesu ki bi yo ki ya, “Ka si gasi aboro agasa, ono Mbori ti gu te; bambiko ka Mbori mangi apai amanga dunduko.”

²⁸Petero ki tuka ngbako ki ya fu ko, “Na wa ani ambu ahe dú, ki nipeke ro.”

²⁹Yesu ki ya, “Mi nagumba ha fu roni ni rengo, ka boro he gani bambu, na awirinani, na adawirini, na nani, na bani, na awirini, na gani aati, tipa re, na tipa wene pangbanga,

³⁰ni ka abambu du be ni na awirina, na adawiri, na ana, na awiri, na aati, na arungo, wa du rago re, ki susi gu naadu mbata bara 100; na nyenye unga rogo gu ngbi nikadu yo.

³¹Ono agu yo ni dungu yo du ku mbata yo i nikadu ku sa yo; agu yo du sa yo i ki du ku mbata yo.”

³²I ki du gene, nindu ku Yerusarema yo; Yesu ki ngbe ku mbata yo fu yo; si ki niiriwo airiwo ti yo; agu yo naapeka ko i ki nigunde agunde. Ko ki rogo agu yo nanidu bawe na ue ki tona gumba pa agu apai fu yo nikamanga ko,

³³ki ya, “Oni ngére, ani nandu ku Yerusarema yo; i afú Wiri boro fu abairamotumo na abakeapai; i asára ngbanga ko ko kpi, ki fu ko ku vurube aGendiria;

³⁴i asáwia ko, ki nisukudi ko, ki nitaki ko, ki imi ko; rame ki du biata ko ki zingi berewe.”

³⁵AYakoba na Yoane nga awiri Zebedayo, i ki mbedi ku pati Yesu, ki ya fu ko, “Bayugupai, ani nakpi nyemu mo mangi gu he amanga ani aye ka sana ro tipa ha.”

³⁶Ko ki ya fu yo, “Gine oni akpi nyemu mi mangi he fu roni?”

³⁷I ki ya fu ko, “Mo ídi gu pai fu rani nga, gu ni sungu ku kumbabero gu ni ki sungu ku garebero yo, rogo ga imarago.”

³⁸Yesu ki ya fu yo, “Oni aina nga gu he oni asana he tipa ha te. Ka oni mbiri he ti ngba gu inga mi nambira he ti ni? Ka i bapatizi roni ni gu bapatiza i nabapatizi re na ni?”

³⁹I ki ya fu ko, “Ani rengbe na ni.” Yesu ki ya fu yo, “Gu inga mi nambira he ti ngbaha oni ambira he ti ni; na gu bapatiza i nabapatizi re na ni i abapatizi roni na ni;

⁴⁰ono sunga ku kumbabere na garebere gi gamahe nga ha te; si fu agu yo mbakadi yo ho tipa yo.”

⁴¹Ho agu yo agi he ni nadu bawe si ki nigberẽ agberã ti yo tipa a Yakoba na Yoane.

⁴²Yesu ki yambu yo koyo du ko ni, ki ya fu yo, “Oni ini he ya agu yo nazoga aGendiria i namanga yo a wa i akpi nyemu he; gayo abanyaki ki nyakasi yo.

⁴³Ono si wo dagba roni te; gu ni nakpi nyemu ka du ni bahe dagba roni yo, ni adu ni gaoni moyambu;

⁴⁴na gu ni nakpi nyemu ka du ku mbata yo fu roni, ni adu ni gaoni kanga dunduko.

⁴⁵Bambiko Wiri boro ni rengo aye nga i nimangi pa ko te, ko naye ka manga pa aboro, ka tumo dungu yo ni ungako.”

⁴⁶I ki ye ku Yereo yo; wa ko aguari Yereo yo, na gako abawiriki na bakere rimbasa, wiri Timayo nga Batimayo, iravurari kangadu, naasungu pangba gene.

⁴⁷Ho ko agi he ni ya, Yesu du, nga boro Nazareta, ko ki tona paa ku ari ki ya, “Yesu, Mo, Wiri Dawidi, mo íni pai fere.”

⁴⁸Dungu aboro ki za ko ko ongo, ko ki poi ku ari si ki susi gu naadu mbata, ki ya, “Mo, Wiri Dawidi, mo íni pai fere.”

⁴⁹Yesu ki ru ki ya, “Oni yámbu ko.” I ki yambu gu iravurari re, ki ya fu ko, “Mo wása, ki guari, ko nayamba ro.”

⁵⁰Ko ki ba gako remu ku sa yo, ki mo ku ari, ki ye koyo du Yesu ni.

⁵¹Yesu ki sana ko, ki ya, “Gine mo akpi nyemu mi mangi he foro?” Iravurari ki ya fu ko, “Bayugupai, mi ngere.”

⁵²Yesu ki ya fu ko, “Mo gá, ga idapase batasi ro.” Ko ki ngere angera ni ba sa, ki nipe ko gene.