Read zande Marako 11 Bible Online

Marako 11 - zande bible

Marako 11

¹Ho i ambeda ni ku Yerusarema yo, ku Betefage yo na Betania yo, ku pati bagangara Aeraya, Yesu ki kedi gako abawiriki ue,

²ki ya fu yo, “Oni ndú ku rogo gu kporo du pati roni. Wa oni ka da yo, oni abí paranga dongi ni ba sa, i ata sunga nga auru ru mbata ya; oni ki zaki ru ki ye na u.

³Boro ya fu roni, ‘Oni namanga were tipagine?’ oni ki ya fu ni, ‘Gbia nakpi nyemu ru,’ ni ki kedi ru kono ni ba sa.”

⁴I ki ndu, ki bi paranga dongi ni vovo ru zegi pa ngbadimo, gene; i ki zaki ru.

⁵Agu yo naru ho i ki ya fu yo, “Gine oni amanga wa oni nazaka paranga dongi?”

⁶I ki gumba kina gu pai fu yo Yesu agumba fu yo. I ki he yo, i ndu.

⁷I ki ye na paranga dongi koyo du Yesu ni, ki ba gayo aremu auru ru; ko ki sungu auru ru.

⁸Agu yo ki gbaragi gayo aremu ni dungu yo gene; agu yo ki gbaragi kpe, i akafu ati.

⁹Agu yo naandu mbata yo, na agu yo naape ko, i ki ta paa ku ari niya, “Tambuahe! Mbori fu maku fu gu ko naye ni rimo Gbia!

¹⁰Mbori fu maku fu gu ngbi naye nga ga Dawidi nga barani! Tambuahe fu gu ko nga Bahe!”

¹¹Ko ki da Yerusarema yo, ku yekaru yo; ho ko angere ni kirikiri auru ahe dũ, ko ki ndu ku Betania yo bambiko nyemu nadu, na agu yo nanidu bawe na ue.

¹²Ni gu girarago i aguari ni Betania yo, gomoro ki nimangi Yesu amanga.

¹³Ko ki bi vurumo tururú na akpehe, ko ki ndu ka ngera yo si ngia zuzuhe ti ni; ho ko ada ni pati he, ko ki bi kina akpehe; bambiko regbo zu he ada nga te.

¹⁴Ko ki ya fu he. “Ka boro rí nga zuzuro berewe ya.” Gako abawiriki ki gi he.

¹⁵I ki ye ku Yerusarema yo; Yesu ki rimi ku yekaru yo ki tona bafa agu yo ku zegi yo nanababaga ahe, na agu yo nanangbeka ahe yekaru yo, ki vavagadi ga abaundaamarã ambisa, na agu ambata nga ga agu yo nanababaga ambipo.

¹⁶Ka ko aida nga fu boro ni tindi he yekaru yo wa sa ya.

¹⁷Ko ki yugu pai, ki ya fu yo, “Si ni keke he ya, ‘I aya ti gi bambu bambu kparakpe tipa rikaaboro dunduko,’ ono oni sa ha ni yaro abatuka.”

¹⁸Abairamotumo ki gi he na abakeapai ki ya i amanga wãi ka gbarasa ko; i agunde agunde ti ko, bambiko gako yugopai airiwo airiwo ti rimbasa dunduko.

¹⁹Ko ki niguari bakporo yo nyemu.

²⁰Wa i asusa wiso i ki bi gu vurumo re si naima uga ti tarãha.

²¹Petero ki tingidi he ki ya fu ko, “Bayugupai, mo bi! Gu vurumo mo abeka si du ni ugu he re.”

²²Yesu ki karaga ha ki ya fu yo, “Oni ídi pa Mbori.

²³Ya mi fu roni ni rengo, gu ni ka ya fu gi bagangara re, ‘Mo dúngura tiro ki ti ku baime yo’; ka ni asaka nga ha ku kpotoni yo ya, ono ni naberã gu pai ni agumba ya si adú ni rengo; si adu adu fu ni ni rengo.

²⁴Si du ya mi ti ni fu roni, agu ahe dunduko ka oni akpara nisana he tipa ha, oni ki idi aida ya i ima fu he fu roni si adú adu be roni.

²⁵Ho oni ka ru ni ka kpara, pai dũ bangironi kuti boro oni ki vu ni avu ti ni, Baroni du ngbangbaturũ yo ko vu roni avu ti gaoni ingaapai.

²⁶Ono ka oni avu nga ni ti ni ya, Baroni du ngbangbaturũ yo ko vu nga roni ti gaoni ingaapai te.”

²⁷I ki ye berewe ku Yerusarema yo; wa ko ata rogo yekaru yo, abairamotumo ki ye koyo du ko ni na abakeapai na ga aYudo abaakumba;

²⁸i ki ya fu ko, “Gini tandu mo amanga agi apai na ni re? Da asia pa manga agi apai re foro?”

²⁹Yesu ki ya fu yo, “Mi nikasana roni ti pai sa, ka oni karaga pai fere, mi nikagumba pa gu tandu fu roni mi amanga agi apai ti ni re.

³⁰Gu bapatiza nga ga Yoane, watadu si aye ngbangbaturũ yo na be aboro? Oni káraga ha fere.”

³¹I ki nisaki he dagba yo, niya, “Ka ani ya, ‘Si aye ngbangbaturũ yo’, ko ayá aya, ‘Tipagine oni aida nga pa ko ti ni ya?’

³²Ono ka ani ya, ‘Si aye be aboro’?” ― i gunde agunde ti aboro; bambiko aboro dunduko aya aya Yoane nga nebi ni rengo.

³³I ki karaga ha fu Yesu ki ya, “Ani aina nga ha te.” Yesu ki ya fu yo. “Mi agumba nga pa gu tandu fu roni mi amanga agi apai ti ni te re.”