Read zande Marako 12 Bible Online

Marako 12 - zande bible

Marako 12

¹Yesu ki tona gumba asanza fu yo, ki ya, “Boro nirú bakakue ati yo, ki gbegba pati he kirikiri, ki ge due ka pirã ha rogo yo, ki dua gbaraga, ki he he fu ababanda ati, ni ki ndu ku rogo kura ringara.

²Ho regbo kakue ada ni ni ki kedi moyambu koyo du ababanda ati ni ni rogo bete zuzuhe ati yo be ababanda ati.

³I ki zi ni ki ta ni ata, ki do ni ni ku beni.

⁴Ni ki kedi kura moyambu koyo du yo ni berewe; i ki hogi ni rini yo ki mangi ni amanga gbegberẽ gbe.

⁵Ni ki kedi kura ni; i ki imi ni aimo; na akura yo ni dungu yo; i ki ta ta agu yo, niimi agu yo.

⁶Gu ni naanye na ni sa, nga wirini, ni akpi nyemu ni gbe. Ni ki kedi ni ni yangara yo koyo du yo ni, niya, ‘I aírisa wire airisa.’

⁷Ono agu ababanda ati re i ki ya dagba yo, ‘Dikumbo du re; oni yé, ani ími ko, ũkumbo du ni gaani.’

⁸I ki zi ni, ki imi ni, ki ba ni ku sa yo ti ati bakakue.

⁹Iraati bakakue nimangi wãi? Ni niye ki gbarasi ababanda ati, ki fu ati fu agu yo.

¹⁰Oni ageda nga kina gi ziazia kekeapai te re ya, ‘Gu mbia abaduabambu nigindiga ha, si i nisa ha ni gu du ti tukpu he ri he;

¹¹gi pai re Gbia amangi he, si ki niiriwo airiwo hangirani?’ ”

¹²I ki asadi ka zia ko; i ki nigunde agunde be rimbasa; bambiko i aini ya ko nagumba gu sanza re kuti yo; i ki guari pati ko, ki mere.

¹³I ki kedi agu aFarusi na agu aErode koyo du ko ni, i zi ko ni fugo.

¹⁴Ho i aye ni, i ki ya fu ko, “Bayugupai, ani ini ro ya irarengo nga mo, mo agunde nga be aboro te; bambiko mo angba nga na aboro kuti pa kindigayo te, mo nayugo ga Mbori gene ayugo ni rengo. Ngba rũ he angba fu Kaisara?

¹⁵Watadu ani afu he, na ani afu nga he te, ani amanga wãi?” Ko ki niini gayo biriki aina, ki ya fu yo, “Tipagine oni aasada re ti ni? oni ye na rukutu marã feda fere mi bi ru.”

¹⁶I ki ye na u. Ko ki ya fu yo, “Kpia da du re, pa da ke yo ba ri he?” I ki ya fu ko, “Ga Kaisara du.”

¹⁷Yesu ki ya fu yo, “Agu ahe nga ga Kaisara oni nifú kina ha fu Kaisara, agu ahe nga ga Mbori oni nifú kina ha fu Mbori.” Gako pai ki niiriwo airiwo ti yo.

¹⁸ASadoke ki ye koyo du ko ni, nga agu yo naaya, zingabekpio ho te; i ki sana ko ki ya,

¹⁹“Bayugupai, Mose ake gu pai fu rani nga, ka wirina boro kpi, ki he diani sa no, ka wirini adu nga ho ya, wirinani ki di diani ka vunga ku ba ni.

²⁰Awirina adu ho saba; bambata yo ki di de, ki kpi, ka ko avunga nga ya;

²¹gu kura ko ki di ri ki kpi, ka ko avunga nga ya; biata yo ki du kina wo;

²²saba yo ki kpi, ka gu ni avunga nga wa sa ya. Gu de ki kpi re ni yangara yo.

²³Rago zingabekpio gini ni nikadia ri? bambiko i amongo rogo ri aroga a wa i adu saba.”

²⁴Yesu ki ya fu yo, “Oni ainga bambiko wa oni aina nga Ziazia Kekeapai, na ga Mbori tandu ya, te?

²⁵Bambiko ho i ka zinga ni be kpio, boro adía nga de te, i afú nga de ni du ni dia kumba te, i adú wa kina amaraika ngbangbaturũ yo.

²⁶Ono ga aboro, ya i azinga be kpio; oni ageda nga ha rogo ga Mose kitabu yo dagba agu apai nga ga zigidiri ngua, wa Mbori agumba ha fu ko, ki ya, ‘Mi nga ga Abarayama Mbori, nga ga Yisaka Mbori, nga ga Yakoba Mbori te’?

²⁷Ga kangba aboro Mbori nga ko te, ga unga aboro Mbori nga ko; oni nainga gbe.”

²⁸Bakeapai ki ye sa, ki gi payo wa i asana he dagba yo, ki ini ya ko akaraga ha fu yo wenengaĩ, ko ki sana ko ki ya, “Bakumba rugute nga gini gu?”

²⁹Yesu ki karaga ha ki ya, “Bakumba ha nga gere, ‘Mo gí he, Yisaraere, Gbia nga gaani Mbori, Gbia sa;

³⁰mo kpí nyemu Gbia nga ga Mbori kpotoro yo dunduko, na mbisimoro du, na ga berã dũ, na omero dũ.’

³¹Kura ha nga gere, nga, ‘Agu aboro ini mo yo dunduko mo nikpí nyemu yo wa mo akpi nyemu tiro.’ A nga kura rugute ho susi gi te re.”

³²Bakeapai ki ya fu ko, “Ii, Bayugupai, gumba mo ho ni rengo wenengaĩ ya ko sa;

³³kpi nyemu ko kpoto yo dũ, na berã dũ, a ome du, na kpi nyemu agu aboro ini ni yo dunduko wa ni akpi nyemu tini, si kii ti zozo ũmotumo na ũbuga dunduko.”

³⁴Ho Yesu agi he ni ko nigumba ha nzunzu, ko ki ya fu ko, “Turũ nga mo na ga Mbori ngbi te.” Fuo gure ka boro angarã nga ka sana ko ti pai wa sa ya.

³⁵Yesu ki karaga ha wa ko ayugo pai yekaru yo, ki ya, “Wiri abakeapai pa ya wãi wiri Dawidi nga Kristo?

³⁶Dawidi aya ni tiko sangba Ziazia Toro yo, ‘Gbia aya fu gi Gbia, Mo súngu ku kumbabere, daho mi ka maa avuraro ni tii nduro yo.’

³⁷Dawidi ni tiko ko aya ti ko, ‘Gbia;’ wiri ko pa du wãi ni wiriko?” Rimbasa aboro ki gi gako pai gbe.

³⁸Ko ki ya rogo gako yugopai, “Oni bánda tironi be abakeapai, agu yo nakpi nyemu ka ata na gbanga aremu, i nipoi kuti yo bangbeahe yo,

³⁹i nisusungu auru mbata irisa rogo abambutiria yo, nisusungu auru wene aba kporo apumbo yo.

⁴⁰Agu yo nita nyasa ga adekurugbo ahe, nikpari akpara gbe ni biriki; i ambusa yo ambusa bakere.”

⁴¹Ko ki sungu pati gu ba i naatumo ni amarã ku rogo, ki bi rimbasa aboro wa i aba amarã ku rogo gu ba i naatumo ni amarã ku rogo. Agu yo naakumuko ni dungu yo i ki niba ra aba koyo gbe.

⁴²Rungorungo dekurugbo ki ye ki ba rukutu marã sirigi ue koyo, akia nga pa ra ya.

⁴³Ko ki yambu gako abawiriki koyo du ko ni, ki ya fu yo, “Mi nagumba ha fu roni ni rengo, gi rungorungo dekurugbo re, ri ba ra kii ti agu yo dunduko ninaba ra ku rogo gu ba i naatumo ni amarã ku rogo.

⁴⁴Bambiko agu yo dunduko ninaba ra bakere i niba ra wa kumuko yo akumuko; ono ri niba ra aba dunduko koyo a wa ami adu be ri ni gari zingo, kina ra ningia gari he sa ni rengo.”