Read zande Marako 14 Bible Online

Marako 14 - zande bible

Marako 14

¹Were, rame adu ue pumbo susiri ki da na gu kpokuta adu nga na agbooro ti ni ya; abairamotumo ki ya na abakeapai i amanga wãi ka zia Yesu ni biriki, ka imo ko;

²bambiko i aya. “Ka i zí nga ko rago pumbo te, aboro ka zinga.”

³Wa ko adu Betania yo, dimo ku Simona yo nga boro ngbataka, wa ko asungu ka ri riahe, de ki ye na ndukura na nzeme, kii genoho akia gbe, ri ki kiti gorõ ndukura, ki uka nzeme ku ri Yesu.

⁴Agu aboro naadu ho agu yo ki nierẽ aerã dagba yo ki ya, “Tipagine i amisika gi nzeme ti ni re?

⁵Bambiko gi nzeme re ka i bagi he abaga rukutu marã feda du adu susi 300, i ki fuku ra fu rungorungo aboro.” I ki nigumba rimori.

⁶Yesu ki ya, “Oni hé ri; oni nafuda ri tipagine? ri mangi wene pai ti re.

⁷Bambiko rungorungo aboro du na oni dedede, ni gu rago oni ka nikpi nyemu ka ngba na yo oni aningba angba na yo; ono mi adú nga na oni dedede te.

⁸Ri mangi he, ringbisi kina omeri na ni. Ri nimbedi kpotore mbata sa kpisida re.

⁹Ya mi fu roni ni rengo, rogo agu arago i ka tungusa wene pangbanga ni zegino dú, gi pai mangi gi de a re i agúmba ha agumba ka atingida pari ti ni.”

¹⁰Yuda Keriota, gu ko naadu dagba agu yo nanidu bawe na ue, ko ki ndu koyo du abairamotumo ni ka kusa Yesu fu yo.

¹¹Ho i agi he ni, si ki ngba angba ti yo ni rengo,, ki kido ko tipa marã ya i afu he fu ko. Ko ki ya u amanga wãi ka fu Yesu fu yo bara ipo.

¹²Bambata rago gu kpokuta adu nga na agbooro ti ni ya, ni gu rago i atumo ni pumbo susiri, gako abawiriki ki ya fu ko, “Mo nakpi nyemu ani mbakadi ba wari, mo ri pumbo susiri ni?”

¹³Ko ki kedi gu gako abawiriki ue, ki ya fu yo, “Oni ndú ku bakporo yo, kumba agbia roni na runge be ko; oni ki pe ko.

¹⁴Ho ko ka rima ku ho ni oni ki ya fu irabambu, ‘Bayugupai niya, Gi bambu gino wari, mi ka ri pumbo susiri rogo na gimi abawiriki?’

¹⁵Ko ayúgo bakere vuru bambu fu roni ari ni tiko, ahe kina yo dũ. Oni ki mbakadi ba yo fu rani.”

¹⁶Abawiriki ki ndu ki da bakporo yo, ki bi he wa ko agumba ha fu yo; i ki mbakadi ba pumbo susiri.

¹⁷Ko ki ye nyemu na agu yo nanidu bawe na ue.

¹⁸Wa i asungu ki niri riahe, Yesu ki ya, “Mi nagumba ha fu roni ni rengo, gu ni sa dagba roni nikakusa re, ni ani ari riahe na ni.”

¹⁹I ki mo ka arungo, ki nisana ko ni ba sa sa, gu ni ki niya, “Mi du?”

²⁰Ko ki ya fu yo, “Ni dagba agu roni nanidu bawe na ue, gu ni ani anogoda he na ni kurungbu yo.

²¹Bambiko Wiri boro nandu a wa i ake pa ko; ono si agbérã agberã ti gu kumba nakusa Wiri boro re. Ka i avunga nga ko ya ka si angba tipa ko.”

²²Wa i ari riahe ko ki di kpokuta, ho ko afu tambuahe ni, ko ki kuadi he, ki fuku he fu yo, ki ya. “Oni rógo ho; borore nga gere.”

²³Ko ki di inga, ho ko afu tambuahe ni ko ki fu he fu yo; i ki mbiri he ti ngbaha dũ.

²⁴Ko ki ya fu yo, “Kurere nga gere nga ga ndika nga gu nauka tipa dungu aboro.

²⁵Ya mi fu roni ni rengo, mi ambira nga rindi bakakue berewe dati gu mi ka mbira ha ni vovo ho rogo ga Mbori ngbi yo te.”

²⁶Fuo bi yo bia, i ki ndu ku bagangara Aeraya yo.

²⁷Yesu ki ya fu yo, “I amánga roni oni koto akota dunduko; bambiko wa du he ni keke he ya, ‘Mi átá babanda akandoro ata, akandoro ki gbandaka.’

²⁸Ono fuo zinga mi be kpio, mi andú ku mbata yo fu roni ku Gariraya yo.”

²⁹Petero ki ya fu ko, “I navura manga agu yo i koto akota dunduko, ka mi akóta nga ya.”

³⁰Yesu ki ya fu ko, “Ya mi foro ni rengo, areme, ni gi yuru re, mo aóra rimore aora bara biata, mbata bakondo nikakua bara ue.”

³¹Petero ki gumba ha agumba kakaka ki ya, “Ka ani vura kpi akpi na mo mi oro nga rimoro te.” Agu yo ki mongo poi kina wo dũ.

³²I ki da rogo gu ba nangia Getesemane. Yesu ki ya fu gako abawiriki, “Oni súngu erẽ mi kpari fu Mbori.”

³³Ko ki rogo aPetero na Yakoba na Yoane fuo ko, pai ki tona iriwo ti ko gbe, ko ki nirungo arungo ni rengo.

³⁴Ko ki ya fu yo, “Mbisimore nazinga gbe kina koyo du kpio ni. Oni nyé erẽ ka angera.”

³⁵Ko ki ndu ku mbata yo ngbutuko, ki ti sande, ki nikpari fu Mbori, si ya du wa ka ragoho susi, si susi ko.

³⁶Ko ki ya, “Aba, Buba, omero rengbe na apai dũ; mo dí gi inga be re re; ono ka si du nga wa mi akpi nyemu he ya, wa kina mo akpi nyemu he.”

³⁷Ko ki ye, ki bi yo i nira ara, ko ki ya fu Petero, “Simona mo ra? ka mo ngere nga a saa du sa te?

³⁸Oni ngére ki nikpari, oni ka rima ku rogo asada. Toro nakpi nyemu he ni rengo, borose anyaka nga ya.”

³⁹Ko ki ndu berewe, ta kpara nigumba kina agu apai ko agumba ha mbata.

⁴⁰Ko ki ye berewe, ki bi yo i nira ara, bambiko bangiriyo arõi arõa; ka i aina nga gu pai ka i karaga fu ko ya.

⁴¹Ko ki ye bara biata, ki ya fu yo, “Oni rá ara wa du rago a re ka ongoda! Si rengbe; ragoho da; i fu Wiri boro ku vurube aboro ingapai.

⁴²Oni gúari, ani ndú; oni ngére gu ni nikakusa re ni mbedi.”

⁴³Si kina ku ngbako, Yuda ki ye aye ni ba sa nga gu ko naadu dagba agu yo nanidu bawe na ue, na rimbasa fuo ko na asape a angbondo, yo du abairamotumo ni na abakeapai a ga aYudo abaakumba.

⁴⁴Were gu ko nakusi ko, ko aima ringbisa ha fu yo, ki ya, “Gu boro mi ka dungo ni ko du; oni ki zi ko ki ndu na ko wenengaĩ.”

⁴⁵Ho ko ada ni, ko ki ye aye koyo du Yesu ni ni ba sa, ki ya, “Bayugupai,” ki dungo ko gbe.

⁴⁶I ki moi beyo ti Yesu ki zi ko.

⁴⁷Gu kumba naaru dagba agu yo nadu ho, ko ki mo gako sape ki ta ga gbiamotumo moyambu ki yere tuko.

⁴⁸Yesu ki karaga ha ki ya fu yo, “Sa oni re ni batuka, ye oni ti ni na asape na angbondo ka zia re?

⁴⁹Wa ani adu na oni yekaru yo na uru niyugu pai, oni azia nga re te; mangi gere Ziazia Kekeapai da ti rengo.”

⁵⁰I ki mongo guari aguari pati ko du, ki oro.

⁵¹Paranga ki nipe ko, naba pusi remu ti kungba kpotoko; i ki zi ko;

⁵²ko ki he pusi remu ahe ki oro ni kundiriko.

⁵³I ki ndu na Yesu koyo du gbiamotumo ni; abairamotumo ki dungura tiyo ku ho na ko na ga aYudo abaakumba a abakeapai dunduko.

⁵⁴Petero naape ko tuturu, kina ku tii mburu gu bambu yo nga ga gbiamotumo; ko ki sungu na amoyambu niawu we.

⁵⁵Were abairamotumo na abororondo dunduko i agbata pai agbata kuti Yesu ka imo ko; ka i abi nga pai sa ko ya.

⁵⁶Bambiko dungu aboro naagumba zire kuti ko, ka gayo zire arengba nga ya.

⁵⁷Agu yo ki guari ku ari ki nigumba zire kuti ko, niya,

⁵⁸“Ani agi he, ko aya, ‘Mi agbárasa gi yekaru re i adua ni be, rame ki du biata mi ki dua kura ha ka i adua nga ha ni be ya.’ ”

⁵⁹Ka gayo zire arengba nga wo a ya.

⁶⁰Gbiamotumo ki guari aguari ku ari dagba yo, ki sana Yesu, ki ya, “Mo akaraga nga pai te? Gini pai agi aboro agumba kuti ro were?”

⁶¹Ko ki ongo aonga, ka ko akaraga nga pai ya. Gbiamotumo ki sana ko berewe, ki ya fu ko, “Kristo nga mo nga Wiri gu ko i natambua ko?”

⁶²Yesu ki ya, “Mi nga ko; oni abi Wiri boro ko sungu pati kumbabe tandu niye rogo mai ngbangbaturũ yo.”

⁶³Gbiamotumo ki siri gako aroko, ki ya, “Gini pai ani akpi nyemu aboro gumba ha kuti ko berewe?

⁶⁴Oni gi gberãngba yo; ya oni wãi?” I ki mongo ya aya dunduko, kpi ko ngba.

⁶⁵Agu yo ki tona sukuda ko, ki dadi kpakpuko, ki nituturã ko, ki niya fu ko, “Mo gúmba pai ke!” Amoyambu ki nita ko ni beyo.

⁶⁶Wa Petero adu sande tii mburu bambu, ga gbiamotumo de pangbadimo ki ye sa;

⁶⁷ki bi Petero ko niawu we, ri ki ngana ko, ki ya, “Oni nidu a na gu boro Nazareta nga Yesu.”

⁶⁸Ko ki ti kangu he ati, ki ya, “Mi aina nga ha te, mi aruga nga tire na gu pai mo agumba ha te.” Ko ki kuru ku ngbadimo; bakondo ki kua.

⁶⁹De pangbadimo ki bi Petero, ki tona ya berewe fu agu yo narundu ho, “Ko nidu dagba yo.”

⁷⁰Ko ki ti kangu he ati berewe. Fuo ho ngbutuko agu yo naarundu ho, i ki ya berewe fu Petero, “Mo nidu dagba yo ni rengo; bambiko mo nga boro Gariraya.”

⁷¹Ko ki tona sara wa tiko nyanyaki ki nizunga he, niya, “Mi aina nga gu kumba oni agumba pa ko te re.”

⁷²Bakondo ki kua akua berewe ni ba sa. Petero ki tingidi gu pai Yesu agumba fu ko, wa ko aya, “Mo aóra rimore aora bara biata mbata bakondo nikakua bara ue.” Wa ko aberã ha ko ki nikpari akpara ni aume.