Read zande Marako 15 Bible Online

Marako 15 - zande bible

Marako 15

¹Wiso abairamotumo na ga aYudo abaakumba, na abakeapai i ki gumba rondo dagba yo, ki vo Yesu, ki ndu na ko, ki fu ko fu Pirato.

²Pirato ki sana ko ki ya, “Bakindo aYudo nga mo?” Ko ki karaga ha ki ya fu ko, “A si mo agumba ha re.”

³Abairamotumo ki kiti ngbanga ko kuti dungu apai.

⁴Pirato ki sana ko berewe, ki ya, “Mo akaraga nga pai te? Mo bi nga gu dungu apai i agumba kuti ro.”

⁵Ka Yesu akaraga nga pai berewe ya; wa si adu were si ki niiriwo airiwo ti Pirato.

⁶Were, wa i anambakada pumbo susiri kina wo Pirato anikusi kisikisi boro sa, gu ni i anisana ko tipa ni.

⁷Kumba ki du yo rimoko angia Baraba, ni vovo ko na agu yo ko asa mungu na yo, i aimi boro ni mungu.

⁸Rimbasa ki dakpa fuo Pirato, ki tona sasana ko ko mangi wa ko anamanga mbata fu yo.

⁹Pirato ki karaga ha fu yo, ki ya, “Oni nakpi nyemu mi kusi Bakindo aYudo fu roni?”

¹⁰Bambiko ko aini ya abairamotumo afu ko ni sogote.

¹¹Abairamotumo ki zingisi rimbasa aboro ya, Pirato kusi Baraba fu yo.

¹²Pirato ki karaga ha berewe, ki ya fu yo, “Gine mi ka manga fu gu ko oni ya ti ko, Bakindo aYudo?”

¹³I ki poi ku ari berewe ki ya, “Mo wági ko.”

¹⁴Pirato ki ya fu yo, “Tipagine; gini gbegberẽ pai mangi ko?” I ki poi ku ari bakere gbe ki ya, “Mo wági ko.”

¹⁵Bambiko Pirato akpi nyemu ka zeresa rimbasa aboro, ko ki kusi Baraba fu yo, ki fu Yesu, ho ko ata ko ni bakere, i wagi ko.

¹⁶Abanzengere ki ndu na Yesu ku rogo gu kikii vuru bambu nga ga bazogo; i ki yambu rikayo du.

¹⁷I ki ukadi ko ni ngungungu remu, ki kãi kpakpari kiwe, ki moi he ku riko yo;

¹⁸i ki tona paa kuti ko, “Ako, Bakindo aYudo.”

¹⁹I ki ta riko ni nganzi, ki sukudi ko, i ki ta kuka, niudi ko.

²⁰Ho i asawia ko ni, i ki uru ngungungu remu ti ko, ki ukadi ko ni gako remu. I ki kuru na ko ka ndu ka waga ko.

²¹I ki sosodi kumba naasusa, nga Simona nangia boro Kurene, naaye ringara yo, ba aAresanduro na Rufu, i ndu na ko, ko tindi gako wagiwagi ngua.

²²I ki ye na ko ku rogo gu ba nga Gorogota, (si wa ka i ya, Ba memeri.)

²³I ki fu imekakue fu ko ni kodikodi he na gu tomengua nga mure; ka ko adia nga ha ya.

²⁴I ki wagi ko, ki ta kparaka gako remu dagba yo, niba ake ti ni, gu ni rogo ho.

²⁵Si ki du wa ka saa ribua nga ga wiso du, i ki wagi ko.

²⁶I ki ke gu pai i akiti ngbanga ko ti ni ba riko, nga “Bakindo aYudo”.

²⁷I ki wagi abatuka ue pati ko; gu ko ki du ku kumbabeko yo, gu ko ki du garebeko yo. [

²⁸Gu Ziazia Kekeapai ki da ti rengo, wa si aya, “I gedi ko na aboro ingapai.”]

²⁹Agu yo naasusa i ki ta sawia ko nipikipo riyo, ki niya, “Ha! Mo nagbarasa yekaru ki dua ha ramehe ki du biata,

³⁰mo bátasi tiro ki zorõ ti wagiwagi ngua.”

³¹Abairamotumo ki nimomu ko dagba yo wo, na abakeapai, ki ya, “Ko abatasi kura aboro; ka ko batasi nga tiko te.

³²Kristo zórõ awere ti wagiwagi ngua, nga Bakindo aYisaraere, ani bí he ki idi pa ko.” Agu yo i awagi yo na ko i ki nisenge ko.

³³Ho bebere uru ada ni, bitimo ki ti ati auru kpotosende dunduko kina kuti saa biata.

³⁴Ti saa biata Yesu ki poi ku ari ni bakere fugo ya, “Eroi, Eroi, rama sabakusani?” si wa ka i ya, “Gi Mbori, gi Mbori, guari mo ti re sa gine?”

³⁵Agu yo naarundu ho, ho i agi he ni, i ki ya, “Oni gí he, ko nayamba Eriya.”

³⁶Gu ko ki oro, ki da hisi fakayofakayo he na kakai imekakue, ki moi he ku ngba nganzi yo, ki ta fu he fu ko ko mbiri he, niya, “Ani rú nga, ani bí nga ke si ngia Eriya ayé ka zoga ko.”

³⁷Yesu ki poi ku ari, ki fu mbisimoko.

³⁸Gu remu naadu yekaru yo si ki siri rogo ue, si ki tona ari yo ka sira ku sende.

³⁹Gu barukuri aboro 100 naaru ho pati ko, ho ko abi ko ni ko nafu mbisimoko were, ko ki ya, “Gi kumba re, Wiri Mbori ningia ko rengo.”

⁴⁰Ade adu ho nibi ko abi ku sa yo. Agu yo adu dagba yo nangia aMaria Magadara, na gu Maria nga na Yakoba gu toni ko, na Yose, a Sarome;

⁴¹agu yo re, i nanapeka ko wa ko adu Gariraya yo, ki nimangi pa ko: na gu kura dungu ade naaye na ko ku Yerusarema yo.

⁴²Kumba ki ye nyemu, bambiko rago Mbakada ahe nadu, nga gu rago nida mbata rago sabiti nikada,

⁴³nga Yosefa nga boro Arimataya, irisiirisi bororondo, ko naangera ti ga Mbori ngbi a tigako. Yosefa ki rimi arima zukazuka koyo du Pirato ni, ki sana ko tipa kangba Yesu.

⁴⁴Si ki niiriwo airiwo ti Pirato bambiko wa ko aima kpi, ko ki yambu gu barukuri aboro 100 koyo du ko ni, ki sana ko si ngia ko niima kpi?

⁴⁵Ho ko agi he ni ngba barukuri aboro 100 ko ki fu kangba Yesu fu Yosefa.

⁴⁶Ko ki ngbe pusi remu, ki zogo ko ki kãi ko ni gu pusi remu re, ki pigi ko ku murã yo, gege mbia nadu, ko ki wirigi mbia kuti ngbadimo murã.

⁴⁷AMaria Magadara na gu Maria nga na Yose i ki bi gu ba i apigi ko rogo ho.