Read zande Marako 16 Bible Online

Marako 16 - zande bible

Marako 16

¹Ho rago sabiti asusi ni, aMaria Magadara, na gu Maria nga na Yakoba, a Sarome, i ki ngbe wene fuo he ka ye ka mbeda kangba Yesu na ni.

²Ho rago agiri ni ni gu mbata uru nga ga poso, i ki ye ku pati murã, ho uru nakura ni wiso.

³I ki niya dagba yo, “Da nikawiriga mbia ti ngbadimo murã fu rani?”

⁴I ki ya ngere ki bi mbia ni wirigi wirigi he; bambiko wa si akii gbe.

⁵I ki rimi ku rogo murã yo, ki bi paranga kumba ko sungu ku kumbabe naukadi pusi remu; i ki nikigi akiga.

⁶Ko ki ya fu yo, “Ka oni kígi nga ya: oni nagbata Yesu nga boro Nazareta, gu ko i awagi ko. Ko zingi; ko etere; oni bí gu ba i apigi ko rogo!

⁷Oni ndú ki ya fu gako abawiriki na Petero, ko nandu mbata fu roni ku Gariraya yo. Oni abi ko yo, wa ko agumba ha fu roni.”

⁸I ki kuru, ki oro pati murã; bambiko i akio akio ki nikigi akiga. Ka i agumba nga pai fu boro wa sa ya; bambiko i agunde agunde.

⁹Were ho Yesu azingi ni ngbatutu ni gu bambata uru nga ga poso, ko ki yugu tiko fu kina Maria Magadara mbata, gu ri ko adandi adaimona ti ri saba.

¹⁰Ri ki ndu ki gumba ha fu agu yo nanidu na ko, wa i arungo ki nikpari.

¹¹Ho i agi he ni ya, ko ni ungako, kina ri niima bi ko, si ki du bangiriyo wa kina zire.

¹²Fuo agi apai re ko ki yugu tiko akia fu agu yo ue, wa i andu gayo nunguro ku ringara yo.

¹³I ki ndu ki gumba ha fu akura yo; gayo pai ki du adu bangiriyo wa kina zire a.

¹⁴Fuo gure ko ki yugu tiko fu agu yo nadu bawe na sa, wa i asungu ka ri riahe; ko ki nirugu yo ti gayo basapai na nyaka ngbaduyo, bambiko i abasa gu pai nga ga agu yo naabi ko fuo zinga ko be kpio.

¹⁵Ko ki ya fu yo, “Oni gbándaka agbandaka ku rogo gi zegino dunduko re, ki nitungusi wene pangbanga fu aboro dunduko.

¹⁶Gu ni nikaniidi pa ha i ki bapatizi ni, i abátasa ni abatasa, ono gu ni nikanibasa ha i ambúsa ni ambusa.

¹⁷Agi apai i aina pai ti ni re si nikadu ti agu yo naida pa ha; i adánda adaimona adanda ni rimore; i agúmba vovo apai agumba;

¹⁸i atúmba wo ku ari ka i ambíra kere he, si amánga nga yo wa sa te; i animoi beyo auru aboro kaza i ki huku ahuka.”

¹⁹Si ki ta du wa gere, Gbia Yesu, ho ko agumba ha ni fu yo, Mbori ki di ko ku ngbangbaturũ yo, ko ki sungu ku kumbabe Mbori.

²⁰Abawiriki ki ndu ki nitungusi wene pai rogo aringara dunduko, Gbia ki nimangi sunge na yo, ki ninyakasi gu pai re ni agu apai i aina pai ti ni naadu fuo ho. Amina.