Read zande Marako 2 Bible Online

Marako 2 - zande bible

Marako 2

¹Ho Yesu arimi ni ku Kaparanauma yo berewe fuo rago ngbutuko, pandeko ki gbandaka ya, ko bambu yo.

²Dungu aboro ki tiria, bambu ki hi, ka si adu nga wa ka ba du dimo yo na pa ngbadimo a ya; ko ki tungusi wene pangbanga fu yo.

³I ki ye koyo du Yesu ni na kumba nakaza be ngbaramoni, akumba adu biama naatindi ko.

⁴Ka si adu nga wa ka i mbedi koyo du Yesu ni ya be rimbasa, i ki nimo ka zaka ri bambu yo bara ho ko adu ni. Ho i azaki he ni, i ki zogo boro ngbaramoni na gu barame ko api auru he.

⁵Yesu ki bi yo i naidi pa ko, ko ki ya fu boro ngbaramoni, “Wiri, i vu ro ti ga ingaapai.”

⁶Ono agu abakeapai naasungu ho i ki niberẽ he ku kpotoyo yo, ki ya,

⁷“Gi kumba re ko nagumba ha were ti gine? Ko nagberã ngbako yo fu Mbori! Da ka vu boro ti ingaapai wa du kina Mbori sa?”

⁸Yesu ki ini aina ku kpotoko yo ni ba sa ya i naberã ha wo ku kpotoyo yo, ko ki ya fu yo wẽ, “Tipagine oni aberã gi pai ti ni re ku kpotoroni yo?

⁹Watadu ya mi fu boro ngbaramoni, ‘I vu ro ti ga ingaapai,’ na ya mi, ‘Mo gúari, ki tumba ga barame ki mere,’ giniguipi?

¹⁰Ono ka oni ini ya, Wiri boro rengbe tanduko na vu aboro ti ingaapai zegino,” ko ki ya fu boro ngbaramoni,

¹¹“Ya mi foro, mo gúari, ki di ga barame ki ga ku kpuro yo.”

¹²Ko ki guari ki di barame adia ni ba sa, ki kuru ku bara bangiriyo dũ. Si ki ta du wa gere si ki niiriwo airiwo ti yo dũ, i ki taasi rimo Mbori ki ya, “Ani abi nga pai wa gere mbata te!”

¹³Yesu ki mere berewe pati baime; rimbasa ki tiria fuo ko dú, ko ki niyugu pai fu yo.

¹⁴Wako asusi, koabi Revi nga wiri Arufayo, ko sungu rogo gu ba i anafu amarã ku ho ni, ko ki ya fu ko, “Mo nipéke re.” Ko ki guari ki nipeke ko.

¹⁵Si ki ta du wa gere, Yesu ki sungu ka ri riahe rogo ga Revi bambu, dungu abarogo marã ngbeti na aboro ingapai ki sungu ka ri riahe na Yesu na gako abawiriki, bambiko i adu ni dungu yo, i ki nipeke ko.

¹⁶Abakeapai na aFarusi ho i abi ko ni, ko niri riahe na aboro ingapai na abarogo marã ngbeti, i ki ya fu gako abawiriki, “Tipagine ko ari riahe ti ni nimbiri he na abarogo marã ngbeti na aboro ingapai?”

¹⁷Yesu ki gi he, ko ki ya fu yo, “Agu aboro du zezeredi zingo munganga amanga nga yo te; ono kina agu yo du na kaza. Mi aye nga ka yamba ruru aboro te, kina aboro ingapai.”

¹⁸Ga Yoane abawiriki na aFarusi nagina riahe; i ki ye ki ya fu ko, “Tipagine ga Yoane abawiriki nagina riahe ti ni na ga aFarusi abawiriki, ono gamo abawiriki agina nga riahe te?”

¹⁹Yesu ki ya fu yo, “Aboro kporo diade rengbe na gina riahe ho du kumba ku de ni na yo? Ni gu rago kumba ku de nidu na yo ka i agina nga riahe ya.

²⁰Ono ragoho nada i di kumba ku de be yo; i ki nigina riahe ni gu rago re.

²¹A nga boro sa ka rungu vovo remu kuti kuru remu te; gu vovo remu ka ni ru he ti bangirihe si ki siri kuru he asira, bangirihe ki susi gu naadu mbata.

²²Ka boro uka nga vovo imekakue ku rogo kuru amangu imekakue yo te; imekakue ka sipa agu amangu asipa ka i uka ha ku rogo, imekakue ki gberẽ na amangu; ono i niuka vovo imekakue kina ku rogo vovo amangu.”

²³Wa ko andu rogo ati rago sabiti, gako abawiriki ki ta ndu nisiri vunde.

²⁴AFarusi ki ya fu ko, “Mo bi yo, tipagine i amanga gu ti ni re rago sabni wa aru nga ha ya?”

²⁵Ko ki ya fu yo, “Oni ageda nga gu pai Dawidi amangi ho zingo riahe amangi ko ni, ko ki du na gomoro, ko na agu yo naadu na ko, te?

²⁶Wakoarimikurogo ga Mbori bambu yo ni gu rago Abiatara adu ni gbiamotumo, ki ri kpokuta yugopai, nga gu i aidi pa ri he fu agu yo naadu na ko, te?”

²⁷Ko ki ya fu yo, “I amangi rago sabiti fu aboro, i amanga nga aboro fu rago sabiti te;

²⁸si du du Wiri boro ti ni ni gbia sabiti a.”