Read zande Marako 3 Bible Online

Marako 3 - zande bible

Marako 3

¹Ko ki rimi berewe ku bambutiria yo; kumba nadu yo na kurugbo beko.

²I ki kparia ko si ngia ko abatasa ko rago sabiti; i kiti ngbanga ko.

³Ko ki ya fu gu kumba nadu na kurugbo beko, “Mo yé ka ru ku barangba yo.”

⁴Ko ki ya fu yo, “Watadu manga wene pai rago sabiti na gbegberẽ he, na batasa unga na imo ho, gini gu ru?” I ki ongo aonga.

⁵Ho ko angana yo ni ta erã nirungo arungo mbiko ngbaduyo anyaki gbe, ko ki ya fu kumba, “Mo tái bero.” Ko ki tãi he; beko ki hu.

⁶AFarusi ki kuru, ki ndu ni ipo ka gumba rimoko na aErode, ki ya, i amanga wãi ka imo ko.

⁷A Yesu ki ndu na gako abawiriki ku pati baime; bakere rimbasa aye Gariraya yo ki peke ko; na Yuda yo,

⁸na Yerusarema yo, na Idumaya yo; na mbiti Yaradene yo, na pati Tura na Sidona, ni bakere rimbasa bambiko i agia pa agu apai ko amanga ha dũ, ki niye fuo ko.

⁹Ko ki ya fu gako abawiriki wẽ, toni kurungba du ho tipa ko bambiko rimbasa, i ka turã ko;

¹⁰bambiko ko abatasi dungu yo be akaza; si ki ta du wa gere agu yo naadu na kere akaza dunduko i ki nigbisi fuo ko i zadi ko.

¹¹Ni gu rago gbigbita atoro anibi ko, ami ki niti ku sande barangba ko, ki nipoi ku ari, niya, “Mo nga Wiri Mbori.”

¹²Ko ki rugu ra gbe ki ya, ka ami yugu nga ko ya.

¹³Yesu ki biti ku ri bagangara yo, ki yambu agu yo koyo du ko ni ko akpi nyemu yo ni tiko; i ki ndu koyo du ko ni.

¹⁴Ko ki ka kuti yo bawe na ue, i nisungu na ko, ko nikekedi yo, i nitungusi pai,

¹⁵i du na tandu danda adaimona.

¹⁶Ko ki yambu kura rimo Simona nga Petero;

¹⁷Yakoba wiri Zebedayo, na Yoane wirina Yakoba; ko ki yambu kura rimoyo nga Boanerege, nga awiri gumba.

¹⁸A Andarea na Firipo, na Barutoromayo, na Matayo, na Toma, na Yakoba, wiri Arafayo, na Tadayo, na Simona nga boro Kanana,

¹⁹na Yuda Keriota, gu ko nakusi pako. Yesu ki ndu ku kporo yo.

²⁰Rimbasa ki tiria berewe, si ki ta du wa gere ka si adu nga wa ka i ri riahe ya.

²¹Ho abadiangbako agi he ni, i ki ndu ka zia ko; bambiko i aya wẽ; “Iranzanga nga ko.”

²²Agu abakeapai naye Yerusarema yo, i ki ya, “Ko na Barazebuba ti ko, ko nadanda adaimona vurube gbia adaimona.”

²³Yesu ki yambu yo koyo du ko ni, ki nigumba asanza fu yo, ki ya, “Ka Satana wiri pa do Satana wãi?

²⁴Ka ngbi kpara ni sa ha, gu ngbi re si ru nga te.

²⁵Ka ringara agume kpara ni sa ha, gu ringara agume re si ru nga a te.

²⁶Ka Satana zingi kuti ko ni tiko gako ngbi si aru nga te, si nanyasa anyasa.

²⁷Ka boro rimi nga ku tii gu bambu nga ga iraome ka roga gani ahe te, kina gu ka ni vo ni mbata; ni nikaroga gani ahe dimo yo.

²⁸“Ya mi fu roni ni rengo, i avú wiri aboro avu ti gayo ingaapai dunduko na gu gayo gberãngba yo dũ i nagberã ngbayo yo na ni;

²⁹ono gu boro ka gberẽ ngbani yo fu Ziazia Toro Mbori ahé nga ha fu ni wa sa te, ni ka mangi gu ingapai nye anye kindi―”

³⁰bambiko i aya, “Ko na gbigbita toro ti ko.”

³¹Anako ki ye na awirinako; i ki ru zegi yo, ki kedi sunge koyo du ko ni, i yambu ko.

³²Gu rimbasa naasungu pati ko, i ki ya fu ko, “Mo ngére, anamo na awirinamo du zegi yo nagbata ro.”

³³Ko ki karaga ha fu yo, ki ya, “Da nga nina na awirinami?”

³⁴Ko ki ngana agu yo naasungu pati ko, ki ya, “Oni bí, anina na awirinami!

³⁵Gu ni namanga gu pai Mbori akpi nyemu he ni nga wirinami, na dawire, na nina.”