Read zande Marako 4 Bible Online

Marako 4 - zande bible

Marako 4

¹Yesu ki tona yugo pai pati baime berewe. Bakere rimbasa ki tiria koyo du ko ni gbe, si ki ta du wa gere, ko ki zorõ ku kurungba yo, ki sungu rogo ho bangiri ime, rimbasa dunduko ki du pati baime ti ngba gango ime.

²Ko ki yugu dungu apai ni sanza, ki ya fu yo rogo gako yugopai,

³“Oni gí he! Were, bamitunga andu ka mi tunga.

⁴Ho ni nami he ni, gu bete he ki tiwi ku pangba gene, azire ki ye ki riti he.

⁵Gu kura na ki tiwi ku auru mbia, yo sende naanaga nga ni ya; si ki kuru ni ipo bambiko sende naanaga nga fu he te.

⁶Ho uru nafaa ni, si ki gbi agbi bambiko tarãha arima nga te, si ki ugu auga.

⁷Na gu kura ha ki tiwi ku dagba akiwe yo, akiwe ki sono asona, ki kandasi he, ka si azu nga ya.

⁸Na gu kura ha ki tiwi ku rogo mbudu sende, si ki nizuku, ta sosona nikindigi; si ki zuku ki susi gu ni nimi mbata bara 30 na bara 60, na bara 100.”

⁹Ko ki ya, “Gu ni du na tu gia ha ti ni ni gí he.”

¹⁰Ho Yesu adu ni ni sa ko, agu yo naadu pati ko na agu yo nanidu bawe na ue, i ki sana ko tipa gu sanza re.

¹¹Ko ki ya fu yo, “Gu gbugbu pai nga ga ga Mbori ngbi du ni yuguyugu he fu roni; ono ahe ni mangimangi he ni sanza dũ fu agu yo du zegi.

¹²Ka i bi he, i bi he abi, ka i aina nga ha ya; ka i gi he, i gi he agia, ka i aruga nga tiyo na ni ya; bambiko i ka sa tiyo, si ki du ni hehe he fu yo.”

¹³Ko ki ya fu yo, “Oni aina nga gi sanza te re? Oni awira pa ina asanza wãi dú?

¹⁴Bamitunga nimi pangbanga.

¹⁵Gu nidu pangba gene ho i nimi pangbanga ku ho ni si nga agu yo nigi he, Satana ki ye aye ni ba sa, ki di gu pai i nimi ku rogo yo yo.

¹⁶Gu i nimi ku auru mbia a si nga agu yo nigi pai ki di he, rago ki ngba angba ti yo,

¹⁷ka tarãha adu nga kpotoyo yo ya, ono i ki ru ngbutuko; ni gu rago rungo nida ti yo na rungosi tipa gu pai re, i ki koto akota ni ba sa.

¹⁸Na gu kura ha i nimi ku dagba akiwe, si nga agu yo nigi gu pai re,

¹⁹berã pa zegino, na gu nangaahe nga ga ũkumuko na nyemu kura ahe ki rimi, ki kandasi wene pai, ka si azu nga ya.

²⁰Gu i nimi ku rogo mbudu sende si nga agu yo nigi gu pai re, ki di he, ki nimangi he, si ki nge ange bara 30, na bara 60, na bara 100.”

²¹Yesu ki sana yo ki ya, “I niye na baro ka maa ha ku tii moduka vo na tii barame yo, ka amaa nga ha auru nguaha ya?

²²Bambiko a nga he sa ka du ni okooko ho te; si au adu ni kusikusi he; a nga he sa ka i mangi ni gbuko te, si kuru akura ku imarago.

²³Gu boro du na tu gia ha ti ni ni gí he.”

²⁴Ko ki ya fu yo, “Oni bánda tironi ti agu apai oni agia; ni gu moduka oni anduka ha na ni i andúka ha na ni fu roni; si nikadu ni fufu he fu roni bakere ti gu naadu mbata.

²⁵Bambiko gu ni du he be ni, si adú ni fufu he ku ri he fu ni, gu ni adu nga he be ni ya, i adia gu du be ni.”

²⁶Ko ki ya. “Wo au ga Mbori ngbi, wa ka boro mi tunga ku sende yo;

²⁷ki ta ra nizingi yuru na uru, tunga ki ta kura nisono, ka ni aina nga pa sona ha ya.

²⁸He nazu ti sende ni sa ha; bambata ha nga kpehe, sisihe nikadu, kikindigi tunga ki du vuru sisihe yo.

²⁹Ho zuzuhe nizamu ni, ni ki nirogo asape aroga ni ba sa, bambiko regbo ke he da.”

³⁰Ko ki ya, “Ani aringbisa ga Mbori ngbi kuti gine? Ani yugu he rogo gini sanza?

³¹Si wa tunga musutada, gu tunga nidu ni toni he ti atunga rogo kpotosende dú, ho i nimi he ni;

³²ono ka i mi he si sono asona, ki susi nvuo dú, ki nikparaka kikindigi abehe; si ki ta du wa gere agu azire du ari ami ki nisusungu nzeremehe.”

³³Dungu asanza ko agumba pai rogo ho fu fu yo wa gere, gu ka i agia agia.

³⁴Ko agumba nga pai fu yo gbua te, ko agumba ha fu yo kina rogo sanza yo. Ono ko ayugu ahe dunduko fu gako abawiriki ni rondo.

³⁵Nyemu ni gu rago re, ko ki ya fu yo, “Ani sí ku mbiti yo.”

³⁶I ki guari rimbasa yo, ki nindu na ko a wa ko adu kurungba yo. Kura akurungba adu ho fuo ko.

³⁷Bayuge ki niya, ime ki nisungbura ku kurungba yo, si ki du wa kurungba nikahi ahi awere.

³⁸Ko ki du ni sa ko mburuhe yo, ki moi riko ti ngua bari nira ara. I ki zingisi ko, ki ya fu ko, “Bayugupai, ka ani kpi si agberã nga ti ro te?”

³⁹Ko ki zingi, ki za yuge, ki ya fu baime, “Mo zéredi, ki ru zaa!” Yuge ki kiti, rago ki zeredi azereda.

⁴⁰Ko ki ya fu yo, “Oni nagunde tipagine? Oni ata du nga na idapase te?”

⁴¹I ki nigunde agunde gbe, ki ya dagba yo, “Da du re, yuge agia sangbani na baime a?”