Read zande Marako 5 Bible Online

Marako 5 - zande bible

Marako 5

¹I ki si baime ku mbiti yo, ku rogo gu ringara nga ga aGerasa.

²Ho Yesu akuru ni kurungba yo, kumba naadu na gbigbita toro ki kuru dagba amurã ni ba sa ki gbia ko,

³nangia gu ko kpuko adu dagba amurã; a nga boro sa ka vo ko berewe te ni azogbo a te.

⁴Bambiko i aima diga nivodi ko ni aganziri na azogbo, azogbo ki kafu akafa be ko, aganziri ki kuadi akuadi rukutu. A nga boro sa ome ruga ko adu ti ni te.

⁵Ko ki nipoi ku ari dedede, yuru na uru dagba amurã na rogo abaagangara, ki nidewe tiko ni ambia.

⁶Ho ko abi Yesu ni ku sa yo ko ki oro ki udi ko;

⁷ki nipoi ku ari, ki niya, “Gine mi amanga na mo, Yesu, nga Wiri Mbori nga Bahe ki susi? Mi zunga Mbori foro, ka mo rungosi nga re ya!”

⁸Bambiko ko aya fu ko, “Mo gó ti kumba, gbigbita toro!”

⁹Ko ki sana ko ki ya, “Rimoro nga da?” Ko ki ya fu ko, “Rimore nga Rimbasa; bambiko ani nge ange.”

¹⁰Ko ki kpari fu ko gbe ki ya, ka ko kedi nga ra ku sa yo ti ringara ya.

¹¹Were rimbasa amukuru adu yo gbe auru ngboongboo bagangara niriki.

¹²Gbigbita atoro ki kpari fu ko, ki ya. “Mo kédi rani ku vuru amukuru yo ani rimi koyo.”

¹³Ko ki idi he fu ra. Gbigbita atoro ki kuru, ki rimi ku vuru amukuru yo. Rimbasara ki zorõ ti ngba gango ime ku rogo baime yo, ami adu wa ka ami du 2,000; ami ki nikpiki ime yo.

¹⁴Agu yo nanariga ra i ki oro, ki nigumba ha rogo bakporo na ringara yo. Aboro ki ye ka bi gu pai naamangi.

¹⁵I ki ye koyo du Yesu ni, ki bi gu kumba adaimona azi ko, ko sungu na remu ti kpotoko, nzanga nago ti ko, gu kumba naadu na rimbasa gbigbita atoro; i ki nigunde agunde.

¹⁶Agu yo naabi he i ki pe gu pai fu yo naamangi gu kumba adaimona azi ko, na pa amukuru.

¹⁷I ki tona kpara fu Yesu, ko guari rogo gayo ringara.

¹⁸Wa ko arima ku kurungba yo, gu kumba adaimona azi ko, ko ki nikpari fu ko i du na ko.

¹⁹Ka Yesu aida nga ha fu ko ya, ko aya fu ko, “Mo gá ku kpuroni yo koyo du abadiangbaro ni, ki gumba gu bakere apai fu yo mangi Gbia foro, na gu pai inikoforo.”

²⁰Ko ki ndu ki tona gbandaka gu bakere apai Dekapori yo Yesu amangi fu ko; si ki niiriwo airiwo ti aboro dũ.

²¹Ho Yesu asi ni kurungba yo ku mbiti yo berewe; bakere rimbasa ki tiria koyo du ko ni; ko adu pati baime.

²²Kumba ki ye sa dagba abaira bambutiria yo, rimoko angia Yairo; ko ki ta bi Yesu niti sande pati nduko,

²³ki nikpari fu ko gbe, ki niya, “Toni wire nikakpi; mo yé ka zada ri, ri hu ki bati.”

²⁴I ki ndu na ko; bakere rimbasa ki nipe ko, i ki nigbisi ko gbe.

²⁵De, kureri anaga garãha ki du bawe na ue,

²⁶ri aimi be dungu amunganga gbe, ri ki bagi agu ahe naadu be ri dú, ka ri ahu nga wa sa ya, ono kaza ki zi ri azia bakere ti gu naadu mbata.

²⁷Ri ki gi pa Yesu, ki ye aye kina rogo rimbasa gii ko yo, ki zadi gako remu;

²⁸bambiko ri aya, “Ka mi zadi kina gako remu mi abáta abata.”

²⁹Gu kureri naaga si ki kati akata ni ba sa; ri ki ini he ku kpotori yo ya ri bati be gari kere kaza.

³⁰Yesu ki niini he ku kpotoko yo ya gu tandu du ti ko si ndu, ko ki sa tiko rimbasa yoniipo, kiya, “Da zadi gi remu?”

³¹Gako abawiriki ki ya fu ko, “Mo ata bi rimbasa abi si nigbisi ro, mo ki ya, ‘da zadi re?’”

³²Ko ki ngere kirikiri ka bi gu de namangi gi pai re.

³³Ono de ki ta ye ta gunde nikio, ri naini gu pai namangi fu ri, ri ki ti sande barangba ko, ki gumba kinaku rengo fu ko dũ.

³⁴Ko ki ya fu ri, “Vungu, ga idapase batasi ro; mo ndu zezeredi ki bati be ga kere kaza.”

³⁵Si kina ku ngbako, aboro ki ye rogo kporo nga ga baira bambutiria, ki ya, “Wiro kpi Tipagine mo afuda Bayugupai ti ni berewe?”

³⁶Ono Yesu abasa gu pai abasa i agumba, ki ya fu baira bambutiria, “Ka mo gúnde nga ya, mo ídi kina pa re.”

³⁷Ko aida nga fu boro sa ni pe ko te, kina aPetero na Yakoba na Yoane, nangia wirina Yakoba.

³⁸I ki da ku rogo ga baira bambutiria kporo; Yesu ki bi dungu aboro i nimangi amanga gbarakagbaraka, ki ta kpara nita wawa gbe.

³⁹Ho ko arimi ni ku dimo yo, ko ki ya fu yo, “Tipagine oni amanga gbarakagbaraka ti ni ki nikpari? Degude akpi nga te, ri nara ara.”

⁴⁰I ki nimomu ko amoma gbe. Ono ho ko akusi yo ni dunduko ko ki di bari na nari na agu yo nadu na ko, ki rimi koyo degude adu ni.

⁴¹Ko ki zi degude ti beri, ki ya fu ri, “Tarita kumi”; si wa ka i ya, “Degude, ya mi foro, mo gúari.”

⁴²Degude ki guari ni ba sa, ki nita; bambiko garãri adu bawe na ue. Si ki niiriwo airiwo ti yo bakere gbe.

⁴³Ko ki rugu yo gbe ki ya, ka boro ini nga gere wa sa ya. Ko ki ya i fu he fu ri, ri ri he.