Read zande Marako 7 Bible Online

Marako 7 - zande bible

Marako 7

¹AFarusi ki dungura tiyo koyo du Yesu ni na agu abakeapai naaye Yerusarema yo,

²i abi gu gako abawiriki i niri gayo riahe na beyo kina ku ho, ka i azunda nga beyo ya.

³Bambiko aFarusi na aYudo dunduko, ka i azunda nga beyo wenengaĩya, i ri nga he te, bambiko i adi sino ga aYudo abaakumba.

⁴Ho i aniye ni bangbeahe yo ka i azunda nga tiyo ya ka i ari nga he a ya. Dungu kura apai kina ho, i adi ka amanga, nga zunda ainga, na akurungbu na akurungbu asirigi.

⁵AFarusi ki sana ko na abakeapai ki ya, “Tipagine gamo abawiriki amanga nga sino ga aYudo abaakumba ti ni ya, i niri gayo kpokuta na beyo kina ku ho?”

⁶Ko ki ya fu yo, “Yesaya agumba pai tipa roni nga airabiriki ni rengo, wa du he ni keke he, ya ‘Agi aboro re i nairisa re kina ngbayo yo, ono kpotoyo yo ti re tuturu;

⁷ono i nauda re auda vurũ, niyugu gayo apai nga kina ga aboro rugute.’

⁸Oni mbu gu rugute nga ga Mbori ki ka kuti sino aboro.”

⁹Ko ki ya fu yo, “Oni mbu gu rugute nga ga Mbori ni rengo ka ka kuti sinoroni!

¹⁰Bambiko Mose aya, ‘Mo írisi bamo na namo’; ‘Gu ni ka gumba gbegberẽ pai fu bani na nani, ni kpi akpi ni rengo.’

¹¹Ono oni ya, ‘Ka boro ya fu bani na nani, Gu he re ka mi fu nga ha foro te, Korubani nga ha,’ (si wa ka i ya, si ni fufu he fu Mbori)―

¹²oni ki za ni ti manga pa bani na nani berewe.

¹³Oni nagbarasa ga Mbori pai ni gu pai oni afu; dungu apai oni amanga wa gere.”

¹⁴Ko ki yambu rimbasa fuo ko berewe, ki ya fu yo, “Oni gí sangbare a wa du oni dunduko, ki rugu tironi na ni,

¹⁵a nga he zegi sa ka ndu ku kpoto boro yo birikosi ni te; kina agu ahe enge ti boro si birikosi boro. [

¹⁶Gu ni du na tu gia ha ti ni ni gí he.]”

¹⁷Ho ko arimi ni ku dimo yo, ti rimbasa, gako abawiriki ki sana ko tipa gu sanza re.

¹⁸Ko ki ya fu yo, “Oni aruga nga tironi na ni te? Oni aina nga ha te? gu he du zegi ka si ndu ku kpoto boro yo, si birikosi nga ni te;

¹⁹bambiko si nandu nga ku ngbaduni yo te, si nindu kina ku vuni yo, ki kuru ku nvuo yo.” Ko agumba gere, si girisi ariahe dú.

²⁰Ko ki ya, “Kina gu he enge ti boro si birikosi boro.

²¹Bambiko ngbadu aboro yo, gbegberẽ berã nienge ni, berã pa meteka, na dĩ,

²²na imo boro, na pa bari, na dia ngbiti he, na ingaapai, na nangahe, na wasiro, na kere ngera, na wawaru, na rekangose, na gbagaura.

²³Gi gbegberẽ ahe re dunduko si enge ti boro ki birikosi ni.”

²⁴Yesu ki guari yo, ki ndu ku ngbanda Tura yo na Sidona. Ko ki rimi ku bambu yo, ko akpi nga nyemu boro ini he wa sa te; ka si adu nga wa ka ko gbu ya.

²⁵De, gbigbita toro azi toni wiriri ri ki gi pako agia nibasa, kiyekitisandepatinduko.

²⁶Were gu de re, Giriki nangia ri, ngbatungari nangia Surofoiniko. Ri ki kpari fu ko ko do daimona ti wiriri.

²⁷Ko ki ya fu ri, “Agude mbiki mbata; bambiko ngba nga dia ga agude kpokuta ka ba ha fu aango te.”

²⁸Ri ki karaga ha ki ya fu ko, “Ii Gbia; agu aango anidu tii mbisa yo ami nari ga agude mbusuru riahe.”

²⁹Ko ki ya fu ri, “Mbiko gi pai re mo ndú; daimona go ti wiro.”

³⁰Ri ki ga ku kpuri yo, ki bi wiriri ri pi auru ba, daimona aima go ti ri.

³¹Ko ki guari ngbanda Tura yo berewe ki ye ki kuru Sidona yo na ngbanda Dekapori yo, ki da ti gu baime nga Gariraya.

³²I ki ye koyo du ko ni na kumba naadu na kisikisi tuko, ki nikongodi pai; i ki kpari fu ko, ko moi beko auru ko.

³³Ko ki di ko ni sa ko ku sa yo pati rimbasa ki moi wirinzagako ku tuko yo, ki suku sure ki zadi mirãko;

³⁴ko ki ngere ku ari yo, ki uka omeko, ki ya fu ko, “Efata,” si wa ka i ya, “Si há.”

³⁵Tuko ki ha, giri mirãko ki zaki, ko ki nifura wenengaĩ.

³⁶Ko ki rugu yo ka i gumba nga ha fu boro wa sa ya; ono wa ko aruga yo i ki nigbandaka ha agbandaka bakere gbe.

³⁷Si ki niiriwo airiwo ti yo bakere gbe, i ki ya, “Ko mangi apai wenengaĩ dunduko; ko aya airangbianga gi pai a, na airapupo i nifura.”