Read zande Marako 8 Bible Online

Marako 8 - zande bible

Marako 8

¹Ni gu rago re, ho bakere rimbasa adu ni kina ho berewe, ka riahe adu nga be yo ya, Yesu ki yambu gako abawiriki koyo du ko ni ki ya fu yo,

²“Nunga rimbasa namanga re amanga bambiko ani raki na yo biata awere, ka riahe adu nga be yo ya;

³ka mi karaga yo ku kpuyo yo na zingo riahe he amáka yo amaka gene; agu yo dagba yo naye tuturu.”

⁴Gako abawiriki ki karaga ha ki ya fu ko, “Wari ka boro bi riahe ni ngbakungba nore ka riga agi aboro na ni re?”

⁵Ko ki sana yo ki ya, “Kpokuta be roni wãi?” I ki ya, “Si saba.”

⁶Ko ki ya fu rimbasa i susungu sande; ko ki di gu kpokuta nadu saba, ki fu tambuahe, ki kuadi he, ki fu he fu gako abawiriki, i mamoi he barangba rimbasa.

⁷Rukutu atĩo ki du be yo ni umba ra, ko ki ya i moi ra a barangba yo, ko nafu tambuahe tipa ra.

⁸I ki riki he ki mbiki; i ki dudungura gu mbusuruhe nanye, abuma ki hiki saba.

⁹I adu wa ka i du 4,000; ko ki asia yo.

¹⁰Ko ki rimi ku kurungba yo na gako abawiriki ni ba sa, ki da rogo gu ringara nadu pati Daramanuta.

¹¹AFarusi ki kuru, ki tona sasana ko, ki nidarĩ ko ko yugu gu pai i aina pai ti ni ngbangbaturũ yo, ni asada ko.

¹²Ko ki uka omeko ku kpotoko yo, ki ya, “Gi rika aboro re i nagbata gu pai i aina pai ti ni tipagine? Mi nagumba ha fu roni ni rengo, ka gu pai i aina pai ti ni du nga ni fufu he fu gi rika aboro re wa sa te.”

¹³Ko ki guari pati yo, ki zorõ ku kurungba yo berewe ki si ku mbiti yo.

¹⁴I ki atadi kpokuta, si adu be yo kurungba yo ni kina uu he sa.

¹⁵Ko ki rugu yo ki ya, “Oni bánda tironi ti agu agbooro nga ga aFarusi ra na agu agbooro nga ga Erode ra.”

¹⁶I ki saki he dagba yo, ki ya, “Kpokuta be rani te.”

¹⁷Yesu ki ini he ki ya fu yo, “Tipagine oni asaka ha ti ni ya kpokuta be roni te? Oni ata ina nga ha ki rugu tironi na ni te? Ngbaduroni ta nyaki?

¹⁸Bangirise ti roni oni abi pai na ni te? Tue ti roni oni agia pai na ni te? Oni atingida nga ha te?

¹⁹Ni gu rago mi akuadi gu kpokuta naadu bisue ku dagba agu aboro naadu 5,000, oni adungura mbusuruhe abaga ki hiki wãi?” I ki ya fu ko, “Bawe na ue.”

²⁰“Ni gu rago gu adu saba ku dagba agu yo naadu 4,000, oni adungura mbusuruhe abuma ki hiki wãi?” I ki ya fu ko, “Saba.”

²¹Ko ki ya fu yo, “Oni ata ruga nga tironi na ni te?”

²²I ki ye ku Betesaida yo. I ki ye koyo du Yesu ni na iravurari, ki kpari fu ko ko zadi ko.

²³Ko ki zi iravurari ti beko, ki guari na ko kporo yo. Ho ko asuku sure ni kuti bangiriko, ki moi beko auru ko, ko ki sana ko ki ya, “Mo nabi he?”

²⁴Ko ki ngere ki ya, “Mi nabi aboro; bambiko mi nabi yo i nita wa ka ngua ata.”

²⁵Yesu ki moi beko ti bangiriko berewe; ko ki ngere, ki bati, bangiriko ki ha, ko ki bi ahe dunduko wenengaĩ.

²⁶Yesu ki asia ko ko ga ku kpuko yo, ki ya, “Ka mo kúru nga ku kporo yo a ya.”

²⁷Yesu ki ndu, na gako abawiriki, ku rogo agu akporo nadu Kaisaria Firipo yo; ko ki sana gako abawiriki gene, ki ya fu yo, “Aboro niya da nga mi?”

²⁸I ki ya fu ko, “Yoane Babapatiza; agu yo niya Eriya; ono agu yo ki ya, gu ni sa dagba anebi.”

²⁹Ko ki sana yo, ki ya, “Oni ya mi nga da?” Petero ki karaga ha ki ya fu ko, “Kristo nga Mo.”

³⁰Ko ki rugu yo ki ya ka i gumba nga pako fu boro ya.

³¹Ko ki tona yugo pai fu yo, ya, Wiri boro ahi dungu apai ahi, ga aYudo abaakumba ki gindiga ko na abairamotumo na abakeapai, ki imi ko, rame ki du biata ko ki zingi berewe.

³²Ko ki nipeke gi pai apeka re gbayaga. Petero ki zi ko ki tona za ko.

³³Ko ki birĩ tiko ki nibi gako abawiriki, ki za Petero, ki ya, “Mo kúru ku gii re yo Satana; bambiko mo aberã nga ga Mbori pai te, kina ga aboro pai mo aberã.”

³⁴Ko ki yambu rimbasa koyo du ko ni na gako abawiriki, ki ya fu yo, “Gu boro ka akpi nyemu peka re ni mbu gani apai, ki tumba gani wagiwagi ngua ki nipeke re.

³⁵Bambiko gu ni nakpi nyemu batasa ungani, ni aíngisa ha aingisa; na gu ni nikaingisa ungani tipa re na Wene Pangbanga, ni abátasa ha abatasa.

³⁶Bambiko gini u du ti kumuko boro na gi zegino dunduko re, ka ni ingisi ungani?

³⁷Bambiko gine ka boro unda nga na ungani?

³⁸Bambiko gu ni ka zee amánga ni amanga tipa re na gimi apai dagba gi gbigbita rika airabari re, zee amánga Wiri boro amanga tipa ni, ho ko ka ye ni rogo gu imarago nga ga Bako na ziazia amaraika.”