Read zande Ruka 1 Bible Online

Ruka 1 - zande bible

Ruka 1

¹Bambiko wa dungu aboro atona ka ke pa agu apai nzunzu nadu ni mangimangi he dagba rani,

²kina wa agu yo afu he fu rani, nabi he ki ngia adezirehe ti tonatona rago na abatungusipai,

³si angba ti re a ka ke pai ni tangaratangara ha foro, wene Teofiro, a wa mi apeke he nzunzu ti tonatona ha dunduko,

⁴ya mo ini he ya rengo nangia agu apai i arugu ro kuti ni.

⁵Ni gu rago Erode adu ni bakindo aYudo boromotumo adu ho, rimoko angia Zakaraya, nangia ngbatunga Abiya. Diako nangia tita Arona, rimori nangia Erizabeta.

⁶I ue adu ni ruru aboro bangiri Mbori, nita rogo ga Gbia rugute na gako andika nizanga pai ku ri yo.

⁷Gude adu nga be yo te, bambiko Erizabeta nangia irazangada, dungu agarã asaki yo gbe.

⁸Si ki ta du wa gere, wa Zakaraya amanga ga boromotumo sunge barangba Mbori ti gako rago,

⁹wa sino boromotumo anidu, gako sunge nangia rima ku vuru ga Gbia yekaru yo ka zo fuõngua.

¹⁰Rago zo fuõngua rimbasa aboro adu zegi yo nikpari akpara dunduko.

¹¹Ga Gbia maraika ki yugu tiko fu ko niru ku kumbabe pati gu bamotumo nga ga fuõngua.

¹²Ho Zakaraya abi ko ni, ko ki kigi akiga, gunde ki zi ko.

¹³Ono maraika ki ya fu ko, “Zakaraya, ka mo gúnde nga ya; bambiko i gi ga kpe, diaro nga Erizabeta abátika gude foro, mo ki yambu rimoko nga Yoane.

¹⁴Rago angbá angba ti ro, mo ki wasa; rago batika ko rago ki ngba angba ti dungu aboro;

¹⁵tiparimowe ko adú ni bahe bangiri Gbia, ko ambíra nga imekakue na baripiro te, Mbori ahísa ko ni Ziazia Toro, ti kina gu rago nako ka vunga ko.

¹⁶Ko asá dungu awiri aYisaraere fu Gbia nga gayo Mbori,

¹⁷ko atá ku bangiri Gbia ni toro Eriya na tanduko, ka sa kpoto abaagude yo fu awiriyo, na keretukeretu aboro i peke gu tatamana nga ga ruru aboro, ka ringbisa aboro tipa Gbia ni mbakadimbakadi yo.”

¹⁸Zakaraya ki ya fu maraika, “Mi awíra pa ina gere wãi? Bambiko gbinza boro nga mi, dungu garã saki diare a.”

¹⁹Maraika ki ta karaga ha fu ko, niya, “Gabariere nga mi, naru barangba Mbori; i nikedi re mi gumba pai foro, ka yugo gi wene pangbanga foro re.

²⁰Mo ngére, mo adú ni kisikisi ngbaro, ka si adu nga wa ka mo fura ya, dati gu rago agi apai ka manga re, bambiko mo aida nga pa gu gimi apai nikadu ni digisidigisi he rago ho te.”

²¹Aboro ki nisungudi Zakaraya, si ki niiriwo ti yo wa ko aima vuru yekaru yo.

²²Ho ko akuru ni, ka si adu nga wa ka ko gumba pai fu yo ya. I ki ini he ya ko nibi yuguyugu pai yekaru yo. Ko ki niringbisi pai fu yo ni beko, ki nimangi pai kina ku kukiri.

²³Si ki ta du wa gere, ho rago gako sunge anyasi ni, ko ki ga ku kpuko yo.

²⁴Fuo agi arame re Erizabeta ki du na mobara nangia diako. Ri ki oko tiri diwi ki du bisue, niya,

²⁵“Gbia amangi he fere wo ni gu rago ko abi re, ka dia gi gbarasarimo ti re dagba aboro.”

²⁶Were i akedi gu maraika nga Gabariere yo du Mbori ni ni sita diwi ku rogo gu bakporo du Gariraya yo, i niya ti ni Nazareta,

²⁷koyo du ngasu de ni i apazua ri fu kumba rimoko angia Yosefa, nangia ngbatunga Dawidi; rimo gu ngasu de re nangia Maria.

²⁸Maraika ki rimi koyo du ri ni, ki ya, “Ako, mo gu Gbia du na mo, ki fu maku foro.”

²⁹Ngbaduri ki nikua akua be gi pai re, ri ki baki bangiriri ya ngbatunga gini paakuti boro nga gere.

³⁰Maraika ki ya fu ri, “Ka mo gunde nga ya, Maria, bambiko Mbori ngba na mo.

³¹Mo ngere, mo nikadu na mobara rukumburo yo, ki batika gude, ki yambu rimoko nga Yesu.

³²Ko adú ni bahe, i ayá ti ko Wiri Mbori nga Bahe; Gbia Mbori amáa ko ni bakindo a wa titako adu nangia Dawidi,

³³ko ki zogo ngbatunga Yakoba azoga kindi; gako ngbi adiga nga te.”

³⁴Maria ki ya fu maraika, “Gi pai awíra pa du wãi re wa mi aina nga pa kumba ya?”

³⁵Maraika ki karaga ha fu ri ki ya, “Ziazia Toro nikaye sa ro, gu tandu nga ga gu ko zogo aboro dũ nikadada ro; si du i ka ya ti ni ti gu gude mo ka vunga ko, Ziazia ko, nga Wiri Mbori.

³⁶Mo ngére, gu gumero nga Erizabeta, ri na kumbagude ni gbinza ri. Diwiri du awere sita nga gu ri i aya ti ri irazangada.

³⁷Bambiko a nga ga Mbori pai ho sa ka zanga tandu te.”

³⁸Maria ki ya, “Mo ngére, ga Gbia kanga nga mi; i mángi he fere wa gu mo agumba.” Maraika ki guari pati ri.

³⁹Maria ki guari ni gu rago re ki ndu ku ngbi bagangara yo, ku rogo gu bakporo du Yuda yo ni ngarã;

⁴⁰ki rimi ku rogo ga Zakaraya bambu yo ki poi kuti Erizabeta.

⁴¹Si ki ta du wa gere, ho Erizabeta agi fugo Maria ni, fogo gude ki gu rukumburi yo; Erizabeta ki hi be Ziazia Toro.

⁴²Ri ki poi ku ari ni bakere fugo, ki ya, “Irisiirisi boro nga mo dagba ade, irisiirisi he nga zuzu rukumburo!

⁴³Gere si niye wari fere nga na gi Gbia ye kono du mi ni?

⁴⁴Mo ngére, ho ga paakuti re ati ku ture yo ni, fogo gude ki gu rukumbure yo ni ngbarago.

⁴⁵De maku nga gu ri naidi pai; bambiko i amánga agu apai amanga i agumba ha fu ri yo du Gbia ni.”

⁴⁶Maria ki ya, “Mbisimore nataasa rimo Gbia,

⁴⁷rago ngba ti torore mbiko Mbori nga Batasire,

⁴⁸bambiko ko ngere koyo du gako rungorungo kanga ni. Oni ngére, bambiko arika aboro ayámba re ayamba dunduko ya, de maku;

⁴⁹bambiko gu ko du na tandu apai mangi bakere pai fere, ziazia he nga rimoko.

⁵⁰Gako weneringise du fu rika aboro gbia kuti gu rika aboro, nga agu yo nagunde ti ko.

⁵¹Ko yugu ome ni beko; ko gbandaka airarekangose ni agu apai i aberã kpotoyo yo,

⁵²ko rogo akindo auru gayo mbata, ki moi rungorungo aboro;

⁵³ko mbisi aboro gomoro ni wene ahe, ko ki dandi airakumuko ni ku beyo.

⁵⁴Ko unda Yisaraere nga vuruko, ko tingidi pa weneringise,

⁵⁵wa ko agumba fu abarani, fu Abarayama na arikako kindi.”

⁵⁶Maria ki raki koyo du ri ni diwi ki du wa biata, ri ki ga ku kpuri yo.

⁵⁷Were rago Erizabeta ki rengbe ri vungu, ri ki batika kumbagude.

⁵⁸Agu aboro ri aini yo ki gi he na agumeri ya Gbia ataasi gako weneringise fu ri; rago ki ngba angba ti yo na ri.

⁵⁹Si ki ta du wa gere rame ki du muambi, i ki ye ka yera gude ni yerati; i ki idi ka yamba rimoko nga Zakaraya wa du rimo bako.

⁶⁰Nako ki karaga ha ki ya, “Wo te; ono i yámbu rimoko nga Yoane.”

⁶¹I ki ya fu ri, “A nga boro sa dagba agumero yo yambu yo gi rimo kuti ni te re.”

⁶²I ki niringbisi he fu bako, ya gini rimo ko akpi nyemu i yambu he kuti ko.

⁶³Ko ki sana yo tipa gu waraga i nake pai ti ni, ko ki ke he ya, “Rimoko nga Yoane.” Si ki iriwo airiwo ti yo dunduko.

⁶⁴Ngbako ki za ni ba sa, giri mirako ki zaki, ko ki ta fura ni sambua Mbori.

⁶⁵Gunde ki zi agu yo kpuyo adu pati yo kirikiri dunduko. I ki taki pande agi apai re ku rogo gu ngbi bagangara du Yuda yo dunduko.

⁶⁶Agu yo nagi he i ki ta ka kuti he kpotoyo yo dunduko, niya, “Gi gude adú ni ngbatunga gine re?” Bambiko be Mbori adu na ko.

⁶⁷Bako ki hi be Ziazia Toro nangia Zakaraya, ko ki ta gumba pai niya,

⁶⁸“I támbua Gbia, nga ga Yisaraere Mbori, bambiko ko ye ki tumo avuruko,

⁶⁹Ki fu nyanyaki bata fu rani dagba atita Dawidi yo nga vuruko,

⁷⁰wa ko agumba ku ngba gako ziazia anebi naenge ho rago aenge ni,

⁷¹ya ani bati be avurarani, na be agu aboro dunduko nasoga rani;

⁷²ka yugo weneringise fu abarani, ka tingida gako wene ndika,

⁷³na gako zungahe ko azunga fu Abarayama nga barani,

⁷⁴ka ida fu rani ani bati be avurarani ka amanga pa ko zezeredi,

⁷⁵ani ki du ni ziazia rani na ni ruru rani bangiriko wa du ani ni ungarani.

⁷⁶Na mo, gude, i ayámba ro nebi nga ga gu ko du ni Bahe; bambiko mo nikandu mbata fu Gbia ka mbakada gako agene,

⁷⁷ka fu ina pa bata fu avuruko nigbandaka gayo ingaapai,

⁷⁸mbiko ngbadu weneringise nga ga gaani Mbori, yo girarago ka ye ni fu rani ari yo,

⁷⁹ka hasa rago fu agu yo sungu bitimo na rogo kirima kpio; ka maa ndurani ngba gene zereda.”

⁸⁰Gude ki sono, ki ninyaki ti toroko, ki nisusungu kina ngbakungba yo dati rago yugo ko fu Yisaraere.