Read zande Ruka 10 Bible Online

Ruka 10 - zande bible

Ruka 10

¹Fuo agi apai re Gbia ki sia akura yo 70, ki kedi yo ni ba ue ue ku mbata yo fu ko ku rogo agu akporo na agu arago dunduko ko nikandu ku rogo a tigako.

²Ko ki ya fu yo, “Kii zuzu ati, ono abamangisunge du ni umba yo; oni kpári ke fu Gbia ati ko kedi abamangisunge ku rogo gako ati.

³Oni ndú ke; oni ngére, mi nakeda roni wa wiri akandoro dagba anyarinde.

⁴Ka oni ndú nga na mangu gaoni marã be roni na kura mangu na katara a ya; ka oni poi nga kuti boro gene ya.

⁵Gu bambu oni ka rima ku rogo, oni gúmba gere mbata. ‘Zereda dú fu gi bambu re!’

⁶Ka gu irazereda du yo, gaoni zereda anye yo du ni ni; si ngia ni yo te, si ayéga fu roni berewe.

⁷Oni ki nye ku rogo gu bambu re, ki ri riahe ki nimbiri agu ahe wa i afu he fu roni; bambiko bamangisunge rengbe na gani mosoro. Ka oni tángara nga abambu ya.

⁸Gu bakporo oni ka rima ku rogo, i ki di roni ku gume, oni ri agu ahe i ka mamaa ha barangba roni.

⁹Oni húsi agu aboro kaza du yo, ki ya fu yo, ‘Ga Mbori ngbi mbedi konoduonini.’

¹⁰Gu bakporo oni ka rima ku rogo, ka i adía nga roni ku gume ya, oni ki kuru ku gene yo, ki ya,

¹¹‘Oni bí nga ke gu nvutu sende nga ga gaoni bakporo du ti ndurani, ani wege he kuti roni; ono oniíni gere, ga Mbori ngbi mbedi kono du oni ni.’

¹²Ya mi fu roni, gu pai nikadu fu Sodoma ti gu rago re, si agbérã nga wa ga gu bakporo te re.

¹³“Na gberẽ he foro Korazina! na gberẽ he foro Betesaida! bambiko ka i amangi agu apai du na tandu rogo Tura na Sidona yo wa i amangi he rogo roni yo, ka i asa gayo berã ki nisungu na mbuzaroko na kuke.

¹⁴Ono pai angbá fu Tura na Sidona rago sapangbanga, ki susi gaoni.

¹⁵Mo, Kaparanauma, i atúmba ro ku ngbangbaturũ yo? i azógosa ro ku Adisi yo.

¹⁶“Gu ni nagia gaoni pai ni nagia gi pai a; gu ni nabasa pa roni ni nabasa pa re a; gu ni nabasa pa re, ni nabasa pa gu ko nakedi re a.”

¹⁷Agu yo nadu 70 ki yega ni ngbarago, ki niya, “Gbia, adaimona du ni zogozogo ra fu rani mbiko rimoro!”

¹⁸Ko ki ya fu yo. “Mi abi Satana ti wa kina we gumba ngbangbaturũ yo.

¹⁹Oni ngére, mi asia pa simbida awo na angerembia fu roni, na ome vuraroni dunduko; a nga he ka manga roni wa sa te.

²⁰Ono ka oni ngí nga mbiko gere nga atoro du ni zogozogo ra fu roni ya; ono oni ngí angi bambiko rimoroni du ni keke he ngbangbaturũ yo.”

²¹Ni kina gu rago re Yesu angi rogo Ziazia Toro, ki ya, “Mi natambua ro, Buba, Gbia ngbangbaturũ na sende, ya mo aoko agi apai re be airatatamana na airainahe, ki yugu he fu toni agude; ii, Buba, mbiko wo si angba angba bangiro.

²²Ahe dunduko du ni fufu he fere be Buba: a nga boro sa ini da nga Wiri te, kina Mbori nga Ba; na da nga Ba, kina Wiriko ini he, na gu ni Wiriko nakpi nyemu ka yugo ho fu ni.”

²³Ko ki sa tiko fu abawiriki, ki ya fu yo ni rondo, “Bangironi ni betedi he bambiko oni nabi agi apai re!

²⁴Bambiko ya mi fu roni, dungu anebi na abakindo akpi nyemu ka bi agu apai oni abi, ono i abi nga ha te; na ka gia agu apai oni agia, ono i agia nga ha te.”

²⁵Mo ngére, gu bainiparugute ki ye ka asada Yesu, ki ya, “Bayugupai, mi amánga wãi ka dia nyenye unga?”

²⁶Yesu ki ya fu ko, “I ake gini pai rogo rugute? Mo nageda ha wãi?”

²⁷Ko ki ta karaga ha niya, “Mo kpi nyemu Yekova nga ga Mbori kpotoro yo dunduko, na mbisimoro dũ, na omero dũ, na ga bẽra dunduko; mo nikpí nyemu akuaro dunduko wa mo akpi nyemu tiro.”

²⁸Ko ki ya fu ko, “Mo karaga ha wenengãi; mo mángi gere, mo ki nye ni ungaro.”

²⁹Ono ko akpi nyemu mbakada rimoko tigako, ko ki ya fu Yesu, “Da nga kuare?”

³⁰Yesu ki karaga ha ki ya, “Boro anungu Yerusarema yo ku Yereo yo; ko ki gbia abatuka, i ki tuka gako remu ki nitaki ko, ki ta guari, nimbu ko, ko nimbedi ka kpi.

³¹Boromotumo ki ndu ngba gu gene re: ho ko abi ko ni ko ki yari banduru gene bani.

³²Boro Revi a, ho ko ada ni koyo, ko ki bi ko kina wo, ko ki yari banduru gene bani a.

³³Ono boro Somorona, wa ko anungu, ko ki ye koyo du ko ni. Ho ko abi ko ni, nungako ki mangi ko,

³⁴ko ki ye koyo du ko ni, ki ta vo gako aoro, niuka nzeme na imekakue auru he; ki nimoi ko auru gako nya, ki nigasi ko ku sinziri yo ki nibanda ko.

³⁵Wiso ko ki kusi rukutu marã feda ue ki fu ra fu irasinziri, ki ya, ‘Mo bánda ko; gu mo ka baga ha ku ri gere, ho mi ka yega ni, mi agása haforo.’

³⁶Ya mo wãi? Da dagba agi aboro biata re adu wa kurako fu gu ko nagbia abatuka?”

³⁷Ko ki ya, “Gu ni naini pai fu ko.” Yesu ki ya fu ko, “Mo ndú ki mangi kina wo a.”

³⁸Wa i anunga Yesu ki rimi ku rogo gu kporo; de rimori nangia Marata ki di ko ku gume ku rogo gari bambu.

³⁹Wirinari adu yo rimori nangia Maria, ri asungu pati ndu Yesu, ki nigi gako pai a.

⁴⁰Ono Marata adu ni fudifudi ri be bakere mangapai; ri ki ye koyo du ko ni, ki ya, “Gbia, si agberã nga ti ro wa wirinami ambu re mi nimangi sunge ni sa re te? Mo rúgu ri tie ri unda re na ni.”

⁴¹Ono Gbia ki karaga na ki ya fu ri, “Marata, Marata, mo ni fudifudi ro be dungu apai;

⁴²kina pai sa rengbe: wa Maria asia gu wene pai re, i adia nga ha be ri te.”