Read zande Ruka 11 Bible Online

Ruka 11 - zande bible

Ruka 11

¹Si ki ta du wa gere, wa Yesu akpara rogo gu ba, ho ko ambu he ni, gu ni sa dagba gako abawiriki ki ya fu ko, “Gbia, mo rába rani ani kpari wa kina Yoane araba gako abawiriki.”

²Ko ki ya fu yo, “Ho oni ka kpara ni, oni ya: “Barani du ngbangbaturũ yo, ani irisi rimoro airisa. Ga ngbi yé.

³Mo fú gaani riahe fu rani na uru.

⁴Mo vú rani ti gaani ingaapai; bambiko ani a tigaani navu agu yo ninainga pai fu rani. Ka mo ngbé nga fu rani mbata yo sa asada ya.”

⁵Yesu ki ya fu yo, “Da du na badiangba dagba roni, ni ki ndu koyo du ni ni bebere yuru, ki ya fu ni, ‘Badiare, mo fú kpokuta biata fere;

⁶bambiko gu badiare ye kono du mi ni ngba gani nunguro, a nga he be re ka mi fu he fu ni wa sa te’.

⁷Gu ni du dimo yo ki karaga ha ki ya, ‘Ka mo fúdi nga re ya; ngbadimo du ni kisikisi he awere, awire du na mi barame no; ka si adu nga wa ka mi guari ka fu he foro ya.’

⁸Ya mi fu roni wẽ, ka ni aguari nga ka fu he fu ni bambiko badiani nangia ni ya, ono mbiko gani zadapai ni aguari ka fu gu he fu ni a wa ni akpi nyemu he.

⁹Ya mi fu roni wẽ, Oni sána he tipa he, i ki fu he fu roni; oni gbáta he, oni ki bi he, oni ngóka ngbadimo, i ki uru he fu roni.

¹⁰Bambiko gu ni nasana he tipa he ni adía ha adia; gu ni nagbata he ni abí he abi; gu ni nangoka ngbadimo i aúra ha fu ni.

¹¹Gini bakumba du dagba roni, ka wirini sana ni tipa kpokuta, ni ki fu mbia fu ni? si ngia tipa tĩo, ni ki fu wo fu ni?

¹²Ka ni sana he tipa parakondo ni ki fu ngerembia fu ni?

¹³Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama Ziazia Toro fu agu yo nasana ko, te?”

¹⁴Wa Yesu adanda daimona nangia irangoianga, si ki ta du wa gere, ho daimona akuru ni, irangbianga ki fura; rimbasa aboro ki kigi akiga.

¹⁵Agu aboro ki ya, “Ko nadanda adaimona vurube Barazebuba nga gbia adaimona.”

¹⁶Akura yo ki ta asada ko, nidarĩ ko ko yugu gu pai i aina pai ti ni ngbangbaturũ yo fu yo.

¹⁷Ono ko ata ina gayo aberã, niya fu yo, “Gu ngbi dunduko du ni kparakpara ha ni sa ha si apáya apaya; gu bambu du ni kparakpara ha ni sa ha si atí ati.

¹⁸Si ngia Satana du ni kparakpara ko ni tiko, gako ngbi arú wãi? bambiko ya oni mi nadanda adaimona vurube Barazebuba.

¹⁹Were ka mi dandi adaimona vurube Barazebuba, awironi nadanda ra vurube da? were kina yo ka du ni gaoni abasapungbanga.

²⁰Ono ka mi dandi adaimona ni wirinzaga Mbori, ga Mbori ngbi ima da fu roni.

²¹Ho gu ngangara boro du na gani marã vura ti ni dunduko nabanda gani kporo ni, gani ahe ki du ku baha.

²²Ono ho gu ni du ni bahe ti ni ka ye ni fuo ni, ki di be ni, ni ki rogo gani úvura aroga dunduko nga gu ni afu tini ku be he, ki kparaka gani ũdĩ.

²³Gu ni ka du nga na mi ya vurare nga ni; gu ni ka dungura nga ahe wa sa na mi ya ni nagbandaka ha agbandaka.

²⁴“Ho gbigbita toro akura ni kpotoboro yo, u ki merẽ ngbakungba yo, ka gbata ba ongoda; ka u abi nga ha ya, u ki ya, ‘Mi akáraga tire ku rogo gi bambu ho mi akuru ni?’

²⁵Ho u ada ni, u abi he ni wegewege he ni tata ha.

²⁶U ki ndu ki nirogo kura atoro fuo ru saba susi ru na gberã; ami ki rimi ki sungu yo. Gu kusa pai nga ga gu boro re si ki gberẽ ti gu nadu mbata.”

²⁷Si ki ta du wa gere, wa Yesu agumba agi apai re de dagba rimbasa aboro ki poi ku ari, ki niya fu ko, “Maku ti gu rukumbu nabatika ro na gu mai mo aha.”

²⁸Ko ki ya, “Aboro maku nga agu yo ti gure, nagia ga Mbori pai, ki nika kuti ni!”

²⁹Ho rimbasa aboro azugadi ni pati Yesu, ko ki ya, “Gi rika aboro re nga gbegberẽ rika aboro; i nagbata gu pai i aina apai ti ni; ka i afú nga gu pai i aina apai ti ni fu yo ya kina gu pai nga ga Yona.

³⁰Bambiko wa Yona adu ni gu pai i aina apai ti ni fu aboro Ninive, kina wo a Wiri boro ka du ni gu pai i aina apai ti ni fu gi rika aboro re.

³¹Nakindo pavururago yo nikamo ku ari rago sapangbanga kuti gi rika aboro re, ki gbarasi ngbanga fu yo; bambiko ri aye digida sende yo ka gia gu tatamana nga ga Soromo; oni bi nga, gu ko kina erẽ du ni bahe ti Soromo.

³²Aboro Ninive nikaru ku ari rago sapangbanga na gi rika aboro re, ki gbarasi ngbanga fu yo: bambiko i asa gayo berã mbiko ga Yona tungusa pai fu yo; were oni bí nga, gu ko kina erẽ du ni bahe ti Yona.”

³³“A nga boro sa ka tiga baro ki moi he ku rogo due yo na ni maduka yo a te, ono auru nguaha, ya agu aboro nikarima koyo i ki bi ima ha.

³⁴Bangiro nga gu imarago nga ga kpotoro; ho du bangiro ni ni ruru he, harago nahisa kpotoro yo dunduko; ho du bangiro ni ni iraira ha, bitimo nahisa kpotoro yo.

³⁵Were mo ngére ka ngia gu imarago du vuro yo nangia bitimo.

³⁶Were ka kpotoro yo hi be imarago, ka bitimo du nga yo wa sa ya, si ahi be imarago dunduko, a wo baro niha ki fu imarago foro.”

³⁷Were wa Yesu agumba ha, Farusi ki sana ko i ri riahe na ko; ko ki rimi ki nisungu ka ri riahe.

³⁸Ho Farusi abi he ni, si airiwo airiwo t i ko ya Yesu azunda nga tiko ka ri riahe te.

³⁹Gbia ki ya fu ko, “Were oni nga aFarusi nazunda kina gii inga yo na gii kurungbu yo; ono vuroni ki hi ahi be gbu ahe na gbigbita apai.

⁴⁰Airamungo nga oni! Gu ko namangi gii he yo kina ko namangi vuru he yo ate?

⁴¹Oni fú gamunihe a ni agu ahe du be roni; oni ngére, ahe dunduko ki du ni gigiri he fu roni.

⁴²“Na gberẽ he fu roni aFarusi! bambiko oni nafu sa dagba bawe nga ga danda na anisi na akpepasio dunduko ki he sapangbanga na ga Mbori nyemuse. Gi ka oni amangi he re, ka oni ahe nga manga gu kura ha a ya.

⁴³Na gberẽ he fu roni aFarusi! bambiko oni nakpi nyemu ambata irisa bambutiria yo, na paa aboro kuti roni bangbeahe yo.

⁴⁴Na gberẽ he fu roni! bambiko oni wa agu amurã i abi nga ha ya, agu aboro nandu auru he ka i aina nga ha ya.”

⁴⁵Gu ni sa dagba abainiparugute ki karaga ha ki ya fu Yesu, “Bayugupai, wa mo agumba gi pai re mo nagbarasa rimorani a.”

⁴⁶Yesu ki ya, “Na gberẽ he fu roni abainiparugute a! bambiko oni namaa rõrõi tindiro ku ri aboro, oni tigaoni azada nga tindiro na wirinzagaroni wa sa te.

⁴⁷Na gbẽre he fu roni: bambiko oni nadua agu amurã nga ga anebi, abaroni aimi yo.

⁴⁸Were oni nga adezire he ki idi ga abaroni mangaapai: bambiko i aimi yo, oni ki dua amurãyo.

⁴⁹Were ya ga Mbori tatamana a wẽ, ‘Mi akéda anebi na amokedi fu yo; i aímo agu yo ki rungosi yo.’

⁵⁰Kure anebi dunduko, nga gu i auka ha ho zegino aenge ni daku awere si adú ku ri gi rika aboro re;

⁵¹tona ti kure Ebere ki da ti kure Zakaraya, i aimi ko dagba bamotumo na ziazia bambu. Ya mi fu roni ni rengo, si adú ku ri gi rika aboro re.

⁵²Na gberẽ he fu roni abainiparugute! bambiko oni adi gu wiri rifungura nga ga inahe ku sa yo; oni tigaoni arima nga koyo te, oni ki za agu aboro naye ka rima koyo.”

⁵³Ho Yesu akuru yo ni abakeapai atona turã ko bakere na aFarusi, i ki darĩ ko ko gumba dungu apai;

⁵⁴i ki nikparia ko, ka zia ko ti fugo ngbako yo.