Read zande Ruka 12 Bible Online

Ruka 12 - zande bible

Ruka 12

¹Ni gu rago re, ho rimbasa aboro z azugadi ku ho ni ni dungu kutu yo, i nisimbi nduyo, Yesu ki tona ya fu gako abawiriki mbata, “Oni bánda tironi ti gu agbooro nga ga aFarusi, biriki nga ha.

²A nga he sa du ni dadidadi he, i ka he kusa ha te. A nga he sa du ni okooko ho, i ka he ina pa ha te.

³Si du agu apai oni agumba ku bitimo yo, i agía ha agia ti ni imarago yo; agu apai oni agumba ha ku tue yo ku dimo yo i atúngusa ha ri bambu yo.

⁴“Mi naya fu roni nga abadiangbare, ka oni gúnde nga be agu aboro naimo kpotoboro ya, ka i amanga nga kura pai fuo gu te re.

⁵Ono mi agumba pa gu ni fu roni oni ka gunde ti ni: oni gúnde ti gu ko, rengbe tanduko naba boro ku Geyena yo fuo imo yo ni; ii, ya mi fu roni, oni gúnde be ko.

⁶I nabaga abavurukporo bisue tipa rukutu marã ue te? Bangiri Mbori ago nga ti gu ru wa sa te.

⁷Ono mangerironi tigaha ni gedigedi he dunduko. Ka oni gúnde nga ya; oni nga bahe ti dungu abavurukporo.

⁸“Ya mi fu roni wẽ, gu ni nikakusa pa re barangba aboro, Wiri boro akúsa pa ni barangba ga Mbori amaraika;

⁹ono gu ni nikaora rimore barangba aboro i aóra rimoni barangba ga Mbori amaraika.

¹⁰Agu aboro dunduko ka gumba rimo Wiri boro, i avú yo avu ti ni; ono gu ni ka gberẽ ngbani yo fu Ziazia Toro ka i avú nga ni ti ni ya.

¹¹Ho i ka ye ni na oni ku barangba abambutiria, na barangba abazogo, na agu yo i aasia pai fu yo, ka oni báki nga bangironi ya oni aya wãi na gini pai oni ka karaga ha ki gumba ha ya;

¹²bambiko ni kina gu rago re Ziazia Toro ayúgo gu pai fu roni oni ka gumba ha.”

¹³Gu boro dagba rimbasa ki ya fu ko, “Bayugupai, mo rúgu wirinina ani kpara ũkumbo na ko.”

¹⁴Yesu ki ya fu ko, “Kumba, da nasa re ni basapungbanga mi nikpara ahe fu roni?”

¹⁵Ko ki ya fu yo, “Oni gí he, ka oni dí nga ngbiti ahe ya; bambiko i aringbisa nga ungaboro na gani ahe te.”

¹⁶Yesu ki gumba pai ni sanza fu yo; ki ya, “Gu bino nga ga kumukokumuko kumba nazuku gbe.

¹⁷Ko ki saki he tigako niya, ‘Mi amánga wãi, bambiko a nga ba bere tipa gi zuzuhe te?’

¹⁸Ko ki ya wẽ, ‘Mi amánga gere: mi agbándaka gimi asoro, ki nime kura ha ni bakere he; mi ki igi gimi zuzuhe na gimi ahe dunduko ku rogo ho.

¹⁹Mi ki ya fu mbisimore, Mbisimo, dungu ahe be ro ni igiigi he rengbe na dungu agarã; mo súngu gbua, ki ta ri he, ki nimbiri he, ki ningi angi.’

²⁰Ono Mbori aya fu ko, ‘Iramungo nga mo! I adía mbisimoro adia ni gi yuru re; agi ahe mbakadi mo ho re, iraha nikangia da?’

²¹Wo du gu ni naiga gani ũkumuko tigani, ka ni akumuko nga fu Mbori ya.”

²²Yesu ki ya fu gako abawiriki, “Si du ya mi ti ni fu roni, ka oni wísigi nga pai tipa ungaroni ya, gine oni ka ri he ya, na tipa kpotoroni ya gine oni ka ukadi he ya.

²³Bambiko ungaboro nga bahe ti riahe, na kpotoboro nga bahe ti remu.

²⁴Oni bẽrẽ pa azire, ami arú nga tunga te, ami ake nga he te; gbamu na soro be ra te: Mbori ki nifu riahe fu ra. Genoroni susi geno azire bakere!

²⁵Da dagba roni ka moi bagizabe sa ku ri gani sona ti wisiga pa ha?

²⁶Ka oni arengba nga na manga gu du ni kina toni he tie ya, tipagine oni awisiga pai ti ni tipa gu kura apai?

²⁷Oni bérẽ pa aranga, wa si nasona. Si amanga nga sunge te, si apaa nga remu te; ono ya mi fu roni wẽ, kina Soromo tigako na gako taarimo du, i aukadi nga ko wa gu sa dagba gi te re.

²⁸Ono ka Mbori ukadi nvuo ati yo wa gere nga gu du ho areme, gba i ka ba ha ku we yo; ko aukadi roni susi gere, Ako oni du na toni idapase!

²⁹Ka oni gbáta nga agu ahe oni ka ri he, na gu oni ka mbira ha ya, ka oni sáki nga pa ha kpotoroni yo ya.

³⁰Bambiko arika aboro zegino dunduko nagbata agi ahe re; ono Baroni ini he ya oni nara mbiko agi ahe re.

³¹Ono oni gbáta gako ngbi, i ki kpamia agi ahe re fu roni kuti ni.

³²“Oni nga umba rika aboro, ka oni gúnde nga ya; bambiko si ngba ti Baroni ka fu ngbi fu roni.

³³Oni bági agu ahe du be roni ki gamu he; oni rú agu amangu tipa roni naakpataka nga ya, nga gu Ũkumuko du ngbangbaturũ yo naanyasa nga ya, ka iradĩ ambeda nga koyo ya, ka ayawe agbarasa nga ha ya.

³⁴Bambiko bara ho du gaoni ũkumuko ni, ngbaduroni du kina ku ho a.

³⁵“Oni síkpa gaoni remu, ki tigi gaoni baro;

³⁶oni tigaoni ki du wa agu aboro nasunguda gayo gbia, ho ko ka ye ni kporo pumbo dia de yo. Ho ko ka ye ni ka ngoka ngbadimo, i ki uru he fu ko ni ba sa.

³⁷Aboro maku nga agu amoyambu, gbia ka bi yo ho ko ka ye ni i ningere ti ko. Mi nagumba ha fu roni ni rengo, ko asíkpa gako remu, ki rugu yo i sungu ka ri riahe, ko ki ye ka fu he fu yo.

³⁸Ka ko yega bebere yuru, ka ngia ngbatutu wiso, ko ki bi yo i ningere ti ko, aboro maku nga yo!

³⁹Ono oni ini gi pai re, ya ka irabambu aini ni gu rago iradĩ nikaye ti ni, ka ni angere angera, ka ni aida nga i kuadi gani bambu ya.

⁴⁰Oni mbákadi tironi a wo; bambiko Wiri boro naye ti gu saa oni aberã nga pa ha ya.”

⁴¹Petero ki ya, “Gbia, mo nape pa gi sanza re fu ada watadu fu kina rani na fu aboro dunduko?”

⁴²Gbia ki ya fu ko, “Da nga gu kangara buruku tie du na tatamana, gani gbia ka maa ni ri gako áboro kporo, ni fu gayo riahe fu yo ti ragoho?

⁴³Maku adú fu gu moyambu re, gani gbia ka bi ni ni nimangi wo ho ko ka ye ni.

⁴⁴Ya mi fu roni ni rengo, ko aásia pa gako ahe dunduko fu ni.

⁴⁵Ono ka gu moyambu aya re kpotoni yo wẽ, ‘Gi gbia naima’; ni ki tona taka gu kura amoyambu watadu akumba na ade, ki ta ri riahe nimbiri he ki nikpi buda;

⁴⁶gbia gu moyambu re ayé ni gu uru ni asó nga gima ko ya, ti gu saa ni aína nga ha a ya, ko ki taki ni ni pai, ki ringbisi gani ba na azangaidapase.

⁴⁷Gu moyambu naini sangba gani gbia, ka ni ambakada nga he fu ko ya, ka ni amanga nga sangbako a ya, i atá ni ata ni dungu he;

⁴⁸ono gu ni aina nga pa ha ya, ki mangi gu pai ka i ta ni ti ni, i atá ni ata ni umba ha. Gu ni i ka fu dungu he fu ni, i asána ni ti ni gbe; gu ni i ka asia pa dungu ahe fu ni, i ki kpi nyemu he be ni bakere a.

⁴⁹“Mi ye ka ba we ku sende no; mi amánga wãi ka si aima kĩ?

⁵⁰Bapatiza du ho i ka bapatizi re na ni; na wãi si nazuba re daho si ka du ni ni digisidigisi he ni!

⁵¹Ya oni tigaoni mi ye ku sende no ka fu zereda? Ya mi fu roni, Oó, mi ye ka kparaka aboro.

⁵²Bambiko fuo gere aboro adú bisue rogo bambu sa, i ki kparaka dagba yo, aboro biata kuti aboro ue, na aboro ue kuti aboro biata.

⁵³I akpáraka ba kuti wirini, wiri kuti bani; nari kuti wiriri, wiri kuti nari; nakumbari kuti diaboro, diaboro kuti nakumbari.”

⁵⁴Ko ki ya fu rimbasa aboro a, “Ho oni ka bi mai ni si niye dioyo, oni ki ya, ‘Mai naye ka na’; si ki du wo.

⁵⁵Ho fafoi yuge naya ni pavururago yo, oni ki ya, ‘Rago nikafa gbe’; si ki du wo.

⁵⁶Airabiriki nga oni! Oni ini pa ringbisa agu apai bi oni sende no na ngbangbaturũ yo; ono tipagine oni aruga nga tironi ti ni na pa gi rago re ya?

⁵⁷“Tipagine oni aruga nga tironi ti ni na gu pai ru aru ya?

⁵⁸Bambiko wa mo andu na vuraro koyo du banyaki ni, mo ke na pa kusa tiro be ko, ko ka ndu na mo koyo du basapungbanga ni, basapungbanga ki fu ro ku be baira abanzengere, baira abanzengere ki ba ro ku rogo bambukisa yo.

⁵⁹Ya mi foro, ka mo gúari nga yo wa sa ya, daho mo ka fu ga marã ni dunduko ki dati yangara ru ni sirigi.”