Read zande Ruka 13 Bible Online

Ruka 13 - zande bible

Ruka 13

¹Were aboro ki du yo ni gu rago re nagumba pa agu aboro Gariraya fu Yesu, Pirato nakodi kureyo na gayo amotumo.

²Yesu ki karaga ha ki ya fu yo, “Ya oni tigaoni ya agi aboro Gariraya re nangia aboro ingapai ki susi aboro Gariraya dunduko, bambiko i ahi pai ti agi apai re?

³Mi nagumba ha fu roni, Oó, ka oni asá nga gaoni berã ya, oni akpí akpi wa kina yo dunduko.

⁴Na agu yo nadu 18 gu gbanga bambu nadu Siroa yo ati ku auru yo, ki imi yo, ya oni i nangia aboro ingapai ki susi aboro Yerusarema yo dunduko?

⁵Mi nagumba ha fu roni, Oó: ka oni asá nga gaoni berã ya, oni akpí akpi wa kina yo dunduko.”

⁶Ko ki gumba gi sanza re; “Kumba arú vurumo rogo gako ati bakakue; ko ki ta ye nigbata rindihe ti ni, ka ko abi nga ha ya.

⁷Ko ki ya fu babanda bakakue, ‘Were, mi aye ka gbata rindihe ti gi vurumo re garã ki du biata, ka mi abi nga ha ya; mo dé he; tipagine si naka na sende ti ni a gbua?’

⁸Ko ki karaga ha niya fu ko, ‘Gbia, mo he he ni gi garã re a, mi ge pati he kirikiri, ki nimbakadi he ni miri anya.

⁹Si ngia si ki zu fuo ho, si angbá; ka si azú nga ya, mi ki de he ade.’ ”

¹⁰Yesu ki yugu pai bambutiria yo rago sabiti.

¹¹De adu yo nakaza garã ki du 18; ri ki nuga anuga, ka si adu nga wa ka ri ru nzunzu ya.

¹²Ho Yesu abi ri ni, ko ki yambu ri, ki ya fu ri, “Na, i zaki ro ti ga kaza.”

¹³Ko ki moi beko auru ri; ri ki ru nzunzu ni basa, ki taasi rimo Mbori.

¹⁴Ngbadubaira bambutiria ki niimi aima bambiko Yesu ahusi ri rago sabiti; ko ki ya fu rimbasa aboro, “Rame du sita aboro mangi sunge. Oni ye ka hu rago ho, ka oni yé nga rago sabiti ya.”

¹⁵Gbia ki karaga ha fu ko ki ya, “Airabiriki nga oni! Oni nazaka gaoni bagara na gaoni dongi dimo yo, ka ndu na ami ku pati ime rago sabiti wa du oni dunduko ni ba sa sa, te?

¹⁶Gi de re nangia tita Abarayama, gu ri Satana avodi ri garã ki du 18, si ru i zaki ri be gi kaza rago sabiti te re?”

¹⁷Wa ko agumba agi apai re, zee amangi avurako amanga dunduko. Ngbarago ki mangi rimbasa aboro dunduko tipa gu iiriwo pai nadu ni mangimangi he be ko dunduko.

¹⁸Yesu ki ya, “Ga Mbori ngbi nawira gine? mi aríngbisa ha kuti gine?

¹⁹Si wa tunga musutada, kumba adi he, ki rũ he rogo gako ati; si ki moi pai ki wiri bangua; agu azire du ari yo ki nisungu ti be he.”

²⁰Yesu ki ya berewe, “Mi aríngbisa ga Mbori ngbi kuti gini he?

²¹Si wa agbooro, de adi he ki oko ho rogo ringbisiringbisi ngungo biata, daho si angbi ni rogo ho dunduko.”

²²Yesu ki ta merã ka ta dagba abaakporo na akporo, niyugu pai, ninungu kindi ku Yerusarema yo.

²³Boro ki ya fu ko, “Gbia, watadu i abatasa aboro ni kina umba yo?” Ko ki ya fu yo,

²⁴“Oni ásadi ka rima ku rogo pangipangi ngbadimo yo bambiko mi naya fu roni, dungu aboro agbáta gene ka rima koyo, ka i aréngba nga ya.

²⁵Ho irabambu ka mo ni ki kisi ngbadimo, oni ki tona ka ru zegi yo ki nita ngbadimo, niya, ‘Gbia, mo uru he fu rani.’ Ko ki karaga ha ki ya fu roni, ‘Mi aina nga ho oni aye ni te.’

²⁶Ono oni ki tona ka gumba ha, ‘Ani amongo niri riahe ki mbiri he na mo, mo ayugu pai kpurani yo.’

²⁷Ko ki ya, ‘Mi nagumba ha fu roni, mi aina nga ho oni aye ni te; oni gúari ti re nga aboro manga gbegberẽ pai dunduko!’

²⁸Ho oni ka bi Abarayama ni na Yisaka na Yakoba na anebi dunduko rogo ga Mbori ngbi, oni ki du ni baba roni ku zegi yo, oni akpára gbe, oni ki rundu ngba rindironi.

²⁹Aboro ayé uroyo na dioyo na pavururago yo ki sungu rogo ga Mbori ngbi.

³⁰Oni ngére, agu aboro du sa yo i nikadu mbata yo, agu yo du mbata yo nikadu sa yo.”

³¹Ti kina gu rago re aFarusi ki ta ye, niya fu Yesu “Mo gúari erẽ ki merẽ; bambiko Erode nakpi nyemu imo ro.”

³²Ko ki ya fu yo, “Oni ndú ki ya fu gu uá re, ‘Oni ngére, mi adánda adaimona ki nihusi aboro kaza areme na gba, biata uru mi ki du ni teketeke re.

³³Ono mi amérã areme, na gba, na kuragba; bambiko a nga nebi sa nikakpi he Yerusarema koyo te.’

³⁴Ako aboro Yerusarema, aboro Yerusarema, ninaimo anebi, ki nizumudi agu yo i akedi yo fu roni! Mi akpi nyemu dungura awironi a wa kondo nadungura awiru tii puporu bara wãi, ka oni aida nga ha ya!

³⁵Oni ngére, i he gaoni kporo fu roni ni bate. Mi ki ya fu roni, oni abí nga re berewe te, daho oni ka ya ni, ‘Mbori fu maku fu gu ko naye ni rimo Gbia!’ ”