Read zande Ruka 14 Bible Online

Ruka 14 - zande bible

Ruka 14

¹Si ki ta du wa gere, ho Yesu arimi ni ku rogo gu bambu nga ga gu baira aFarusi rago sabiti ka ri riahe, i ki pidi ko.

²Mo ngére, kumba ki ye koyo du ko ni nakaza be bumbu.

³Yesu ki ta karaga ha fu abainiparugute na aFarusi niya, “Watadu husa boro na he ni, gini gu ru rago sabiti?”

⁴I ki ongo aonga. Ko ki di ko, ki husi ko, ki nihe ko ko ga.

⁵Yesu ki ya fu yo, “Da dagba roni ka gani dongi watadu bagara ti ku guga yo rago sabiti, ni ka he dia ru yo ni ba sa?”

⁶Ka i arengba nga na karaga pai kuti agi apai re ya.

⁷Yesu ki gumba sanza fu agu aboro nadu ni yambuyambu yo, ho ko abi he ni ya i nasia tumbatumba basunga; ko ki ya fu yo,

⁸“Ho boro ka yamba ro ni ku kporo pumbo diade, ka mo súngu nga auru tumbatumba basunga ya; gu boro ka ye du ni iriiri ni ti ro,

⁹gu ni nayambu roni na ko ka ye ki niya foro, ‘Mo fú basunga fu gi kumba re’; mo ki tona dia tiditidi basunga ni zee.

¹⁰Ono ho i ka yamba ro ni; mo ndú ka sunga auru tiditidi basunga; ho gu ni ka ye ni nayambu ro, ko ki ya foro, ‘Badiangbare, mo ndú ku auru gu basunga du ni tumbatumba ha ti gere’; taarimo ki du foro bangiri agu aboro dunduko nasunga ka ri riahe na mo.

¹¹Bambiko gu boro nakiisa tini i aúmbasi pa ni aumbasi; gu ni naumbasi tini, i akíisa pa ni.”

¹²Ko ki ya fu gu ni nayambu ko a, “Ho mo ka mbakada pumbo ni, ka mo yámbu nga abadiangbaro, na awirinamo, na agumero, na agu akuaro du ni kumukokumuko aboro ya, i ka yamba ro tigayo berewe, si ki du wa i afu mosoro foro.

¹³Ho mo ka mbakada pumbo ni mo yámbu rungorungo aboro, na terengeterenge aboro, na airavurari.

¹⁴Mo ki du ni boro maku; bambiko he be yo ka fu mosoro foro te. Bambiko i afú mosoro foro rago zinga ruru aboro be kpio.”

¹⁵Ho gu ni dagba agu yo nasungu ka ri riahe na ko agi agi apai re ni, ni ki ya fu ko, “Boro maku nga gu ni ka ri riahe rogo ga Mboringbi!”

¹⁶Ono Yesu ki ya fu ko, “Gu boro ambakadi bakere pumbo; ko ki yambu dungu aboro.

¹⁷Ko ki kedi gako moyambu rago riahe ka ya fu agino, ‘Oni yé bambiko i mbakadi ahe dunduko awere.’

¹⁸I ki karaga tiyo ni ba sa sa dunduko. Gu ni sa aya fu ko, ‘Mi angbe ati, mi nandu ka bi he; mi nakpara foro mo he he fere.’

¹⁹Kura ni ki ya. ‘Mi angbe abagara sunge ni ba ue bara bisue, mi nandu ka asada ra; mi nakpara foro mo he he fere.’

²⁰Kura ni ki ya, ‘Mi di de, si du ka mi aye nga ti ni ya.’

²¹Moyambu ki ga, ki gumba agi apai re fu bairako. Irakporo ki ta era niya fu gako moyambu, ‘Mo kúru ni ipo ku rogo bakere agene na umba agene bakporo yo, ki niye na rungorungo aboro kono na terengeterenge aboro na airavurari.’

²²Moyambu ki ya, ‘Gbia, i mangi he wa mo arugu he, abasunga kina ho kindi.’

²³Bairako ki ya fu moyambu, ‘Mo kúru ku zegi yo, ku rogo gu bakere agene na andugu du ringara yo, ki zungadi aboro i rimi, kpure ki hi ahi.

²⁴Bambiko ya mi fu roni, a nga boro sa dagba agu aboro i ayambu yo nikari gi riahe te.’ ”

²⁵Were bakere rimbasa aboro ki mongo ndu na Yesu. Yesu ki sa tiko, ki ya fu yo,

²⁶“Gu ni ka ye fuo re, ka ni asoga nga bani na nani na diani, na awirini, na awirinani, na adewirini, ii, na ungani a tigaha ya, ka ni du nga ni gi bawiriki te.

²⁷Gu ni ka aaka nga gani wagiwagi ngua, ki ye fuo re ya, ka ni du nga ni gi bawiriki te.

²⁸Bambiko da dagba roni yo, ka ni kpi nyemu ka dua gbanga bambu, ni ka he sunga mbata, ka geda paha, ka ngia marã be ni rengbe kanyasa ha?

²⁹Bambiko, ho ni ka mbakada mburuhe ni, ka ni arengba nga na nyasa ha ya, agu aboro dunduko ka bi he i ki tona moma ni,

³⁰niya, ‘Gi kumba re atona dua ha ka ni arengba nga na nyasa ha ya.’

³¹Gini bakindo nga gu ni ka ndu ka gbia kura bakindo ni vura, ka ni asunga nga ka baka bangirini mbata, si ngia ni rengbe na aboro 10,000 ka so vura na gu ni naye kuti ni na aboro 20,000 ya?

³²Ka si adu nga wo ya, ko akeda sunge, ho kura ni ata du ni koyo tuturu, ka sana he tipa zereda.

³³Were gu ni dagba roni yo, ka ambu nga gani ahe dunduko ya, ka ni du nga ni gi bawiriki te.

³⁴“Ngba tikpo angba; ono ka tikpo ahia nga ya, si ahia be gine?

³⁵Si angba nga tipa sende, na tipa guguda te; i nabafa ha ku zegi yo. Gu ni du na tu gia ha ti ni, ni gí he.”