Read zande Ruka 15 Bible Online

Ruka 15 - zande bible

Ruka 15

¹Were abarogo marã ngbeti ki tiria koyo du Yesu ni na aboro ingapai dunduko ka gia gako pai.

²AFarusi ki gumba rimoko na abakeapai, ki ya, “Gi kumba re nadia aboro ingapai ku gume, ki niri riahe na yo.”

³Yesu ki gumba gi sanza fu yo re, ki ya.

⁴“Gini boro ka du dagba roni yo na akandoro 100 be ni, ka gu ru ingi dagba ra sa, ni ambu nga agu ra 99 ngbakungba yo, ka ndu ka gbata gu ru naingi, da kina ho ni ka bi ru ni, te?

⁵Ho ni ka bi ru ni, ni ki wagi ru pagoni ni ngbarago.

⁶Ho ni ka da ni kporo yo, ni ki ta yamba abadiangbani na akurani dunduko, ki ya fu yo, ‘Ani mongo ngí angi na oni, bambiko mi bi gi kandoro naingi.’

⁷Ya mi fu roni, kina wo i ka ngi angi ngbangbaturũ yo tipa gu boro ingapai sa ka sa gani berã, susi gu ka du tipa ruru aboro 99, ka akpi nga nyemu saberã ya.

⁸“Berewe, gini de ka du na marã be ri bawe, ka gu ru ingi dagba ra sa, ri atiga nga baro, ki wege bambu, ki gbata ru kakaka da kina ho ri ka bi ru ni, te?

⁹Ho ri ka bi ru ni, ri ki ta yamba abadiangbari na akurari dunduko koyo du ri ni, niya, ‘Ani mongo ngí angi na oni, bambiko mi bi gu marã naingi.’

¹⁰Ya mi fu roni, kina wo ngbarago adu dagba ga Mbori amaraika tipa gu boro ingapai sa ka sa gani berã.”

¹¹Ko ki ya berewe, “Kumba nadu na awiriko ue;

¹²tame ki ya fu bako, ‘Buba, mo fú gu ũkumuko fere du ni gimi.’ Si du ko ki kparaka gako ahe fu yo.

¹³Fuo rame ngbutuko tame ki tangara gako ahe dunduko ki ndu ku rogo ringara tuturũ; ko ki gbandaka gako ũkumuko yo ni nzanga.

¹⁴Ko agbandaka ha dunduko kere gberãngbi ki niti ku rogo gu ringara re. Zingo ahe ki tona ka manga ko.

¹⁵Ko ki ndu koyo du gu boro ni rogo gu ringara re; ni ki kedi ko ku rogo gani ngbi ka riga amukuru.

¹⁶Ko akpi nyemu ka mbi ni sisi gu he amukuru ari he; a nga boro nafu he fu ko wa sa te.

¹⁷Ho ko amakia pa tiko ni, ko ki ya, ‘Bakere riahe du be ga buba amoyambu ni dungu yo, mi tigimi nakpi erẽ be gomoro!

¹⁸Mi agúari ki ndu koyo du buba ni, mi ki ya fu ko, “Ba, mi ingi pai kuti ngbangbaturũ na barangba ro;

¹⁹ka mo yambu nga re ni rimo wiro berewe ya; mo sá re ni kina gu ni dagba gamo amoyambu.” ’

²⁰Ko ki guari ki ndu koyo du bako ni. Ono wa ko adu tuturũ, bako ki bi ko, nungako ki nimangi ko, ko ki oro, ki ti ku goko yo, ki dungo ko gbe.

²¹Wiriko ki ya fu ko, ‘Ba, mi ingi pai kuti ngbangbaturũ na barangba ro; ka mo yámbu nga re ni rimo wiro ya.’

²²Ono bako ki ya fu gako amoyambu, ‘Oni kúsi gu remu ngba susi ki ukadi ko na ni; ki moi tongo ku beko yo, na katara ku nduko yo;

²³oni ki ye na gu wiri bagara wiri wa nze u anze kono, ki imi ru, ani ta ri ru ningi angi dagba rani.

²⁴Bambiko gi wire re akpi, ki du ni ungako berewe; ko adu ni ngbuongbuo ko, mi ki bi ko berewe.’ I ki tona ka ngi angi dagba yo.

²⁵“Were unvurako adu ati yo; wa ko aye ka mbeda ku bambu yo, ko agi woro kundi aboro nido.

²⁶Ko ki yambu gu moyambu sa koyo du ko ni, ki sana ni si nimangi wãi.

²⁷Ni ki ya fu ko, ‘Tamero ye; bamo ki imi gu wiri bagara wiri wa nze u anze, bambiko ko ayega teketeke.’

²⁸Ko ki nierẽ aerã, ka ko aida nga ka rima koyo ya. Bako ki kuru, ki zúngadi ko.

²⁹Ko ki karaga ha ki ya fu bako, ‘Mo bí nga, gi dungu agarã re mi amangi sangbaro, ka mi agusa nga sangbaro wa sa ya. Mo ata fu nga wiri meme fere ka mi ngi angi na abadiangbare te.

³⁰Ono ho gi wiro re aye ni, nga gu ko nabagi ga ũkumuko fu airabari, mo ki imi wiri bagara wiri wa nze u anze tipa ko!’

³¹Bako ki ya fu ko, ‘Wire, mo du na mi kindi, gimi ahe dunduko nga gamo.

³²Ono si ru ka ngi angi ni ngbarago; bambiko gi tamero re akpi, ki du ni ungako berewe; ko adu ni ngbuongbuo ko, ani ki bi ko berewe.’ ”