Read zande Ruka 17 Bible Online

Ruka 17 - zande bible

Ruka 17

¹Yesu ki ya fu gako abawiriki, “Agu apai aboro nakota mbiko ho ka si he nga ye te; ono rungo du fu gu ni gu pai ka ye be ni re!

²Si ka ngba tipa ni i vo kikii mbi asa ahe kuti goni, ki ba ni ku baime yo, ti manga ni gu ni sa dagba gi rukutu yo re ni koto.

³Oni bánda tironi abanda, ka wirinamo ingi pai kuti ro, mo ki za ni; ka ni sa gani berã, mo ki vu ni ti ni.

⁴Ka ni ingi kuti ro bara saba na uru, ki sa tini berewe bara saba, niya, ‘Mi sa gi berã,’ mo ki vu ni avu.”

⁵Amokedi ki ya fu Gbia, “Mo kíisi gaani idapase.”

⁶Gbia ki ya, “Ka gaoni idapase du wa tunga musutada, ka oni aya fu gi ngua re, ‘I mó ro ki rũ ro baime yo;’ ka si agia sangbaro.

⁷“Ono da dagba roni ka du na gu moyambu nasopa bino watadu banda akandoro, ni ka ya fu ni, ho ni ka ye ni ati yo, ‘Mo yé ki sungu ni ba sa?’

⁸Ono ni aya fu ni, ‘Mo mbákadi ahe mi ri he, mo ki tapa tiro, ki niru pati re daho mi ka ri he ni ki mbiri he; fuo gure mo ki ri riahe ki mbiri he,’ te?

⁹Ni natambua gu moyambu re bambiko ni amangi he wa i arugu ni?

¹⁰Kina wo, ho oni amangi ahe ni dunduko wa i arugu roni ti ni, oni yá tigaoni, ‘Ani nga mumungo amoyambu; ani mangi kina gu nga gaani pai.’ ”

¹¹Si ki ta du wa gere, wa i andu ku Yerusarema yo, ko ki susi rogo Somorona na Gariraya.

¹²Wa ko arimi ku rogo gu kporo, akumba ki gbia ko bawe naakaza be ngbataka, i ki ru koyo tuturũ.

¹³I ki poi ku ari, niya, “Yesu, Baira, mo íni pai fu rani.”

¹⁴Ho ko abi yo ni, ko ki ya fu yo, “Oni ndú ki yugu tironi fu aboromotumo.” Si ki ta du wa gere, wa i andu, i ki hu ahu be gayo ngbataka.

¹⁵Gu ni sa dagba yo, ho ni abi he ni ya ni hu, ni ki sa tini, ki irisi Mbori ni bakere fugo;

¹⁶ni ki ta vagada pati nduko, nitambua ko; ni nangia boro Somorona.

¹⁷Yesu ki karaga ha ki ya, “I ahusa nga yo bawe te? ono agu yo ribua i wari?

¹⁸A nga agu yo niye ka fu taarimo fu Mbori fuo kina gi uro te re?”

¹⁹Ko ki ya fu ni, “Mo rú ku ari, ki ga; ga idapase batasi ro.”

²⁰Ho aFarusi asana Yesu ni ya ni gini rago ga Mbori ngbi ka ye, ko akaraga ha ki ya, “Ga Mbori ngbi aye nga ni ngera nganganga te.

²¹I agumba nga, ‘Mo bí, si erẽ!’ na, ‘Si yore!’ te, bambiko ga Mbori ngbi du kpotoroni yo.”

²²Ko ki ya fu gako abawiriki, “Rago nikada, ho oni akpi nyemu ka bi gu rago ni sa nga ga Wiri boro, oni abí nga ha te.

²³I ki ya fu roni, ‘Oni bí, yore!’ ‘Oni bí, erẽ!’ Ka oni ndú nga fuo yo ka peka yo ya.

²⁴Bambiko wa we gumba naikpira ni gbanga ha ngbangbaturũ yo; kina wo Wiri boro ka du rogo gako rago.

²⁵Ono ko ka hi dungu apai mbata, gi rika aboro re nikambu ko.

²⁶Wa si adu rago Noa, kina wo si ka du rago Wiri boro.

²⁷I ari riahe, ki mbiri he, i arogo ade, i ki fu ade i rogo yo, daho Noa arimi ni ku rogo bakere kurungba, bakere ime ki hiki ahika na ngbi dunduko, ki gbarasi yo dunduko.

²⁸Kina wo si adu ti rago Roto ― i ari riahe, ki mbiri he, i angbe he, i abagi he, i arú he, i adudua ahe;

²⁹ono ni gu rago Roto akuru Sodoma yo we ana ngbangbaturũ yo na ambia, si ki gbarasi yo dunduko―

³⁰rago yugo Wiri boro nikadu kina wo.

³¹Ni gu rago re, gu ni ka du ri bambu yo, gani ahe ki du dimo yo, ka ni zórõ nga ka roga ahe ya; gu ni ka du ati yo a, ka ni káraga nga tini ya.

³²Oni tíngidi pa dia Roto.

³³Gu ni ka kpi nyemu batasa ungani, ni aíngisa ha aingisa. Ono gu ni nikaingisa ungani ni abátasa ha abatasa.

³⁴Ya mi fu roni wẽ, ni gu yuru re akumba ue apí auru barame sa; i adía gu ni, i ki he gu ni.

³⁵Ade ue amongo sa ahe; i adía gu ni, i ki he gu ni. [

³⁶Akumba ue adú ati yo; i adía gu ni, i ki he gu ni.”]

³⁷I ki karaga ha ki ya fu ko, “Wari Gbia?” Ko ki ya fu yo, “Ho kangba ka du ni, yo anguku nikadungura tira ku ho ni.”