Read zande Ruka 18 Bible Online

Ruka 18 - zande bible

Ruka 18

¹Yesu ki pe pa sanza fu yo tipa gi pai re nga aboro ka kpara dedede, ka i mbu nga be he ya.

²Ko ki ya, “Basapungbanga adu rogo bakporo, ko agunde nga ti Mbori te ka ko aberã nga pa aboro a ya.

³Dekurugbo adu rogo gu bakporo re a; ri ki ye koyo du ko ni dungu rago, niya, ‘Mo káraga pa vurare.’

⁴Ko aida nga ha fu ri ni ipo te. Ko ki ya tigako giza, ‘Ka mi avura gunde nga ti Mbori, ki niberẽ pa aboro ya;

⁵were bambiko gi de re nadogosa re, mi nikakaraga pa vurari, si ngia ri nikaye kindi mi ki mbu be ri.’”

⁶Gbia ki ya, “Oni gí gu pai gbegberẽ basapungbanga agumba.

⁷Mbori akáraga nga pa gako siasia aboro nga agu yo nakpara fu ko na uru na yuru, te? nga agu yo ko nahi pai fu yo, te?

⁸Ya mi fu roni, ko akáraga payo ni ngarã. Ono ho Wiri boro ka ye ni, ko abi idapase kpoto sende no?”

⁹Yesu ki gumba gi sanza re a fu agu aboro naberã ha tigayo ya ruru aboro nangia yo, ki basa pa kura aboro:

¹⁰“Akumba ue abiti ku yekaru yo ka kpara; gu ni nangia Farusi, gu ni nangia barogo marã ngbeti.

¹¹Farusi ki ru ki nikpari tigako wa gere, ‘Mbori, mi natambua ro, bambiko mi adu nga wa kura aboro, nga abatuka, na airabiriki, na airabari, na wa kina gi barogo marã ngbeti re a te.

¹²Mi nagina riahe bara ue rogo poso sa, mi nakpara gimi ahe dunduko ki ru gu fu Mbori.’

¹³Ono barogo marã ngbeti ki ru tuturu, ko angera nga ku ngbangbaturũ yo a te, ono ko ata ngbaduko ki ya, ‘Mbori, mo íni pai fere nga boro ingapai!’

¹⁴Ya mi fu roni, gi kumba re azorõ ku kpuko yo ni ruru ko ti gu kura kumba; bambiko gu ni nakiisa tini i aúmbasi pa ni aumbasi; gu ni naumbasi tini i akíisa pa ni akíisa.”

¹⁵Aboro ki ye koyo du Yesu ni na gayo fogo agude a, ko zazadi yo. Ono ho abawiriki abi he ni, i ki za yo.

¹⁶Ono Yesu ayambu yo koyo du ko ni, niya, “Oni he rukutu agude i ye fuo re, ka oni káraga nga yo ya; bambiko avuru ga Mbori ngbi wa kina yo.

¹⁷Ya mi fu roni ni rengo, ka boro adia nga ga Mbori ngbi wa toni gude ya, ni rimi nga koyo wa sa te.”

¹⁸Banyaki ki sana ko niya, “Wene Bayugupai, mi amánga wãi ka dia nyenye unga?”

¹⁹Yesu ki ya fu ko, “Tipagine ya mo ti re ti ni, wene? a nga boro sa du ni wene ni te, kina Mbori sa.

²⁰Mo ini rugute, ‘Ka mo mángi nga bari ya, Ka mo imi nga boro ya, Ka mo dí nga he ya, Ka mo gúmba nga zire kuti boro ya, Mo irisi bamo na namo.’ ”

²¹Ko ki ya, “Mi atona manga agi apai re dunduko ho mi adu ni ni gude.”

²²Ho Yesu agi he ni, ko ki ya fu ko, “Pai ho sa mo ata manga nga ha ya. Mo bági agu ahe dunduko du be ro, ki gagamu he fu rungorungo aboro, mo akumuko ngbangbaturũ yo; mo ki ye, ki nipeke re.”

²³Ho ko agi gi pai ni re, ko ki rungo arungo bambiko ahe adu be ko gbe.

²⁴Yesu ki ta bi ko niya, “Kpakara rima ku rogo ga Mbori ngbi akpakara fu agu yo kumuko akumuko gbe!

²⁵Bambiko ka kameri kuru rogo yaro mbereke yo, si ka ipo ti rima kumukokumuko boro ku rogo ga Mbori ngbi yo.”

²⁶Agu yo nagi he i ki ya, “Da ka bati tie?”

²⁷Ko ki ya, “Agu apai ka aboro amanga nga ha ya, ka Mbori mangi he amanga dunduko.”

²⁸Petero ki ya, “Mo ngére, ani ambu gaani ahe, ki nipeke ro.”

²⁹Ko ki ya fu yo, “Mi nagumba ha fu roni ni rengo, ka boro he gani bambu, na diani, na awirinani, na avunguni, na awirini tipa ga Mbori ngbi,

³⁰ni azía ahe bakere ti gure ni gi rago re, na nyenye unga rogo gu ngbi nikadu yo.”

³¹Yesu ki yambu agu yo nanidu bawe na ue koyo du ko ni, ki ya fu yo, “Oni ngere, ani nandu ku Yerusarema yo, agu apai dunduko anebi ake he tipa Wiri boro si adú ni mangimangi he yo.

³²Bambiko i afú ko fu aGendiria, i ki sawia ko nimangi ko gbegberẽ, ki nisukudi ko.

³³I ki nitaki ko, ki imi ko; biata uru ko ki zingi berewe.”

³⁴Ka i aruga nga tiyo na agi apai re wa sa ya; gi pai re ki du ni okooko ho ti yo, ka i aina nga gu pai ko agumba ha fu yo wa sa ya.

³⁵Si ki ta du wa gere wa Yesu ambedi ku Yereo yo, iravurari ki sungu pangba gene ni kangadu.

³⁶Ko ki ta gia woro rimbasa aboro wa i asusa, ko ki sana he ya gini pai dũ.

³⁷I ki ya fu ko, “Yesu nga boro Nazareta nasusa.”

³⁸Ko ki poi ku ari, niya, “Yesu, mo wiri Dawidi, mo íni pai fere.”

³⁹Agu aboro nandu mbata yo i ki za ko, ko ongo. Ko ki poi ku ari si ki susi gu nadu mbata, “Mo wiri Dawidi, mo íni pai fere.”

⁴⁰Yesu ki ru ki rugu yo i ye na ko. Ho iravurari ambedi ni koyo du Yesu ni, Yesu ki sana ko ki ya,

⁴¹“Gini he mo nakpi nyemu mi mangi he foro?” Ko ki ya, “Gbia mi ngére.”

⁴²Yesu ki ya fu ko, “Mo ngére; ga idapase batasi ro.”

⁴³Ko ki ngere angera ni ba sa, ki nipe ko, nitaasi rimo Mbori. Aboro dunduko, ho i abi he ni, i ki tambua Mbori.