Read zande Ruka 19 Bible Online

Ruka 19 - zande bible

Ruka 19

¹Yesu ki rimi ku Yereo yo ki nisusi.

²Oni ngére, kumba ki du yo rimoko nangia Zakayo; nangia gbia abarogo marã ngbeti, boro kumuko nangia ko.

³Ko ki asadi ka bi Yesu ya da du? ka ko arengba nga na ni ya mbiko rimbasa, bambiko guru boro nangia ko.

⁴Ko ki oro ku mbata yo, ki dakpa vurumo ka bi ko; bambiko Yesu nikasusa pati he.

⁵Ho Yesu aye ni koyo, ko ki ngere ku ari, ki ya fu ko, “Zakayo, mo mó ka zorã; bambiko mi ka sunga kpuro yo areme.”

⁶Ko ki mo, ki nizorõ, ki di ko ku gume ni ngbarago.

⁷Ho rimbasa abi he ni, i ki gumba rimoko dunduko, niya, “Ko andu ka sunga koyo du boro ingapai ni.”

⁸Zakayo ki ru, ki ya fu Gbia, “Gbia, mo ngére, mi nagama bebere gi ũkumuko fu rungorungo aboro; ka mi adĩ he be boro wa aru nga ha ya, mi agása ha fu ni ki nimoi kura ha ti ri he bara biama ti gu nadu mbata.”

⁹Yesu ki ya fu ko, “Bata ye kuti gi bambu re areme, bambiko wiri Abarayama nga ko a.

¹⁰Bambiko Wiri boro aye ka gbata ngbuongbuo aboro ka batasa yo.”

¹¹Wa i agia agi apai re, Yesu agumba kura pai ku ri he ni sanza fu yo a, bambiko ko ambedi ku Yerusarema yo, bambiko i aberẽ he ya ga Mbori ngbi nikada ni ba sa.

¹²Si du ko aya fu yo ti ni, “Gu gbia andu ku rogo ringara yo tuturũ, ka dia ngbi ni gako ki yega.

¹³Ko ki yambu gako amoyambu bawe, ki nifu marã fu yo bawe, ki niya fu yo, ‘Oni bábagi he da kina ho mi ka yega ni.’

¹⁴Ono avuruko asogo ko asoga, i ki kedi sunge fuo ko, niya, ‘Ani aida nga ha fu gi kumba re ko zogo rani te.’

¹⁵Si ki ta du wa gere, ho ko ayega ni, fuo dia ko ngbi, ko ki ya i yambu gu gako amoyambu, ko afu marã fu yo re, i ye koyo du ko ni, ya ko ini pa gu mokiisa i akiisi he na ni wa i ababagi he.

¹⁶Bambata ni ki ta ye koyo du ko ni, niya, ‘Gbia, ga marã si kii wa marã bawe ku ri gu nadu.’

¹⁷Ko ki ya fu ni, ‘Wene moyambu nga mo! Mo amangi he wenengãi. Bambiko i abi ro ni kangara ro wa si adu be ro toni, mi aásia pa akporo bawe foro.’

¹⁸Ue ni ki ye, ki niya, ‘Gbia, ga marã si kii wa marã bisue.’

¹⁹Ko ki ya fu ni a, ‘Mi aásia pa akporo bisue foro a.’

²⁰Kura ni ki ta ye, niya, ‘Gbia, mo ngére, ga marã du re, mi aigi he ku rogo wiri roko;

²¹bambiko mi agunde be ro, bambiko wa du mo ni nyanyaki boro; mo nadia gu mo afu nga ha ya, mo nake gu mo arũ nga ha a ya.’

²²Ko ki ya fu ni, ‘Mi asápa ngbanga ro ti kina gu pai nakuru ngbaro yo, gbigbita moyambu nga mo! Mo aini he ya mi nga nyanyaki boro, mi nadia gu mi afu nga ha ya, ki nike gu mi arũ nga ha ya;

²³tipagine tie mo aiga nga gi marã ti ni ku rogo bambumarã yo ya, ya ho mi ka yega ni mi bi he na kura ha ti ri he?’

²⁴Ko ki ya fu agu aboro naru ho, ‘Oni dí gu marã be ko re, ki fu he fu gu ko du na marã be ko bawe’

²⁵I ki ya fu ko, ‘Gbia, si du be ko bawe!’

²⁶‘Ya mi fu roni, gu ni du na he be ni i afú he fu ni; ono gu ni adu nga he be ni ya, gu toni he ka du be ni i adía ha be ni.

²⁷Ono agi avurare re naida nga mi zogo yo te, oni yé na yo kono, ki imi yo barangba re.’ ”

²⁸Ho Yesu agumba ha ni were, ko ki mere mbata yo nindu ku Yerusarema yo.

²⁹Si ki ta du wa gere, ho ko ambedi ni ku Betefage yo na Betania yo, ku pati bagangara Aeraya, ko ki kedi abawiriki ue,

³⁰niya, “Oni ndú ku rogo gu kporo du pati roni. Wa oni ka da yo oni abi paranga dongi vo yo ru; i ata sunga nga auru ru mbata te. Oni ki zaki ru, ki ye na u.

³¹Ka boro sana roni ya, ‘Oni nazaka ru tipagine?’ oni ki ya fu ni wẽ, ‘Gbia nakpi nyemu ru.’ ”

³²Agu yo i akedi yo i ki guari, ki bi he kina wa ko agumba ha fu yo.

³³Wa i azaka paranga dongi, airaru ki ya fu yo, “Tipagine oni nazaka paranga dongi ti ni?”

³⁴I ki ya, “Gbia nakpi nyemu ru.”

³⁵I ki ye na u koyo du Yesu ni; i ki ba gayo aremu auru paranga dongi, ki nitumba Yesu ku auru ru.

³⁶Wa ko andu, i ki gbaragi gayo aremu gene.

³⁷Ho ko ambedi ni ku Yerusarema yo, ti ngbadu bagangara Aeraya, rimbasa abawiriki dunduko ki tona ka ngi angi ki niirisi Mbori nipoi ku ari tipa agu apai du na tandu i abi;

³⁸niya, “Mbori fu maku fu gu bakindo naye ni rimo Gbia! Zereda du ngbangbaturũ yo, na taarimo ri arago du!”

³⁹Agu aFarusi nadu dagba rimbasa yo ki ya fu ko, “Bayugupai, mo zá gamo abawiriki.”

⁴⁰Yesu ki karaga ha ki ya, “Mi nagumba ha fu roni ya, ka agi aboro ongo aonga re, ambia apáa ku ari.”

⁴¹Ho Yesu ambedi ni, ko ki bi bakporo, ki ta kpara mbiko ho,

⁴²niya, “Ako! ka oni aini agu apai nga ga zereda, ni gi rago re tigaoni! Ono awere si ni okooko ho ti bangironi.

⁴³Bambiko rago nikaye ku ri roni, ho avuraroni ka ba nduka ni kirikiri pati roni, ki ke pati roni, ki kisi rago pati roni dunduko,

⁴⁴ki merẽ roni ku sande, na awironi a. I ahe nga gu mbia auru kura ha rogo bakporo wa sa te; bambiko oni aina nga gu rago ye Mbori ka manga pa roni te.”

⁴⁵Ko Ki rimi ku yekaru yo, ki tona danda agu yo ku zegi yo nanababaga ahe,

⁴⁶niya fu yo, “Si ni keke he, ‘I aya ti gi bamou bambu kparakpe,’ ono oni asa ha ni yaro abatuka.”

⁴⁷Ko ki yugu pai na uru yekaru yo. Ono abairamotumo na abakeapai na abanyaki i aasadi ka imo ko:

⁴⁸ka i aina nga gu i ka manga ya; bambiko aboro adege tuyo dunduko ka gia gako pai.