Read zande Ruka 2 Bible Online

Ruka 2 - zande bible

Ruka 2

¹Were, si ki ta du wa gere, Kaisara Auguseto ki rũ ndika, i ke rimo aboro dunduko.

²Bambata ke rimo aboro nangia ha, ho Kuirinu adu ni ni banyaki Suria yo.

³Aboro ki ndu ka ke rimoyo dunduko, gu ni ku rogo gani bakporo.

⁴Yosefa ki ndu Gariraya yo tigako a, rogo gu bakporo nangia Nazareta, ku Yuda yo, ku rogo gu bakporo nangia ga Dawidi, i niya ti ni Betereme, bambiko ngbatunga Dawidi nangia ko, nangia titako a;

⁵i ke rimoyo na Maria, gu ri i apazua ri fu ko, ri ki gbe na gude.

⁶Si ki ta du wa gere, ho i adu yo ni, rago ki rengbe ri batika.

⁷Ri ki batika bambata wiriri; ri ki ukadi ko ni gbanga remu, ki pigi ko rogo ga anya sanduki riahe yo, bambiko ba adu nga sinziri yo tipa yo te.

⁸Ababanda akandoro adu kina rogo gu ringara re, nanidu pati gayo rimbasa akandoro yuru nvuo yo.

⁹Ga Gbia maraika ki ru pati yo, ga Gbia imarago ki hasi rago pati yo kirikiri, i ki nigunde agunde gbe.

¹⁰Maraika ki ya fu yo, “Ka oni gúnde nga ya; bambiko oni ngére, mi naye na wene pangbanga fu roni nga ga bakere ngbarago nga gu nikadu adu fu aboro dunduko;

¹¹bambiko i vungu Batasi fu roni areme rogo gu bakporo nga ga Dawidi, nga Kristo Gbia.

¹²Gi pai adú ni yuguyugu he fu roni re: oni abí fogo gude ukadi yo ko ni gbanga remu pi rogo ga anya sanduki riahe yo.”

¹³Barimbasa amaraika ngbangbaturũ ki du na gu maraika ni ba sa, nitambua Mbori, niya,

¹⁴“Taarimo dú fu Mbori ri arago dũ, zereda dú dagba aboro sende no, i ngba ti ko!”

¹⁵Si ki ta du wa gere, ho amaraika aguari ni pati yo ku ngbangbaturũ yo, ababanda akandoro ki ya dagba yo we, “Ani ndú kina ku Betereme yo awere, ki bi nga gi pai mangi re, nga gu Gbia niyugu he fu rani.”

¹⁶I ki ye ni ipo, ki bi aMaria na Yosefa, fogo gude ki pi rogo ga anya sanduki riahe.

¹⁷Ho i abi ko ni, i ki taki pande gu pai i agumba ha fu yo tipa gi gude re.

¹⁸Si ki iriwo airiwo ti agu yo dunduko nagi agu apai ababanda akandoro agumba fu yo.

¹⁹Maria ki ka kuti agi apai dunduko re niberẽ pa ha kpotori yo.

²⁰Ababanda akandoro ki yega, ki ta taasa rimo Mbori nitambua he tipa agu apai i agi he ki bi he dunduko, a wa i agumba ha fu yo.

²¹Ho rame arengbe ni muambi i yere ko ni yerati, i ki yambu rimoko nga Yesu, nga gu maraika ayambu he mbata ka Maria ata du nga na mobara ku rukumbu yo ya.

²²Ho rame gayo munzere arengbe ni ku sangba ga Mose rugute yo, i ki ye na ko ku Yerusarema yo, ka fu ko fu Gbia.

²³Si ni keke he rogo ga Gbia rugute yo, ya “Agu akumbagude dunduko naza rukumbu i ka ya ti yo kparakpara yo fu Gbia”.

²⁴I andu ka tumo ni motumo ku sangba gu pai i agumba ha rogo ga Gbia rugute yo, ya “ambipo ue watadu paranga agbungu ue.”

²⁵Mo ngére, kumba adu Yerusarema yo, rimoko nangia Simona. Gi kumba adu ni ruru ko re, ki niberẽ ga Mbori pai aberã gbe, ningere ti gu wasa nga ga aYisaraere; Ziazia Toro ki du ti ko.

²⁶Ziazia Toro ayugu he fu ko, ya ko abi nga kpio mbata ko nikabi ga Gbia Kristo te.

²⁷Koki ye mbiko Ziazia Toro ku tii yekaru yo; ho avunguko aye ni na gu gude nga Yesu, ka manga sino rugute tipa ko.

²⁸Simona ki di ko ku beko, ki nisambua Mbori, ki niya,

²⁹Awere Gbia, mo ídi ga moyambu guari zezeredi, wa mo agumba,

³⁰mbiko bangire bi ga bata,

³¹gu mo ambakadi ku bangiri rika aboro dunduko,

³²si du ni imarago i yugu he fu auro, ki du ni gu taarimo nga ga aYisaraere, nga avururo.

³³Agu apai i agumba ha tipa ko si ki iriwo airiwo ti Yosefa na nako.

³⁴Simona ki fu maku fu yo, niya fu nako nga Maria, “Mo gí he, i moi gi gude re tipa tigo agu yo dagba aYisaraere ni dungu yo na guari yo ku ari, na tipa gu yuguyugu he i nikagumba pai kuti ni

³⁵ii, baso nikakora kpotoro yo a, ya i kusi agu aberã du kpoto aboro yo ni dungu yo.”

³⁶Were de adu ho nangia Ana, ni denebi, nangia wiri Fanuere, ni ngbatunga Asera, garãri adu ni dungu he, fuo du ri ni ngasu de ri asungu na kumbari garã ki du saba.

³⁷Ri ki du ni dekurugbo ono garãri ki du dunduko 84, ri aguari nga yekaru yo te, ono ri anafu tambuahe nigina riahe ki nikpari kpe yuru na uru.

³⁸Ri ki ta rima ti kina gu rago re, nitambua Mbori, ki nigumba pa ko fu agu yo dunduko naangera tipa gu motumo nga ga Yerusarema.

³⁹Ho i amangi agu apai ni dunduko ku sangba ga Mbori rugute yo, i ki ga ku Gariraya yo, ku rogo gayo bakporo nangia Nazareta.

⁴⁰Gude ki sono, ki ngarã, ki du na tatamana; ga Mbori undahe adu ti ko.

⁴¹Were, avunguko anandu na garã ku Yerusarema yo rago pumbo susiri.

⁴²Ho garãko adu ni bawe na ue, i ki ndu a wa sino pumbo nidu.

⁴³Ho i anyasi pa gu rago re ni, wa i ayega, gu gude nga Yesu anye sa yo Yerusarema yo; ka avunguko aina nga ha ya.

⁴⁴I ki ndu tipa rame sa ki ya tigayo ko rimbasa yo. I ki gbata ko dagba agumeyo na agu aboro i aini yo;

⁴⁵ho i abi nga ko ni ya, i ki karaga tiyo ku Yerusarema yo nigbata ko.

⁴⁶Si ki ta du wa gere, i ki bi ko fuo rame biata yekaru yo, ko nisungu dagba abayugupai ki ta gia gayo pai nisana yo tipa apai.

⁴⁷Gako rugatinapai ki iriwo ti agu yo dunduko nagi pa ko na gako karagapai.

⁴⁸Ho i abi ko ni, si ki iriwo ti yo. Nako ki ya fu ko, “Gude, tipagine mangi mo rani ti ni were? Mo ngére, abamo nigbata ro na mi ni aume.”

⁴⁹Ko ki ya fu yo, “Tipagine oni agbata re ti ni? Oni aina nga ha ya ka mi mangi ga Buba sunge amanga te?”

⁵⁰Ka i aina nga gu pai ko agumba ha fu yo ya.

⁵¹Koki ga na yo, ki da Nazareta yo; ko ki gi sangbayo. Nako ki ka kuti agi apai kpotori yo dunduko re.

⁵²Yesu ki sono na tatamana na ome, ki ngba bangiri Mbori na bangiri aboro a.