Read zande Ruka 20 Bible Online

Ruka 20 - zande bible

Ruka 20

¹Si ki ta du wa gere, ni gu rago re, wa Yesu ayugo pai fu aboro yekaru yo, ki nitungusi wene pangbanga, abairamotumo agbia ko na abakeapai na ga aYudo abaakumba;

²i ki gumba pai fu ko ki ya, “Mo pé he fu rani ke, gini tandu mo amanga agi apai na ni re? na da asia pa manga agi apai re foro?”

³Ko ki karaga ha ki ya fu yo, “Mi nikasana roni ti pai a; oni pé pa ha fere ke,

⁴Gu bapatiza nga ga Yoane, watadu si aye ngbangbaturũ yo na be aboro?”

⁵I ki saki he dagba yo, niya, “Ka ani ya ‘Si aye ngbangbaturũ yo,’ ko aya, ‘Tipagine oni aida nga pa ko ti ni ya?’

⁶Ono ka ani ya, ‘Si aye be aboro,’ aboro dunduko azúmuda rani: bambiko i naberã ha tigayo ya Yoane nangia nebi.”

⁷I ki karaga ha ya i aina nga ho si aye ni te.

⁸Yesu ki ya fu yo, “Mi agúmba nga pa gu tandu fu roni mi amanga agi apai na ni te re.”

⁹Ko ki tona gumba gi sanza re fu aboro: “Boro nirũku bakakue ati yo, ki he he fu aboro i banda ha, ni ki ndu ku rogo kura ringara ki raki koyo gbe.

¹⁰Ho regbo zuzuhe ada ni ni ki kedi moyambu koyo du agu aboro ni nabanda ha, ya i fu zuzu ati bakakue fu ni. Ono agu aboro nabanda ha i ata ni ata, ki do ni ni ku be ni.

¹¹Ni ki kedi kura moyambu. I ki ta ni ata a, ki mangi ni amanga gbegberẽ gbe, ki do ni ni ku be ni.

¹²Ni ki kedi gu biata ni. I ki hogi ni ahoga, ki niba ni aba ku sa yo.

¹³Ya iraati bakakue, ‘Mi amánga wãi? Mi akẽda wire du nyemuko ti re gbe; si ngia i aírisa ko.’

¹⁴Ono ho agu aboro nabanda ati abi ko ni, i ki saki he dagba yo, niya, ‘Dikumbo du re; ani ími ko, ũkumbo du ni gaani.’

¹⁵I ki ba ko aba ku sa yo ati bakakue yo, ki imi ko. Iraati bakakue amánga yo wãi?

¹⁶Ko ayé ka gbarasa agi ababanda ati re, ki fu ati bakakue fu agu yo.” Ho i agi he ni, i ki ya, “Ako Mbori wo te.”

¹⁷Ko ki ngere koyo du yo ni, ki ya, “Gine tie nga gi i ake he re: ‘Gu mbia aduabambu agindiga ha, si i asa ha ni gu nidu ti tukpuhe ri he?’

¹⁸Gu ni ka ti kuti gu mbia re, ni adú ni kuadikuadi ni dunduko; ono gu ni si ka ti ku ri ni si agbátaka ni agbataka wa nvutu.”

¹⁹Abakeapai ki asadi ka zia ko ni kina gu rago re na abairamotumo; i ki gunde agunde be aboro: bambiko i aini he ya ko agumba gi sanza kuti yo re.

²⁰I ki pidi Yesu, ki nikedi aboro ni abamoi, i ki sawia ya ruru aboro nangia yo ya i zi ko ti fugoko, si ki du wa ka i fu ko ku be gu tandu na gu nyaka nga ga bazogo.

²¹I ki sana ko, ki ya, “Bayugupai, ani ini ya mo nagumba pai ki yugu he wenengãi, mo angba nga na aboro kuti pa kindiga yo te, ono mo nayugo ga Mbori gene ni rengo.

²²Ngba rũ he angba fu Kaisara?”

²³Ono ko aini gayo biriki aina, ki niya fu yo,

²⁴“Oni sa nga rukutu marã feda fere. Kpia da du ti ni?” I ki ya, “Ga Kaisara du.”

²⁵Ko ki ya fu yo, “Agu ahe nga ga Kaisara oni fú kina ha fu Kaisara, agu ahe nga ga Mbori oni fú kina ha fu Mbori.”

²⁶Ka si adu nga wa ka i zi ko na gi pai re barangba aboro ya; gako karagapai ki niiriwo airiwo ti yo, i ki ongo aonga.

²⁷ASadoke ki ye koyo du ko ni, nga agu yo naya zingabekpio ho te; i ki sana ko, ki ya,

²⁸“Bayugupai, Mose ake gu pai fu rani nga ka wirina boro kpi, de nidu be ni, ka wirini adu nga ho ya, wirinani ka di diani ka vunga ku ba ni.

²⁹Awirina adu saba; bambata ni ki di de, ki nikpi ka ni avunga nga ya.

³⁰Gu ue ni ki di ri;

³¹biata ni ki di ri. I ki mangi kina wo dunduko wa du yo saba, i ki nikpi, ka wiriyo adu nga ho wa sa ya.

³²Fuo gere de ki kpi ni yangara yo.

³³Rago zingabekpio gini ni nikadia ri? bambiko i amongo rogo ri wa i adu saba.”

³⁴Yesu ki ya fu yo, “Awiri zegino naroga ade, i ki fuku yo i nidu ni dereakumba.

³⁵Ono agu yo i ka ya ti yo i rengbe na da ti gu ngbi re, na ti zingabekpio, i aroga nga ade te, i afu nga ade ni dereakumba a te;

³⁶bambiko ka i kpi nga berewe te. Bambiko i rengbe na amaraika; ki du ni awiri Mbori, wa du yo ni awiri zingabekpio.

³⁷Ono gu nga i azingisa aboro be kpio kina Mose ayugu he, rogo gu pai nga ga zigidiri ngua, ho ko aya ni ti Gbia ko nga ga Abarayama Mbori, nga ga Yisaka Mbori, nga ga Yakoba Mbori.

³⁸Were ga kangba aboro Mbori nga ko te, ga unga aboro Mbori nga ko; bambiko bangiriko aboro dunduko du ni ungayo.”

³⁹Agu abakeapai ki ta karaga ha niya, “Bayugupai, mo nagumba ha wenengãi.”

⁴⁰Bambiko i angarã nga ka sana ko ti pai berewe te.

⁴¹Ono Yesu ki ya fu yo, “Wiri yo pa ya wãi wiri Dawidi nga Kristo?

⁴²Bambiko Dawidi aya tigako kitabu Tambuahe yo, ‘Gbia aya fu gi Gbia, Mo súngu ku kumbabero,

⁴³daho mi ka maa avuraro ni tii nduro yo wa gbada.’

⁴⁴Were Dawidi tigako aya ti ko Gbia, wiri ko pa du wãi ni wiriko?”

⁴⁵Ko ki ya fu gako abawiriki ku tu aboro yo dunduko,

⁴⁶“Oni bánda tironi be abakeapai, nga agu yo nakpi nyemu ka ata na gbanga remu, ki nikpi nyemu aboro poi kuti yo bangbeahe yo, ki nikpi nyemu ambata irisa rogo abambutiria yo, na bairisa kporo pumbo yo;

⁴⁷nga agu yo nata rita ga adekurugbo ahe, nikpari akpara kindi ni biriki. I ambusa yo ambusa bakere.”