Read zande Ruka 21 Bible Online

Ruka 21 - zande bible

Ruka 21

¹Yesu ki ngere, ki bi aboro kumuko i nabafu gayo gamahe ku rogo gu ba i anatumo na marã ku rogo.

²Ko ki bi rungorungo dekurugbo ri niba rukutu marã sirigi ue koyo.

³Ko ki ya, “Mi nagumba ha fu roni ni rengo, gi rungorungo dekurugbo re ri ba ra kii ti agu yo dunduko;

⁴bambiko agi yo dunduko nibafu ra ni dungu ra re i nibafu ra ku dagba gamahe yo wa kumuko yo akumuko; ono ri niba ra dunduko a wa ami adu be ri ni gari zingo.”

⁵Wa agu yo agumba pai tipa yekaru, wa du he ni kendegekendege he ni wene ambia na gu gamahe du yo, ko ki ya,

⁶“Tipa agi ahe oni nabi he re, rago nikada, ho mbia adú nga ni erẽ sa auru kura ha, i ka he bafa ha te.”

⁷I ki sana ko, niya, “Bayugupai, ni gini rago agi apai ka manga re? gini i ka ina gu rago agi apai ka manga ti ni re?”

⁸Ko ki ya, “Oni bánda tironi ka boro ingisi nga roni wa sa ya; bambiko dungu aboro nikaye ni rimore, niya, ‘Mi nga ko!’ na, ‘Ragoho mbedi!’ ka oni ndú nga fuo yo ya.

⁹Ni gu rago oni ka gia pa sopa avura na woro ahe, ka oni gúnde nga ya; agi apai re si ayé mbata ni rengo; ono digidaha ata mbeda nga te.”

¹⁰Yesu ki ya fu yo, “Rika aboro azínga kuti gu rika aboro, ngbi ki zingi kuti gu ngbi.

¹¹Kpotosende adú ni zigizozigizo ho bakere, angbongi ki du na gberãngbi rogo agu arago; baiiriwo apai ni kere he na bakere yuguyugu he ki du ngbangbaturũ yo.

¹²Ono mbata agi apai ka du re, i azía roni, ki nitaki roni ki nifu roni fu aboro bambutiria, na ku bambukisa yo, i ki ndu na oni ku barangba abakindo na agbia mbiko rimore.

¹³Si ki ye ka du fu roni ni dezirepai.

¹⁴Si du oni ka ruga tironi ti ni kpotoroni yo, ya oni abaka nga bangironi mbata ti gu pai oni ka karaga ha fu yo te;

¹⁵bambiko mi afú ngba tatamana fu roni, nga gu ka avuraroni akáraga nga pai kuti ni niti kangu he a te.

¹⁶Ono avunguroni akúsa roni na awirinaroni na agumeroni na abadiaroni; i afú agu roni sa kpio.

¹⁷Aboro asóga roni asoga dunduko tipa rimore.

¹⁸Ono a nga gu mangerironi nikagbera wa sa te.

¹⁹Rogo gaoni hipai oni abátasa ungaroni abatasa.

²⁰“Ho oni ka bi Yerusarema ni i nikisi he kirikiri na aboro vura, oni ki ini he, ya rago gbarasa ha mbedi.

²¹Agu aboro ka du Yuda yo i ki oro ku abaagangara yo; agu yo ka du bakporo yo i guari yo; agu yo ka du ringara yo ka i rimi nga ku rogo bakporo yo ya.

²²Bambiko gi rago re nga rago irabape, ya i digisi agu apai du ni keke he dunduko.

²³Si agbérã agberã fu agu yo ka aduka na vuse na fu agu yo ka ahaga agude ni gu rago re! Bambiko bakere gberãngbi adú auru kpotosende, na zinga kuti agi aboro re.

²⁴I atíwa be rindi basape, i agbándaka yo ni zizi yo ku dagba rika aboro yo dunduko. AGendiria asimbida Yerusarema, da kina ho rago aGendiria ka nyasa ni.

²⁵“Yuguyugu he adú rogo uru na diwi na akerekuru; gberãngbi ki du fu rika aboro auru kpotosende, i akíga akiga mbiko sungburasungburabaimeawoawo.

²⁶Ome aboro ki ru aru be gunde, mbiko i angéra fuo agu apai nikaye ku zegino. Bambiko agu atandu nga ga ngbangbaturũ adu ni zigizozigizo ho.

²⁷I ki bi Wiri boro ko ayé rogo mai na tandu na bakere taarimo.

²⁸Ono ho agi apai ka tona ye ni re, oni ngére ku ari yo, ki tumba rironi; bambiko rago tumo roni nambeda.”

²⁹Yesu ki gumba sanza fu yo: “Oni bí vurumo na angua dunduko;

³⁰ho si afuna ni, oni nabi he ki ini he kpotoroni yo ya kita nambeda.

³¹Kina wo ho oni ka bi agi apai ni re si da, oni ini he ya ga Mbori ngbi mbedi.

³²Ya mi fu roni ni rengo, gi rika aboro ago nga daho agi apai ka diga ni dunduko te re.

³³Ngbangbaturũ ago ago na kpotosende; ono gimi apai ago nga te.

³⁴“Ono oni bánda tironi, oni ka hisa kpotoroni yo na bakere riahe, na kpibuda, na berã pa gi unga re, gu rago ki da re ni ba sa wa kina gbina naza;

³⁵bambiko wo si ka da fu agu aboro dunduko naraka auru kpotosende dunduko.

³⁶Oni ngére dedede, ki nikpari, ya oni di be pai ka bata be agi apai nikamanga dunduko re, ki ru barangba Wiri boro.”

³⁷Ko ki yugu pai fu yo yekaru yo na uru; ko ki kuru na yuru ki ra pati gu bagangara i aya ti ni Aeraya.

³⁸Aboro ki ye dunduko ngba wiso koyo du ko ni ku yekaru yo, ka gia gako pai.