Read zande Ruka 22 Bible Online

Ruka 22 - zande bible

Ruka 22

¹Rago pumbo gu kpokuta adu nga na agbooro ti ni ya ki mbedi, nga gu i aya ti ni Pumbo Susiri.

²Abairamotumo ki saki pai na abakeapai ya i awira pa imo Yesu wãi; bambiko i agunde be aboro.

³Satana ki rimi ku vuru Yuda yo nga gu ko i aya ti ko Keriota, nga gu ko nadu dagba agu yo nanidu bawe na ue.

⁴Ko ki ndu ki nifura na abairamotumo na abanyaki ya, ko awira pa kusa Yesu fu yo wãi.

⁵Si ki ngba angba ti yo, i ki idi pa fu marã fu ko.

⁶Ko ki idi he, ki nigbata rago ho ko ka kusa Yesu ni fu yo, ho rimbasa ka adu nga yo ni ya.

⁷Rago gu kpokuta adu nga na agbooro ti ni ya, ki da, ho i ka tumo ni na kandoro pumbo susiri.

⁸Yesu ki kedi aPetero na Yoane, ki ya, “Oni ndú ka mbakada pumbo susiri fu rani, ani ri he.”

⁹I ki ya fu ko, “Mo nakpi nyemu ani mbakadi he wari?”

¹⁰Ko ki ya fu yo, “Oni ngére, ho oni ka rima ni ku bakporo yo, kumba agbía roni naaka ime rogo akoro; oni péke ko ku rogo gu bambu ko ka rima ku rogo.

¹¹Oni ki ya fu irabambu, ‘Ya Bayugupai foro, Bambu agino wari, mi ka ri pumbo susiri rogo na gimi abawiriki?’

¹²Koayugo bakere vuru bambu fu roni na ahe kina yo dũ; oni mbákadi he yo.”

¹³I ki ndu ki nibi he wa ko agumba ha fu yo; i ki mbakadi pumbo susiri.

¹⁴Ho ragoho ada ni, Yesu ki sungu, amokedi ki sungu na ko.

¹⁵Yesu ki ya fu yo, “Mi akpi nyemu ka ri pumbo susiri na oni ni bakere nyemu he mbata mi nikahi pai;

¹⁶bambiko ya mi fu roni, mi ari nga ha te, daho si ka diga ni rogo ga Mbori ngbi yo.”

¹⁷Ko ki di inga, ho ko afu tambuahe ni tipa ha, ko ki ya, “Oni dí gere, ki kparaka ha dagba roni;

¹⁸bambiko ya mi fu roni, mi ambira nga rindi bakakue berewe te, daho ga Mbori ngbi ka da ni.”

¹⁹Ko ki di kpokuta, ho ko afu tambuahe ni tipa ha, ko ki kuadi he, ki fu he fu yo, niya, “Borore nga gere [du ni fufu he tipa roni. Oni mangi gere nitingidi pa re.”

²⁰Ko ki di inga kina wo fuo riahe, niya, “Gi inga re, si nga vovo ndika rogo kurere, nga kina gu nauka tipa roni.]

²¹Ono oni ngére, be gu ni nakusa re du na mi pati mbisa.

²²Bambiko Wiri boro nandu, a wa i aringbisi he ni rengo; ono si agbérã tipa gu kumba nakusa ko!”

²³I ki tona ka sana he dagba yo, ya da nga gu ni dagba yo nikamanga gi pai re.

²⁴I ki tona ka ti kangu, ya da dagba yo du ni bakumbayo.

²⁵Yesu ki ya fu yo, “Ga aGendiria abakindo nazoga yo azoga; agu yo nakindo yo i naya ti yo betedi aboro.

²⁶Ono oni adú nga wo te; ono gu ni du ni bahe dagba roni, ni ka du wa kina tame; gu ni du ni gbia, ni ka du wa gu ni namanga pa aboro.

²⁷Bambiko watadu gu ni nasunga ka ri riahe na gu ni nafu he fu ni, da nga bakumba? a nga gu ni nasunga ka ri riahe te? Ono mi dagba roni wa gu ni namanga pa aboro.

²⁸“Ono oni nga agu yo naadu na mi ho i aasadi re ni.

²⁹Mi nafu ngbi fu roni a wa Buba afu he fere,

³⁰oni arí riahe ki mbiri he pati gi mbisa rogo gi ngbi; oni asúnga auru ambataabakindo nisapu ngbanga fu rika aYisaraere bawe na ue.

³¹“Ako Simona, Simona, mo bi, Satana akpi nyemu ka dia roni ka igita roni wa tunga,

³²ono mi akpari tipa ro, ya ka ga idapase paya nga ya. Mo tigamo, ho mo ka sa tiro ni berewe, mo nyákasi awirinamo.”

³³Petero ki ya fu ko, “Gbia, mi idi ka ndu na mo ka si vura du ku rogo bambukisa yo na fu kpio vuru.”

³⁴Yesu ki ya, “Mi nagumba ha foro, Petero, mbata bakondo nikakua areme, mo atí kangu bara biata ya mo aina nga re te.”

³⁵Yesu ki ya fu yo, “Ho mi akedi roni ni, ka mangu adu nga be roni na mangu marã na rakata ya, zingo he amangi roni?” I ki ya, “Wa sa te.”

³⁶Ko ki ya fu yo, “Ono awere, gu ni du na mangu be ni ni dí he na mangu marã a. Gu ni adu nga basape be ni ya, ni bági gani gbanga remu ki ngbe basape na ni.

³⁷Bambiko ya mi fu roni, gu pai dũ ni keke he si ka du ni digisidigisi he ti re re, ‘I agedi ko na atindika’; bambiko gu pai dũ tipa re si adú ni digidigi he.”

³⁸I k ya, “Gbia, mo bí, basape erẽ ue.” Ko ki ya fu yo, “Si nyasi.”

³⁹Yesu ki kuru ki ndu, wa sinoko adu, ku pati bagangara Aeraya; abawiriki ki peke ko a.

⁴⁰Ho ko ada ni, ko ki ya fu yo, “Oni kpári akpara ka oni ndu nga ku rogo asada ya.”

⁴¹Ko ki guari pati yo toni wa ba yo mbia; ko ki kuku ki nikpari,

⁴²niya, “Buba, ka mo nakpi nyemu he, mo dí gi inga be re re. Ono ka si du nga wa mi akpi nyemu he ya, ono wa kina mo akpi nyemu he.”

⁴³Maraika ki ye koyo du ko ni, ki ninyakasi ko.

⁴⁴Imisiripai ki mangi ko ko ki kpari akpara kakaka gbe; gako randimo ki du wa kina bakere togoro kure nitotogo ku sande.

⁴⁵Ho ko aguari ni pati gako kpe, ko ki ye koyo du gako abawiriki ni, ko ki bi yo i nira ara mbiko rungo,

⁴⁶ko ki ya fu yo, “Tipagine oni nara ti ni? Oni gúari ki kpari ka oni ndu nga ku rogo asada ya.”

⁴⁷Ho ko agumba gi pai ni re, oni ngére, rimbasa ki ye na gu ko nadu dagba agu yo nanidu bawe na ue nangia Yuda, ko ningbe mbata yo fu yo; ko ki mbedi koyo du Yesu ni ka dungo ko.

⁴⁸Ono Yesu ki ya fu ko, “Yuda, kusi mo Wiri boro ni dungo ko?”

⁴⁹Ho agu aboro nadu pati ko abi gu pai nikamanga ni, i ki ya, “Gbia, ani ta yo ni basape?”

⁵⁰Gu ni dagba yo ki ta ga gbiamotumo moyambu, ki kati kumbatuko.

⁵¹Ono Yesu ki karaga ha ki ya, “Oni he he kuti gere.” Ko ki zadi tuko, ki nihusi ko.

⁵²Yesu ki ya fu abairamotumo, na agu abanyaki nga ga yekaru yo, na ga aYudo abaakumba, nga agu yo naye kuti ko, “Sa oni re ni batuka, ye oni ti ni na abasape na angbondo?

⁵³Ho ani adu ni na oni yekaru yo na uru, oni atãa nga beroni kuti re te. Ono gaoni rago nga gere na gu tandu nga ga bitimo.”

⁵⁴I ki zi ko, ki ndu na ko, ki ye na ko ku rogo ga gbiamotumo bambu. Ono Petero ki pe ko tuturu.

⁵⁵Ho i aginda we ni rogo vuru bambu, ki mongo sungu, Petero ki sungu dagba yo.

⁵⁶De pangbadimo ki bi ko wa ko asungu ima we, ri ki bi ko nganganga, ki ya, “Gi kumba re adu na ko a.”

⁵⁷Ono ko ati kangu, niya, “De, mi aina nga ko te.”

⁵⁸Fuo gere toni kura boro ki bi ko, ki ya, “Ngbatungayo nga mo a.” Ono Petero ki ya, “Kumba, mi te.”

⁵⁹Saa sa ki susi fuo gere kura boro ki gumba ha nizunga he, niya, “Gi kumba re nidu na ko a ni rengo; bambiko boro Gariraya nga ko.”

⁶⁰Ono Petero ki ya, “Kumba, mi aina nga gu pai mo agumba te re.” Wa ko agumba ha, bakondo ki kua akua ni ba sa.

⁶¹Gbia ki sa tiko, ki ngere koyo du Petero ni. Petero ki tingidi ga Gbia pai, wa ko agumba ha fu ko, “Mbata bakondo nikakua areme, mo aora rimore bara biata.”

⁶²Petero ki kuru ki kpari akpara ni aume gbe.

⁶³Agu akumba nazadi Yesu i ki sawia ko ki nita ko.

⁶⁴Ho i avo bangiriko ni, I ki sana ko, niya, “Mo gúmba ha! Da nga gu ni nata ro?”

⁶⁵Dungu kura apai i agumba ha kuti ko, nisenge ko a.

⁶⁶Ho rago agiri ni, rimbasa ga aboro abaakumba ki tiria, abairamotumo na abakeapai a; i ki ndu na ko ku rogo gayo barondo yo, niya,

⁶⁷“Si ngia Kristo nga mo, mo gúmba ha fu rani.” Ono ko ki ya fu yo, “Ka mi agúmba ha fu roni, oni aida nga paha te;

⁶⁸ka mi asána roni, oni akáraga nga pai te.

⁶⁹Ono fuo gi rago re Wiri boro asúnga ku kumbabe ga Mbori tandu.”

⁷⁰I ki ya dunduko, “Atika Wiri Mbori nga mo?” Ko ki ya fu yo, “A si oni agumba ha re ya mi nga ko.”

⁷¹I ki ya, “Gini pai ani akpi nyemu aboro gumba ha kuti ko berewe? Bambiko ani nigi he tigaani ngbako yo.”