Read zande Ruka 24 Bible Online

Ruka 24 - zande bible

Ruka 24

¹Pamanangba wiso ti gu bambata uru nga ga poso, ade ki ye ku pati murã na gu wene fuõangua i ambakadi he.

²I ki bi mbia i naima wiriga ha ku sa yo.

³I ki rimi ku murã yo ka i abi nga kangba Gbia Yesu ya.

⁴Si ki ta du wa gere, wa i abaka bangiriyo ti gi pai re, mo ngére, akumba ue aru pati yo na ngenzerengenzere remu.

⁵Wa i agunde agunde, ki vagadi ku sande; akumba ki ya fu yo, “Tipagine oni nagbata unga boro ti ni dagba kangba aboro yo?

⁶Ko etere, ko zingi be kpio. Oni tíngidi he wa ko agumba ha fu roni ho ko ata du ni Gariraya yo,

⁷niya i ka fu Wiri boro ku be gbegberẽ aboro, i ki wagi ko, biata uru ko ki zingi be kpio.”

⁸Ade ki tingidi gako pai,

⁹ki karaga tiyo pati murã yo, ki gumba agi apai re dunduko fu agu yo nadu bawe na sa, na fu kura aboro dunduko.

¹⁰Were agu yo nagumba agi apai re fu amokedi i nangia aMaria Magadara, na Yoana, na gu Maria nga na Yakoba; na gu kura ade nadu na yo.

¹¹Agi apai re ki niwiri kina wia bangiri amokedi; i ki nibasa ha.

¹²Ono Petero aguari ki nioro ku murã yo; ko ki nugadi ki ningere koyo, ko ki bi kina remu ni sa ha; ko ki ga ku kpuko vo, ki baki bangiriko ti gu pai namangi re.

¹³Were, agu yo ue dagba yo andu ni kina gu rago re ku kporo yo rimoho nangia Emau, si turũ na Yerusarema wa akirometere bawe.

¹⁴I ki fura dagba yo tipa agu apai nadu ni mangimangi he.

¹⁵Si ki ta du wa gere, wa i afura nibaki bangiriyo, Yesu ki mbedi na yo tigako, ki mongo nindu na yo.

¹⁶Ono i aina nga ko te bangiriyo adu ni kina tataita ha.

¹⁷Ko ki ya fu yo, “Gini pai oni nagumba dagba roni, wa oni andu?” I kiru, kinirungo.

¹⁸Gu ni sa, rimoko nangia Kereopa ki karaga ha niya fu ko, “Mo nata ni sa ro rogo Yerusarema mo ata ina nga agu apai i amangi yo re ni gi rago te re?”

¹⁹Ko ki ya fu yo, “Gini pai?” I ki ya fu ko, “Pai tipa Yesu nga boro Nazareta, gu ko nangia nebi, ki du na tandu rogo agu apai ko amanga na gu ko agumba barangba Mbori na barangba aboro dunduko!

²⁰Na wa abairamotumo na abazogorani afu ko i gbarasi ngbanga ko ka imo ko, ki niwagi ko.

²¹Ono ani aberẽ tigaani ya ko nangia gu ko nikatumo aYisaraere. Ii, gbia kuti gere dunduko areme nga biata uru fuo manga yo agi apai re.

²²Ono kura pai nairiwosi rani, bambiko agu ade dagba agu yo du na ani andu pamanangba wiso ku Dati murã.

²³Ho i abi nga kangbako ni ya, i ki ye, niya, i nibi amaraika, nagumba ya ko du ni ungako.

²⁴Agu yo nadu dagba rani ki ndu ku murã yo, ki bi he wa kina gu ade agumba ha; ono i abi nga ko te.”

²⁵Ko ki ya fu yo, “Ako airamungo, oni naida pa agu apai Kokorokokoro anebi naagumba ha!

²⁶Si ru Kristo ka hi agi apai re, ki nirimi ku rogo gako taarimo te?”

²⁷Ko ki tona yugo agu apai fu yo dunduko tona ti ga Mose apai na ga anebi, na rogo Ziazia Kekeapai dunduko nga gu du tipa ko tigako.

²⁸I ki mbedi na gu kporo, yo i andu ku ho ni; ko ki ndu wa ka ko nikasusa.

²⁹I ki zúngadi ko, niya, “Ani súngu na mo; bambiko uru nandu gbe, uru nikati.” Ko ki rimi ka sunga na yo.

³⁰Si ki ta du wa gere, ho ko asungu ni na yo ka ri riahe, ko Ki di kpokuta, ki fu tambuahe, ki kuadi he, ki nifu he fu yo.

³¹Bangiriyo ki ha, i ki ini ko; ko ki nibirikpo ni ba sa.

³²I ki ya dagba yo, “Ani akigi akiga, ho ko afura ni na ani gene, wa ko ayugu Ziazia Kekeapai fu rani te?”

³³I ki guari ni ba sa, ki karaga tiyo ku Yerusarema yo, ki nibi agu yo nadu bawe na sa i naima dungura tiyo, na agu yo nadu na yo.

³⁴I ki ya, “Gbia zingi be kpio ni rengo, ko yugu tiko fu Simona!”

³⁵Agu yo ki pe agu apai namangi gene, na wa i aini Gbia ho ko akuadi kpokuta ni.

³⁶Wa i agumba agi apai re, Yesu ki kuru ku dagba yo tigako ki niya fu yo, “Oni dú zezeredi.”

³⁷Ono i agunde agunde ngbaduyo ki nikua akua gbe, i ki berẽ he ya toro nadu.

³⁸Ko ki ya fu yo, “Tipagine kigi oni ti ni? Tipagine saki oni he ti ni ngbaduroni yo?

³⁹Oni bí kpabere na kpendure ya mi du ni rengo; oni zádi re, ki nibi re; bambiko pasio na meme ti toro te, a wa du mi awere.” [

⁴⁰Ho ko agumba gi ni re, ko ki yugu kpabeko fu yo na kpenduko.]

⁴¹Wa i aida nga pa ko mbiko gayo ngbarago ya, si ki niiriwo ti yo, ko ki ya fu yo, “He be roni erẽ karihe?”

⁴²I ki fu pasipasi tĩo fu ko.

⁴³Ko ki di ru, ki niri ru ku bangiriyo.

⁴⁴Ko ki ya fu yo, “Gi nga gu gimi apai mi agumba fu roni re, wa mi adu na oni, ya i ka digisa apai dunduko, nga gu du ni keke he rogo ga Mose Rugute yo na anebi na Atambuahe yo tipa re.”

⁴⁵Ko ki uru gayo berã, i ki rugu tiyo na Ziazia Kekeapai.

⁴⁶Ko ki ya fu yo, “I ake he ya Kristo ka hi pai, biata uru ko ki zingi be kpio;

⁴⁷ya i ka tungusa pa sa berã na vu aboro ti ingaapai ni rimoko fu rika aboro dunduko, tona Yerusarema yo.

⁴⁸Adezire agi apai re nga oni.

⁴⁹Oni ngére, mi akéda ga Buba kidohe fu roni. Oni sungu bakporo yo, da kina ho i ka ukadi roni ni na tandu ari yo.”

⁵⁰Yesu ki ndu na yo ki da ku pati Betania yo. Ko ki tumba beko, ki nifu maku fu yo.

⁵¹Si ki ta du wa gere, wa ko afu maku fu yo, ko ki guari pati yo, Mbori ki di ko ku ngbangbaturũ yo.

⁵²Gako abawiriki ki irisi ko, ki nikaraga tiyo ku Yerusarema yo na bakere ngbarago.

⁵³I ki nidu yekaru yo nisambua Mbori kindi.