Read zande Ruka 6 Bible Online

Ruka 6 - zande bible

Ruka 6

¹Si ki ta du wa gere ti gu ue sabiti Yesu andu rogo ati vunde; gako abawiriki ki siri vunde, ki ta tukumo ho beyo niri he.

²Agu yo dagba aFarusi ki ya, “Tipagine oni namanga gu pai ti ni wa aru nga manga ha rago sabiti ya?”

³Yesu ki ta karaga ha fu yo niya, “Oni ageda nga kina gi te re, nga gu Dawidi amangi, ho gomoro amangi ko ni, na agu aboro nadu na ko;

⁴wa ko arimi ku rogo ga Mbori bambu yo, ki di kpokuta yugopai ki niri he, ki fu he fu agu yo nadu na ko a; nga gu i aida nga pa ri he ya, ono fu kina aboromotumo ni sa yo?”

⁵Ko ki ya fu yo, “Wiri boro du ni gbia sabiti.”

⁶Si ki ta du wa gere ti kura sabiti, Yesu ki rimi ku bambutiria yo ki niyugu pai. Kumba adu yo na kurugbo kumbabeko.

⁷Abakeapai ki pidi ko na aFurusi, si ngia ko ahusa ko rago sabiti; i bi gu pai ka i kiti ngbanga ko mbiko ho.

⁸Ono ko aini gayo aberã; ki ya fu gu ko nadu na kurugbo beko, “Mo gúari, ki ru dagba yo.” Ko ki guari ki ru.

⁹Yesu ki ya fu yo, “Mi nasana roni, watadu manga wenepai rago sabiti na manga gbegberẽpai, ka batasa unga na ka gbarasa ha, gini gu ru?”

¹⁰Ko ki ngere kirikiri fuo yo dunduko ki ya fu ko, “Mo tãi bero.” Ko ki mangi he wo; beko ki hu.

¹¹I ki nigbiriwo kuti ko; i ki fura dagba yo tipa gu pai ka i mangi Yesu na ni.

¹²Si ki ta du wa gere ti gu rago re, Yesu akuru ki ndu ku bagangara yo ka kpara yo; ko ki nikpari akpara fu Mbori yuru sasasa.

¹³Ho rago agiri ni, ko ki yambu gako abawiriki koyo du ko ni. Ko ki sia agu yo dagba yo bawe na ue, ko ki ya a ti agi yo re amokedi;

¹⁴nga Simona, ko ayambu kura rimoko a nga Petero, na Andarea nangia wirinako, na Yakoba na Yoane, na Firipo na Barutoromayo,

¹⁵na Matayo na Toma, na Yakoba nangia wiri Arafayo, na Simona nga gu ko i aya ti ko Zerote,

¹⁶na Yuda nangia wirina Yakoba, na Yuda Keriota nga gu ko nakusi Yesu.

¹⁷Yesu ki zorõ na amokedi, ki ru auru kpasakpasa sende, na bakere rimbasa gako abawiriki, na gu dungu aboro naye Yuda yo na Yerusarema yo, na pangba baime Tura yo na Sidona yo, ka gia gako pai, na ka hu be gayo akaza.

¹⁸Agu yo du ni fudifudi yo be gbigbita atoro ki hu.

¹⁹Rimbasa aboro ki asadi ka zada ko dunduko; bambiko tandu anikuru ti ko, ki husi yo dunduko.

²⁰Ko ki ngere koyo du gako abawiriki ni, ki ya, “Aboro maku nga oni, rungorungo aboro, bambiko ga Mbori ngbi nga gaoni.

²¹“Aboro maku nga agu roni du na gomoro awere, bambiko oni ambíka. “Aboro maku nga agu roni nakpara ni aume awere, bambiko oni amóma.

²²“Aboro maku nga oni, ho aboro ka soga roni ni, na ho i ka kpara roni ni ti yo, ki nisenge roni, ki ba rimoroni ku sa yo wa gbegberẽ he, tipa rimo Wiri boro.

²³Oni ngí angi ni gu rago re, ki niguku ni ngbarago; oni ngére nga, gaoni mosoro du ni bakere he ngbangbaturũ yo bambiko abayo amangi anebi kina wo.

²⁴“Ono na gberẽ he fu agu roni nakumuko! bambiko oni ima dia gaoni wasa.

²⁵“Na gberẽ he fu agu roni du na mbire awere! bambiko gomoro amánga roni. “Na gberẽ he fu agu roni namoma awere! bambiko oni arúngo ki nikpari ni aume.

²⁶“Na gberẽ he fu roni ho aboro dunduko ka tambua roni ni, bambiko abayo amangi kina wo a fu airazire anebi.”

²⁷“Ono ya mi fu roni nagia ha, Oni kpí nyemu avuraroni, oni mángi pa agu yo nasoga roni,

²⁸oni sámbua agu yo nasenga roni, oni kpári tipa agu yo namanga roni gbegberẽ.

²⁹Gu ni ka nari bagaro mo ária gu kura ha fu ni a; gu ni ka di ga gbanga remu ka mo ká nga na ga baukadi be ni a ya.

³⁰Mo fú he fu gu ni ka sana ro; gu ni ka di gamo ahe, ka mo sána nga ni ti ni berewe ya.

³¹Wa oni akpi nyemu aboro nimangi fu roni, oni mángi he fu yo kina wo a.

³²“Ka oni kpi nyemu agu yo nakpi nyemu roni, gini tambuahe ka du fu roni ti ni? bambiko aboro ingapai nakpi nyemu agu yo nakpi nyemu yo a.

³³Ka oni mangi pa agu aboro namanga pa roni, gini tambuahe ka du fu roni ti ni? aboro ingapai namanga kina wo a.

³⁴Ka oni fu he ni bape fu gu ni oni nakpi nyemu ka dia ha be ni berewe, gini tambuahe ka du fu roni ti ni? aboro ingapai nafu he ni bape fu aboro ingapai ka dia kina ha berewe.

³⁵Ono oni nikpí nyemu avuraroni, ki nimangi pa yo wenengaĩ, ki nifu he fu yo ni wasa; gaoni mosoro adu ni bakere he, oni ki du ni awiri gu Ko du ni Bahe. Bambiko ko naina pai fu aboro gbangbati na aboro ingapai.

³⁶Oni íni pai fu aboro a wa Baroni naina pai fu aboro.

³⁷“Ka oni sápu nga ngbanga boro ya, ka i asápa nga ngbanga roni a ya: ka oni mbúsi nga boro ya, ka i ambúsa nga roni a ya; oni vú boro i ki vu roni;

³⁸oni fú he, i ki fu he fu roni; si ki rengbe gbe, i así he asi, nizigizo ho, si ki niuka auka, kina wo i ka fu he fu roni. Bambiko na gu moduka oni ka nduka he na ni, i andúka he na kina ha fu roni berewe.”

³⁹Yesu ki gumba sanza fu yo a, “Ka iravurari gasi iravurari? i ue ka ti ku due yo, te?

⁴⁰Bawiriki nasusa nga gani bayugupai te; ono gu ni du ni teketeke ni ni ka wira gani bayugupai.

⁴¹Tipagine mo nabi gu toni he du rogo bangiri wirinamo ti ni, ono mo ata ruga nga tiro na gu bakere he du kina rogo bangiro te?

⁴²Mo awíra pa ya fu wirinamo wãi, ‘Wirina, mi dí gu toni he du rogo bangiro’, a wa mo ata ruga nga tiro na gu bakere he du bangiro yo te? Irabiriki nga mo, mo dí kina gu bakere he du bangiro yo mbata mo ki bi he wenengãi ka dia gu toni he du bangiri wirinamo yo.”

⁴³A nga wene ngua sa ka zuku gbegberẽ rinde te; a nga gbegberẽ ngua sa ka zuku wene rinde te.

⁴⁴Bambiko i aina angua dunduko ti kina zuzuhe. Bambiko aboro akata nga zuzu vurumo ti kiwe te, i akata nga kakue ti zigidiri kiwe te.

⁴⁵Wene boro nakusa wene apai ti gu wene kumuko du ngbaduni yo; gbegberẽ boro nakusa gbigbita apai ti gu gbigbita kumuko du ngbaduni yo; bambiko ngba boro nagumba pai mbiko gu pai dũ ngbaduni yo kpaima.

⁴⁶“Tipagine ya oni ti re ti ni, ‘Gbia, Gbia,’ ka oni amanga nga agu apai mi agumba fu roni ya?

⁴⁷Gu ni ka ye kono du mi ni, ki gi gimi apai ki nimangi he, mi ayúgo gu boro fu roni ni nawira ni:

⁴⁸ni wiri gu boro nadua bambu ki ge he dudungura, ki moi mburuhe auru mbia. Ho ime afu kuti gu bambu ni re, ka si azigizo nga ha ya; bambiko ni adua ha wenengãi.

⁴⁹Gu ni nagia pai ka ni amanga nga ha ya, ni wiri gu boro nadua bambu auru sende zanga mburuhe; ime ki fu afu kuti he, si ki ti ati ni ba sa; tigo gu bambu re ki du ni bakere he gbe.”