Read zande Ruka 7 Bible Online

Ruka 7 - zande bible

Ruka 7

¹Ho Yesu anyasi gako tungusapai ni dunduko ku tu aboro yo, ko ki rimi ku Kaparanauma yo.

²Ga gu barukuri aboro 100 moyambu, nangba ti ko gbe, ki kaza, wa ko nikakpi.

³Ho ko agi pa Yesu ni, ko ki kedi ga aYudo abaakumba koyo du ko ni, ki kpari fu ko, ko ye ka batasa gako moyambu.

⁴Ho i aye ni koyo du Yesu ni, i ki ta kpara fu ko gbe, niya, “Ngba ringiko gbe, mo mángi gi pai re fu ko;

⁵bambiko nyemu rikarani namanga ko gbe, ko nadua gaani bambutiria tigako fu rani.”

⁶Yesu ki ndu na yo, ho ko ambedi ni na bambu, barukuri aboro 100 ki dedi abadiako koyo du ko ni niya fu ko, “Gbia, ka mo fúdi nga tiro ya; bambiko mi are nga na rima mo ku tii gi bambu yo te.

⁷Si du mi aya ti ni tigimi, mi are nga na ye koyo du mo ni te; ono mo gúmba kina pai, gi moyambu ki bati.

⁸Bambiko zogo yo re azoga a, mi naruga abazengere aruga: mi ki ya fu gu ni sa, ‘Mo ndú,’ ni ki ndu andu; fu gu ni, ‘Mo yé,’ ni ki ye aye; fu gi moyambu, ‘Mo mángi gere,’ ni ki mangi he amanga.”

⁹Ho Yesu agi agi apai ni re, si ki iriwo airiwo ti ko mbiko gu barukuri aboro, ko ki sa tiko ki niya fu gu rimbasa aboro naapeka ko, “Ya mi fu roni, mi abi nga bakere idapase wa gere mbata te, oó, dagba aYisaraere a te.”

¹⁰Agu aboro i akedi yo, i ki nikaraga tiyo ku bambu yo, ki bi gako moyambu ko nahu.

¹¹Si ki ta du wa gere fuo ho mbembedi, Yesu ki ndu ku rogo gu bakporo rimoho nangia Naina; gako abawiriki ki mongo ndu na ko, na bakere rimbasa.

¹²Ho ko ambedi ni ku ngbadimo bakporo, mo ngére, i atindi kangba boro ku zegi yo, nangia bangisa gude be nako, dekurugbo nangia ri. Aboro bakporo ki du na ri ni dungu yo.

¹³Ho Gbia abi ri ni, nungari ki nimangi ko amanga, ko ki ya fu ri, “Ka mo kpári nga ya.”

¹⁴Ko ki mbedi ki zadi raga: agu aboro naatindahakiruaruza. Kokiya, “Paranga, ya mi foro, mo gúari.”

¹⁵Gu ko nakpi ko ki guari, ki tona ka fura. Ko ki fu ko fu nako.

¹⁶Gunde ki zi aboro azia dunduko; i ki ta taasa rimo Mbori, niya, “Bakere nebi kuru ku dagba rani!” na, “Mbori yé ka bi gako aboro!”

¹⁷Gako pangbanga ki gbandaka agbandaka ku rogo Yuda yo dunduko, na ku ringara yo dunduko kirikiri.

¹⁸Ga Yoane abawiriki ki gumba pa agi apai fu ko dunduko re.

¹⁹Yoane ki yambu gako abawiriki ue koyo du ko ni, ki ta keda yo koyo du Gbia ni, niya, “A ngia gu ni naye nga mo, na ani ka ngera ti gu kura ni?”

²⁰Ho akumba aye ni koyo du Yesu ni, i ki ya, “Yoane Babapatiza ata keda rani kono du mo ni, niya, ‘A ngia gu ni naye nga mo, na ani ka ngera ti gu kura ni?’ ”

²¹Ti gu rago re Yesu nihusi dungu aboro be kaza na kere akaza na gbigbita atoro; ko ki fu ngera fu agu yo nangia airavurari.

²²Ko ki karaga ha ki ya fu yo, “Oni gá, ki gumba pa agu apai fu Yoane oni abi he ki nigi he; airavurari nangera, airaterenga nata, airangbataka nahu, airangbianga ki nigi pai, kangba aboro ki nizingi, i nitungusi wene pangbanga fu rungorungo aboro.

²³Boro maku nga gu ni abi nga ũkota ti re ya!”

²⁴Ho ga Yoane asunge aga ni, Yesu ki tona ya fu rimbasa aboro tipa Yoane wẽ, “Oni andu ku ngbakungba yo ka bi gine? gbaka nawo be yuge?

²⁵Ono oni andu ka bi gine? kumba navo rurungbura roko? Oni ngére, agu yo navo wene ngenzerengenzere remu, ki niri wene riahe, i du ngbanga ku abakindo yo.

²⁶Ono oni andu ka bi gine? nebi? Ii, ya mi fu roni wẽ, ko susi nebi gbe.

²⁷Nga gi ko re i ake he tipa ko ya, ‘Mo ngére, mi nakeda gi sunge mbata yo foro, ko ambákada ga gene ku mbata yo foro.’

²⁸Ya mi fu roni, dagba agu yo ade avunga yo, a nga gu ni sa susi Yoane te; ono gu ni du ni kina toni ni rogo ga Mbori ngoi ni susi ko.”

²⁹Ho aboro agi he ni dunduko, na abarogo marã ngbeti, i ki ya ru ga Mbori pai aru mbiko i abapatizi yo ni gu bapatiza nga ga Yoane.

³⁰Ono aFarusi abasa sangba Mbori tigayo na abainiparugute, bambiko i abapatizi nga yo ni gu bapatiza nga ga Yoane te.

³¹“Mi aringbisa gi rika aboro re kuti gine tie? I nawira gine?

³²1 nawira agude nasunga bangbeahe yo, ki ta fura dagba yo yo, niya, ‘Ani abi bia fu roni, ka oni ado nga ya; ani ata wawa ka oni akpara nga ya.’

³³Bambiko Yoane Babapatiza aye ka ko ari nga riahe, nimbiri imekakue a ya, oni ki ya, ‘Daimona namanga ko.’

³⁴Wiri boro aye ki niri riahe nimbiri he; oni ki ya, ‘Oni ngére, boro aramana, bambiri imekakue, badia abarogo marã ngbeti na aboro ingapai!’

³⁵I sapu ngbanga fu tatamana mbiko awirihe dunduko.”

³⁶Gu ni dagba aFarusi yo ki sana Yesu ko ye i ri riahe na ko. Ko ki rimi ku rogo ga Farusi bambu, ki sungu ka ri riahe.

³⁷Mo ngére, de nadu bakporo yo, nangia boro ingapai; ho ri aini he ni ya ko sungu ka ri riahe rogo ga Farusi bambu, ri ki ye na wene fuo nzeme mbeda,

³⁸ki ta ru pati nduko gii ko yo, nikpari. Ri ki tona mbeda nduko ni aumeri ki niwege he ni mangeriri, ki nidungo nduko ki nimbedi he ni nzeme.

³⁹Were ho gu Farusi abi he ni nayambu ko, ko ki ta berã ha tigako, niya, “Gi kumba re, si ngia nebi du, ka ko aini sino gi de nazada ko re na gu pai dũ ti ri, ya de ingapai nga ri.”

⁴⁰Yesu ki ta karaga ha niya fu ko, “Simona, pai ho mi ka gumba ha foro.” Ko ki ya, “Bayugupai, mo gúmba ha.”

⁴¹Akumba ue nadu na ga kumba bape be yo; gu ni sa na bape be ni wa rukutu marã feda 500, gu kura ni na kina 50.

⁴²Ho i adu ni gbua, ko ahe he fu yo. Gini ni dagba yo akpi nyemu ko susi?

⁴³Simona ki karaga ha ki ya, “Ya mi tigimi, gu ni ko ahe bakere he fu ni.” Yesu ki ya fu ko. “Mo asapu he wenengãi.”

⁴⁴Ko ki sa tiko fuo gu de re, ki ya fu Simona, “Mo bi gi de re? Mi arimi ku rogo ga bambu, mo afu nga ime fere kuti ndure te; ono ri agirisi ndure ni aumeri, ki niwege he ni mangeriri.

⁴⁵Mo adungo nga re te; ono ri, ti gu rago mi arimi ku dimo no re, ri ambu nga dungo ndure te.

⁴⁶Mo ambeda nga rire ni nzeme te; ono gi de re ambedi ndure ni nzeme.

⁴⁷Si du ya mi foro ti ni, i vu ri ti gari dungu ingaapai; bambiko ri adu na nyemuse gbe; ono gu ni ka i vu ni ti kina toni he ni adu na nyemuse kina toni.”

⁴⁸Ko ki ya fu ri, “I vu ro ti ga ingaapai.”

⁴⁹Agu yo nasungu ka ri riahe na ko i ki tona ka fura tigayo, “Da nga gi ko re navu boro ti ingaapai?”

⁵⁰Ko ki ya fu gu de re, “Ga idapase batasi ro, mo ndú zezeredi.”